Iyi mibare yo kuva ku wa 1 Mutarama kugeza ku wa 31 Kamena mu 2023, igaragaza ko inyungu y’iyi banki mbere yo kwishyura umusoro yazamutseho 10% kuko mu gihe nk’iki umwaka ushize yari yungutse miliyari 6,5 Frw.

Iyi nyungu I&M Bank Rwanda yabonye mu mezi atandatu ya mbere ya 2023 yaturutse muri miliyari 21,5 Frw iyi banki yinjije muri rusange, zingana n’izamuka rya 4%. Aya mafaranga yaturutse mu nyungu ku nguzanyo iyi banki yatanze, ishoramari yakoze mu mpapuro mpeshamwenda n’ibindi bikorwa bitanga inyungu.

Ibi byose byatumye umutungo rusange w’iyi banki uzamukaho 10%, bikomeza gushimangira imikorere myiza ku isoko ry’ibijyanye n’imari n’amabanki mu Rwanda.

Kugeza ku wa 3o Kamena amafaranga iyi banki ibikiye abakiliya yazamutseho 10%. Ayo ibikiye ibigo bito n’ibiciriritse yo yazamutse ku ijanisha rya 36%, bishimangira icyizere abakiliya b’iyi banki bakomeje kuyigirira.

I&M Bank Rwanda igaragaza ko muri bimwe yashyizemo imbaraga harimo no gukoresha ikoranabuhanga kuko amafaranga agera kuri 78% by’ayahererekanyijwe yose muri iki gihe cy’amezi atandatu hifashishijwe ikoranabuhanga.

Byatumye amafaranga iyi banki ikoresha mu bikorwa byayo nayo azamukaho 26% bitewe n’uko yakoze ishoramari mu bijyanye n’ikoranabuhanga hagamijwe kurushaho guha serivisi nziza abakiliya bayo.

Umuyobozi Mukuru wa I&M Bank Rwanda, Benjamin Mutimura yatangaje ko umusaruro w’iyi banki mu mezi atandatu ya 2023 iwukesha imikorere myiza no kunoza serivisi.

Ati “Umusaruro wacu muri aya mezi atandatu, ugaragaza inyungu ziri mu kwagura ibikorwa bitandukanye, kugira umutungo uhamye ndetse n’umuhate dufite mugutanga serivisi zinoze ku bakiliya bacu.”

Benjamin Mutimura yakomeje avuga ko iyo basesenguye basanga banki ayoboye ifite amahirwe yo gukomeza kubaka umubano urambye n’abakiliya bayo cyane cyane ibigo by’ishoramari bito n’ibiciriritse.

Ati “Tubona hari amahirwe yo kurushaho kubaka umubano mwiza n’abakiliya bacu mu bikorwa by’ubucuruzi dukora, kubaka ubufatanye butanga inyungu ndetse tukaba banki ibigo by’ishoramari bito n’ibiciriritse bigana binyuze mu kunoza serivisi byagenewe ndetse no kubiha amahirwe abifasha gutera imbere no kugera kuri serivisi z’imari.”

Yakomeje avuga ko uretse gukorana n’ibigo by’ishoramari bito n’ibiciriritse, I&M Bank Rwanda yanashyize imbaraga mu gushyiraho serivisi zagenewe abahinzi n’aborozi, urubyiruko na ba rwiyemezamirimo b’abagore.

Ati “Ibi bizashimangira umwanya dufite nk’umufatanyabikorwa mu by’imari hagamijwe iterambere.”

Ati “Tuzakomeza kandi intego twihaye yo gufasha igihugu muri gahunda zijyanye no kuzahura ubukungu ndetse no kwimakaza gahunda zigamije kunoza serivisi zihabwa abakiliya, twibanda cyane mu kuzana ibisubizo muri serivisi z’imari bishingiye ku guhanga udushya, kurushaho gukoresha ikoranabuhanga no gukomeza kubungabunga umubano dufitanye n’abakiliya.”

I&M Bank (Rwanda) Plc yatangiye gukorera mu Rwanda mu 2012, mbere yaho ikaba yari Banki y’Ubucuruzi y’u Rwanda (Banque Comerciale du Rwanda Ltd - BCR). Ni nyuma y’uko yaguzwe n’ikigo cy’ishoramari cya I&M Group Plc.

I&M Group Plc yashinzwe mu 1974, ikaba ibarizwa ku Isoko ry’Imari n’Imigabane rya Nairobi. Ifite ibikorwa muri Kenya, u Rwanda, Uganda, Tanzania n’ibirwa bya Maurice.

I&M Bank Rwanda ni imwe muri Banki zikomeye mu Rwanda