MINAGRI yasabye abahinzi n’aborozi kongera ingufu mu bikorwa byabo, birinda coronavirus

Yanditswe na Twarabanye Venuste
Kuya 24 Werurwe 2020 saa 11:52
Yasuwe :
0 0

Minisiteri y’Ubuhinzi n’Ubworozi (MINAGRI) yatangaje ko ibikorwa by’ubuhinzi n’ubworozi, gusarura, kugura, gutunganya umusaruro no kuwugeza ku isoko bigomba gukomeza, isaba inzego z’ibanze gukoresha indangururamajwi n’ubundi buryo bwose bushoboka abahinzi bakamenya ko bagomba guhinga ubuso bwose buhingwa.

Itangazo MINAGRI yashyize hanze ku itariki 23 Werurwe 2020 rigaragaza ko ibikorwa by’umuhinzi n’ubworozi bigomba gukomeza kugira ngo hatazagira ikibazo cy’ibiribwa kibaho bikubitiyeho n’ibihe bikomeye byo kwirinda coronavirus.

Iyo Minisiteri itangaza ko serivisi zo kubona imiti n’ibiribwa by’amatungo, inyongeramusaruro, kugura no gukusanya umusaruro w’ubuhinzi n’ubworozi, iyamamaza buhinzi n’ubworozi n’inganda zitunganya ibiribwa bitagomba guhagarara.

Itangazo ryashyizweho umukono na Minisitiri Dr. Geraldine Mukeshimana rivuga ko Farumasi z’imiti y’amatungo zirakomeza gukora, isaba abayicuruza bakeneye kujya kuyirangura i Kigali kubisabira uruhushya rubigaragara ku Mirenge bakoreramo.

Inganda zisanzwe zemerewe gukora ibiryo by’amatungo zasabwe gushyiraho gahunda y’abakozi bake mu buryo bikomeza gukorwa bikagezwa ku maguriro ari hirya no hino mu Turere aho aborozi bakomeza kubigura.

Inganda zikeneye kugura ibikenerwa mu gukora ibiryo by’imvange by’amatungo i Kigali zibisabira uruhushya rw’inzira ku buyobozi bw’Akarere zikoreramo.

Ni mu gihe kandi ku bijyanye n’inyongeramusaruro aho zicururizwa hose hakomeza gukora mu rwego rwo kugeza imbuto z’indobanure n’ifumbire ku bahinzi hagamijwe kongera umusaruro.

Mu gucuruza no kugura inyongeramusaruro abantu bagomba gukomeza amabwiriza yo kwirinda. Umucuruzi asabwa kuba yambaye agapfukamunwa n’uturinda ntoki, abaguzi bakinjira umwe umwe kandi bakazirikana intera nibura ye metero imwe hagati yabo.

Abacuruzi b’inyongeramusaruro bakeneye kujya kurangura ku bubiko buri hafi yabo basabwa gukorana n’ubuyobozi bw’Imirenge baherereyemo kugira ngo bahabwe uburenganzira bwo kujyayo.

Amakamyo atwara inyongeramusaruro n’imodoka zitwara umwuka ubika intanga byemerewe gukomeza ingendo ariko ntizitware abantu barenze babiri. Ibyo bigakorwa no ku zijyanye ibyatunganyijwe ku isoko.

Muri iryo tangazo MINAGRI yasabwe gukangurira abahinzi guhinga ubuso bwose.

Yagize iti “ Hakoreshejwe indangururamajwi n’ubundi buryo bwose bushoboka harimo n’ubw’ikoranabuhanga mu Midugudu no mu Tugari, abakozi bashinzwe ubuhinzi ku nzego zose barasabwa gukomeza gufasha abahinzi babagezaho amakuru yose bakenera, babashishikariza guhinga ubuso bwose kandi neza hakoreshwa inyongeramusaruro ariko banabagezaho ubutumwa bwo kwirinda coronavirus.”

Inganda nini, ibigo na Koperative bifite imirima minini cyane cyane abafite inganda z’ icyayi, isukari, amata, umuceri, ikawa n’amafu zasabwe gusigarana abakozi bake ariko batuma imirimo ikomeza. Abari mu bikorwa byo gusarura no gutubura imbuto nabo basabwe gukorana n’imirenge kuburyo bahabwa ibyangombwa bibemerera gukomeza iyo mirimo.

Minisiteri y'Ubuhinzi n'ubworozi yasabye inzego z'ibanze gufasha abahinzi kudakererwa ihinga kandi bagahinga ubuso bwose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza