00:00:00 IGIHE NETWORK KN KINYARWANDA EN ENGLISH FR FRANCAIS

Abana 22 b’ingagi bagiye kwitwa amazina

Yanditswe na Israel Ishimwe
Kuya 12 July 2016 saa 10:56
Yasuwe :

Ku nshuro ya 12, U Rwanda n’amahanga bazifatanya mu muhango kimenyabose, uhuruza abatuye Isi mu birori byo ‘Kwita izina’ abana b’ingagi 22 bavutse uteganyijwe tariki ya 2 Nzeri 2016.

Uyu muhango ukomoka mu muco gakondo w’Abanyarwanda wo kwita izina abana, wakorwaga ku munsi wa munani umwana avutse, watanze umusaruro ntagereranywa kuva watangizwa muri 2005.

Uyu mwaka hazitwa abana 22 baziyongera ku bandi 216 bamaze kwitwa izina guhera icyo gihe, kugeza mu mwaka ushize.

Umuhango wo kwita izina wagize akamaro ko kurengera ingagi zo mu misozi miremire zikomeje kugenda zikendera hirya no hino ku Isi.

Mu Rwanda ho zariyongereye kuko zavuye kuri 320 mu 1989 zikagera kuri 400 muri 2010, bikaba bishoboka ko uyu mubare wazo ushobora kwikuba kabiri kugeza muri 2017.

Nkuko amahanga asanzwe awitabira n’uyu mwaka biteganyijwe ko uzitabirwa n’abantu basaga ibihumbi 20, nk’uko ubushize wari witabiriwe n’abenda kungana na bo.

Umuhango nyirizina ubera mu Kinigi hafi ya Pariki y’Ibirunga, ariko mbere yaho ukaba ubanzirizwa n’ibikorwa bitandukanye birimo ibitaramo by’umuco gakondo w’Abanyarwanda no gutaha imishinga yakomotse ku madovize yinjijwe n’ingagi.

Ibyo bikorwa bizakurikirwa no gusangira ifunguro rizahuza abantu batandukanye bafite aho bahuriye n’urusobe rw’ibinyabuzima, ba mukerarugendo n’abatanga izo serivisi, abakora ibikorwa bya kimuntu n’abandi bizaba tariki ya 27 Kanama muri Kigali Convention Center.

Ku matariki ya 29-30 Kanama hazaba ibiganiro bihuje itsinda ry’ababungabunga ibinyabuzima ryashyizwe muri 2015.

Tariki ya 31 z’uko kwezi hazakorwa urugendo rw’abahanga mu bya siyansi bazaganira n’abantu batandukanye barimo abayobozi ba za pariki, abashakashatsi n’abandi.

Umunsi nyirizina uzarangwa no kwita izina no gususurutsa abazawitabira, tariki ya 2 Nzeri 2016.

Mu bana b’ingagi bazitwa amazina harimo n’ab’impanga, ubusanzwe zidakunze kubaho, kuko kuva iki gikorwa cyatangira bizaba bikozwe ku nshuro ya gatatu kuko byaherukaga muri 2005 na 2012.

Ingagi zigirira akamaro abazituriye kuko leta y’u Rwanda ifata 5% y’amafaranga zinjije agashorwa mu bikorwa bigamije imibereho myiza n’iterambere ry’abo baturage.

Rimwe yifashishwa mu kubaka amashuri yagiye agirira akamaro abana baturiye pariki y’ibirunga bagakura badatekereza kuba abahigi nkuko ba se babayeho kandi ntibigire ikinini bibagezaho, ahubwo bakiga, bamwe muri bo bakaminuza.

Ibitaro, imihanda, ndetse n’ibindi bikorwa remezo bifasha abatuye ako gace guhura bagahahirana n’ibihugu bya Congo Kinshasa na Uganda.

Kwita izina biteza imbere ubukerarugendo bwinjiza amafaranga, kubungabunga ibidukikije n’urusobe rw’ibinyabuzima no kumenyekanisha umuco w’Abanyarwanda.

Abana b'ingagi 22 barimo n'impanga nibo bazitwa amazina uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .