Mu 2021 ni bwo Ikigo cy’Ishoramari cya BK Capital cya Banki ya Kigali (BK), cyatangije Ikigega cyiswe “Aguka Unit Trust Fund.”

Ni ikigega cy’imigabane ihinduka ku ishoramari gihuriza hamwe imisanzu y’abashoramari, kigashora ndetse kikanacunga iyo misanzu mu buryo buri mu izina ryabo ndetse kigasaranganya inyungu mu buryo buhoraho.

Iki kigega cyakira ishoramari ry’abanyamigabane bashyiramo amafaranga yabo bagahabwa imigabane (units), ubundi agashorwa mu bikorwa bibyara inyungu, ikaba ari yo yishyurwa abanyamigabane.

Umuyobozi w’Ishami ry’Ishoramari mu bya Banki mu Kigo cy’Ishoramari cya BK Capital, Siongo Kisoso, yavuze ko Aguka Unit Trust Fund ishyira imbaraga mu kurinda ishoramari ndetse no kongera inyungu binyuze mu ishoramari.

Yagize ati “Ikigega cyabashije kugera ku nyungu ya 10.2% yavuye mu ishoramari ryose. Uretse inyungu ishimishije ndetse no kurinda ishoramari, iki kigega gifite uburyo bworoshye bwo kwinjiramo ndetse no kubikuza bikorwa mu gihe gito.”

Evans Kamau ushinzwe Ubujyanama mu bya Tekinike yavuze ko Aguka Unit Trust Fund ari amahitamo meza y’ishoramari ry’igihe kirekire.

Ati “Gushyira amafaranga muri Aguka Unit Trust Fund buri kwezi mu 2022 ni uburyo bwiza kandi bwizewe bwo kwizigamira by’igihe gito nko mu bihe bikomeye, mu bukwe, mu biruhuko, kugura imodoka, ndetse yanifashishwa no mu kwizigamira by’igihe kirekire nko kuzishyurira abana ishuri cyangwa kwizigamira ukazagura inzu.”

Aguka Unit Trust Fund itanga inyungu kabiri mu mwaka, iyi nyungu ikaba inashobora kwishyurwa mu mafaranga cyangwa se hakagurwamo indi migabane.

BK Capital yatanze inyungu ku banyamigabane ba AGUKA Unit Trust Fund