00:00:00 IGIHE NETWORK KN KINYARWANDA EN ENGLISH FR FRANCAIS

Ingagi enye z’u Rwanda zaburiwe irengero muri RDC

Yanditswe na Philbert Hagengimana
Kuya 7 December 2016 saa 11:59
Yasuwe :

Ibizazane Umuryango w’Ingagi witwa ‘Kuryama’ wahuye na byo mu myaka ya 2012 na 2015, byatumye wambuka umupaka ujya muri Repubulika Iharanira Demukarasi ya Congo (RDC), none wagarutse utuzuye, aho bikekwa ko enye muri zo zaba zarigiriye mu yindi miryango yo muri Pariki ya Virunga.

Ikigega cyitiriwe Dian Fossey Gorilla, gitangaza ko uwo muryango wambutse umupaka ukajya kwibera muri RDC inshuro ebyiri zitandukanye mu myaka yashize, aho wamazeyo amezi umunani (8) hagati mu mwaka wa 2014-2015, ukaza gusubirayo mu Ukwakira 2015 kugeza muri Nzeri uyu mwaka.

Kuwa 30 Nzeri muri uyu mwaka wa 2016 ni bwo uwo muryango wongeye gushinga ibirindiro mu mpinga z’Ikirunga cya Bisoke, ariko ukaba warahindutse ugereranyije n’uko wari uteye mbere, kuko hari ingagi enye mu zari ziwugize zitakiwurimo.

Icyo kigega gikomeza kivuga ko zari zarambutse umupaka ari Ingabozirindwi n’ingore imwe, enye zitagarutse bikaba bishoboka ko zaba zaragiye mu yindi miryango y’ingagi zo muri pariki ya Virunga yo muri RDC.

Icyakora ngo mbere y’uko uwo muryango utangira kujya wimuka ujya muri RDC, wabanje guhura n’ibizazane, aho iyari Umuyobozi wawo yitwaga ‘Kuryama’, yakomerekeye mu mirwano ikaza gupfa mu 2012. Yahise isimburwa na ‘Kirahure’, na yo iza gukomereka, ipfa mu mu 2015.

Ubutegetsi bw’uwo muryango bwahise busigaranwa na ‘Vuba’ y’imyaka 22, ari na yo yaziyoboye ikazambutsa umupaka mu Ukwakira umwaka ushize.

Ikigega cyitiriwe Dian Fossey Gorilla kivuga ko ntako kitagira ngo cyite ku Ngagi hafi icya kabiri cy’iziri mu Rwanda ariko kuba zo zitazi imipaka, bituma hari igihe zambuka zikajya muri RDC, aho abashinzwe kuzikurikirana badashobora kurenga, bityo kuzibungabunga no kumenya amakuru yazo umunsi ku wundi bikaba bitagishobotse, bikaba ngo bisaba gutegereza igihe zizagarukira.

Umushakashatsi muri iki kigega, Winnie Eckardt yatangaje ko ubwo uwo muryango wagarutse, basubukuye uburyo bwo kugenzura umunsi ku wundi ingagi ziwugize.

Kugeza ubu uwo muryango urimo ingabo eshatu n’ingore imwe ifite Umwana bikekwa ko yaba afite amezi arindwi utaramenya Se, gusa ngo ubushakashatsi bakiri gukora kuri uwo muryango buzagaragaza Ingagi akomokaho.

Veronica Vecellio ushinzwe ibikorwa muri icyo kigega avuga ko ingagi y’ingore itazongera kubyara muri iyi myaka itatu, ariko kandi ngo icyizere ni cyose cy’uko uwo muryango utazongera kuva mu Rwanda.

Rwema na Tetero, abasore bo mu muryango wa 'Kuryama'
Vuba, Umuyobozi w'Umuryango 'Kuryama'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .