00:00:00 IGIHE NETWORK KN KINYARWANDA EN ENGLISH FR FRANCAIS

Amajyepfo: Abahinzi b’imyumbati bijejwe gukemurirwa ikibazo cyo kuyiburira isoko

Yanditswe na Prudence Kwizera
Kuya 26 Ugushyingo 2021 saa 02:26
Yasuwe :

Abahinzi b’imyumbati bo mu turere dutandukanye two mu Ntara y’Amajyepfo bijejwe gukomeza gufashwa kongera umusaruro no kuwubonera isoko kugira ngo batezwe imbere n’umwuga bakora.

Byavugiwe mu Karere ka Kamonyi ubwo hatangizwaga icyumweru cyahariwe igihingwa cy’umwumbati gifite intego igira iti ‘Kubyaza umusaruro amahirwe y’isoko ry’imbere mu gihugu no hanze ku ruhererekane nyongeragaciro rw’imyumbati’.

Umuyobozi Mukuru w’Ikigo cy’Igihugu gishinzwe iterambere ry’Ubuhinzi n’Ubworozi (RAB) Dr Karangwa Patrick, yavuze ko bari kungurana ibitekerezo n’abahinzi ndetse n’izindi nzego kugira ngo barebere hamwe uko ubuhinzi bw’imyumbati bwarushaho gutezwa imbere.

Ati “Icya mbere ni ugushyira imbaraga mu kuzamura umusaruro kuri hegitari kuko impuzandengo ku gihugu yerekana ko kuri hegitari ukiri hagati ya toni 14 na 15.”

Yakomeje avuga ko hari abahinzi basarura toni eshanu ndetse hari n’ababona izirenga 20 kuri hegitari imwe ariko bishoboka ko bageza no kuri toni 40.

Ati “Imyumvire igomba kubanza guhinduka kuko hari abahinzi bacyibwira ko imyumbati idafumbirwa, ariko abahinzi babona toni nyinshi kuri hegitari barafumbira bagakoresha n’imbuto yizewe. Abahinzi benshi baracyatera ingeri z’ibyo basaruye kandi icyo gihe bizanamo uburwayi.”

Yavuze ko bazakomeza gukorana n’abahinzi ndetse n’abatubuzi b’imbuto kugira ngo mu Rwanda hahingwe imyumbati myiza itanga umusaruro mwiza kandi mwinshi.

Ku kijyanye no kongerera imyumbati agaciro, Dr Karangwa yavuze ko hari ibyo uruganda kwa Kinazi Cassava rukora rukohereza ifu hanze y’igihugu kandi bazakomeza gushaka isoko ryagutse.

Ati “Abantu benshi bazi ko imyumbati igerekwa ku bishyimbo cyangwa igasongwamo ubugari gusa ariko ishobora gukorwamo ibisuguti n’imigati. Hari n’abafata isombe bakayumisha bakayohereza no hanze y’igihugu kandi ni nziza kuko ifite ibyubaka umubiri byinshi. Ibyo ni bimwe mu bishonoka kandi bikomeje kugaraga bitanga icyizere.”

Dr Karangwa yavuze ko bazakomeza gushyira imbaraga mu kongera umusaruro w’imyumbati no gushaka amasomo mu gihugu no hanze.

Bamwe mu bahinzi bitabiriye ibyo biganiro bavuze ko umusaruro w’imyumbati watangiye kwiyongera bitewe n’inyigisho bahabwa na Sendika Ingabo. Bavuga ko inama bari kugirwa bazazifashisha kurushaho kongera umusaruro.

Nyiransabimana Berancille ati “Kuri hegitari twahingagaho ingeri ibihumbi 10 none ubu twabonye uburyo bwo guhingaho ingeri 900 ku buryo ku giti kimwe twezaho ibiro 40. Imbogamizi dufite ni uko tutagira uruganda mu Karere ka Muhanga tukaba tucyiyikorera ku mutwe tukayijyana ku isoko. Icyifuzo ni uko dukeneye isoko tugurishaho kuko isigaye idupfira ubusa.”

Bahimiki Emmanuel wo mu Karere ka Ruhango avuga ko koperative yabo ihinga imyumbati igasarura toni zirenga 50.

Ati “Mbere twasaruraga toni umunani kuri hegitari ariko bitewe n’amahugurwa twahawe dusigaye tubona toni 60. Tugemura umusaruro ku ruganda rwa Kinazi Cassava ariko ntabwo rufite ubushobozi bwo kwakira umusaruro wose.”

Havugiyaremye Felix, Umukozi muri Minisiteri y’Ubucuruzi n’Inganda ukurikirana igihingwa cy’imyumbati n’ibiyikomokaho, yavuze ko ikibazo cy’ibura ry’isoko bakizi kandi batangiye kugikemura.

Ati “Ikibazo turakizi ko hari abahinzi bagaragaza ko bafite imyumbati ariko twagerageje gukorana n’abacuruzi bakura imyumbati hirya no hino kugira ngo babashe kugurira abaturage.”

Yakomeje avuga ko abaguzi babini bari gukorana ari abasanzwe bagura imyumbati muri Tanzanie bakayigurisha ku mumpaka w’u Rwanda na Repubulika Iharanira Demokarasi ya Congo kugira ngo baze gusinyana amasezerano n’abahinzi bo mu Rwanda.

Yavuze ko bari kuganira n’abahinzi kugira ngo bakomeze kwibumbira hamwe mu makoperative kandi n’umusaruro wabo ube mwinshi, bityo abaguzi batazawubura.

Mu gutangiza icyumweru cyahariwe imyumbati barebeye hamwe uko icyo gihingwa cyatezwa imbere
Hifuzwa ko umusaruro wera ku giti kimwe cy'umwumbati wiyongera
Abafite aho bahurira n'ubuhinzi bw'imyumbati bashimye uko ikomeje gutezwa imbere
Havugiyaremye Felix, Umukozi muri Minisiteri y’Ubucuruzi n’Inganda ushinzwe kunoza inzira ibicuruzwa binyuramo cyane cyane akaba akunze gukurikirana igihingwa cy’imyumbati n’ibiyikomokaho
Umuyobozi Mukuru wa RAB, Dr Karangwa Patrick, yavuze ko bari kurebera hamwe uko ubuhinzi bw’imyumbati bwarushaho gutezwa imbere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .