Iri murikagurisha riri kuba ku nshuro ya gatanu, ryatangijwe ku wa 22 Ugushyingo 2019 i Gikondo muri Expo Ground.

Minisitiri Hakuziyaremye ubwo yaritangizaga yavuze ko uko imyaka igenda yicuma abamurika ibikorerwa mu Rwanda biyongera ndetse n’ireme ry’ibyo bamurika rikazamuka.

Yagize ati “Uko imyaka igenda iza abantu baza kumurika ibikorerwa mu Rwanda bagenda biyongera ariko ugasanga n’ibyo bamurika ubwiza bwabyo n’ikoranabuhanga ririmo bigenda byiyongera.”

Yongeyeho ko nka leta yakoze ibishoboka birimo kugabanya imisoro kugira ngo harebwe uburyo ikibazo cyakunzwe kugaragazwa na benshi cy’uko ibyakorewe mu Rwanda bihenda cyakemuka.

Ati “Ibiciro by’ibikorerwa mu Rwanda nabyo hari abajya bavuga ko babona bihenze cyane ariko bagomba no kureba n’agaciro k’ababikoze. Ikindi ni uko twagiye dufasha n’abakora ibikorerwa mu Rwanda tubakuriraho imisoro ku bikoresho by’ibanze bakura hanze.”

Iri murikagurisha ryitabiriwe n’abamurika bo mu nzego zitandukanye zirimo ikoranabuhanga, inganda, ubuhinzi n’ubworozi, ubugeni n’izindi.

Nibwo bwa mbere rifite umwihariko w’ibikoresho birimo iby’ishoramari rikomeye u Rwanda rwungutse mu myaka ya vuba nk’imodoka zo mu Ruganda rw’Abadage ruteranyiriza imodoka za Volkswagen mu gihugu, telefoni za Mara Phones, imodoka na moto bikoresha amashanyarazi n’ibindi.

Umuyobozi mu Ruganda rwa Trust Industries rukora ibikoresho by’isuku bya Clear, Busingye Grace, yavuze ko Abanyarwanda bamaze kumenya agaciro k’ibikorerwa iwabo.

Ati “Abanyarwanda twamenye ukuri, twamenye ko ibikorerwa mu Rwanda bifite ubwiza n’agaciro twihesha agaciro nk’Abanyarwanda.”

Imurikagurisha rifatwa nk’umwanya mwiza ku bacuruzi wo kwerekana ibyo bakora mu Rwanda n’i mahanga.

Umuyobozi w’Urwego rw’Abikorera mu Rwanda (PSF), Robert Bapfakurera, yavuze “Iri murikagurisha rizamenyekanisha ibyo abantu bakora, abantu bashobore kubona amasoko ari ayo mu Rwanda n’ayo hanze.”

Minisitiri Hakuziyaremye yijeje abikorera ko bazakomeza gufashwa ku buryo bajya babona inguzanyo biboroheye kugira ngo ibyo bakora bigere no ku isoko ryo hanze hifashishijwe Ikigega cya Export Growth Fund.

EGF ibarizwa muri Banki y’u Rwanda Itsura Amajyambere ifasha n’abagitangira ishoramari bashaka amasoko hanze.

Imurikagurisha ry’Ibikorerwa mu Rwanda ryitabiriwe n’abamurika serivisi n’ibicuruzwa bagera kuri 400 biteganyijwe ko rizasozwa ku wa 4 Ukuboza 2019. Kuryinjiramo harifashishwa uburyo bw’ikoranabuhanga bwo kugura amatike hifashishijwe telefoni (Mobile Money).

Imyaka isaga itatu irashize Guverinoma y’u Rwanda itangije gahunda Made in Rwanda nk’uburyo buzafasha kugabanya umubare mwinshi w’ibitumizwa mu mahanga watumaga ubukungu bw’igihugu budindira.

Mu mezi atandatu abanza ya 2019, muri rusange ibicuruzwa byoherezwa mu mahanga byiyongereye ku gipimo cya 58.1%. Umusaruro uturutse ku byoherezwa mu mahanga wazamutse ku kigero cya 7.5% ugera kuri miliyoni $577.8, uvuye kuri miliyoni $537.3.

Minisitiri w’Ubucuruzi n’Inganda, Hakuziyaremye Soraya, yatangije ku mugaragaro Imurikagurisha ry’Ibikorerwa mu Rwanda

Minisitiri Hakuziyaremye yagize umwanya wo gusura abamurika ndetse anasobanurirwa ibyo bakora

Minisitiri w’Ubucuruzi n’Inganda, Hakuziyaremye Soraya n'abandi bayobozi bakimara gufungura imurikagurisha ry'ibikorerwa mu Rwanda

Minisitiri w’Ubucuruzi n’Inganda, Hakuziyaremye Soraya aganira n'Umuyobozi Wungirije w'Ikigo cy'Igihugu cy'Iterambere (RDB), Niyonkuru Zephanie

Ubuki bwa Gishwati nabwo buri mu bimurikwa muri iyi expo

Ubwiza bw'ibikorerwa mu Rwanda bugenda bwiyongera umunsi ku munsi

Umukozi wa Volkswagen Rwanda yereka abitabiriye expo imikorere y'imodoka ikoresha amashanyarazi iherutse gushyirwa ku isoko

Umwe mu bamurika asobanurira Minisitiri Hakuziyaremye ibyo bakora

Uruganda rwa Mara Phones ruherutse gufungura imiryango mu Rwanda narwo ruri ku murika telefoni zikorerwa mu gihugu

Ikawa ihingwa ndetse ikanatunganyirizwa mu Rwanda nayo yamuritswe

Iri murikagurisha ririmo ibikoresho bitandukanye bikorerwa mu Rwanda

Ufaco Vlisco Ltd ni bamwe mu bakora imyenda bitabiriye iri murikagurisha

Kompanyi ya Kalka Partener Ltd nayo yiyemeje kongerera agaciro urubahu rw'inturusu

Minisitiri Hakuziyaremye yasobanuriwe ibikorwa bya Kompanyi ya Elisabeth Golf Apartments

Minisitiri Hakuziyaremye Soraya yitegereza imwe mu myenda ikorerwa mu Rwanda

Abitabira iri murikagurisha bashobora kubona ibikoresho by'isuku bya Clear ku biciro byo hasi

Hateguwe n'uburyo bwo kwidagadura ku bana bazitabira iri murikagurisha

Ibikorwa by'ubugeni nabyo ntibyatanzwe muri iri murikagurisha ry'Ibikorerwa mu Rwanda

Minisitiri w’Ubucuruzi n’Inganda, Hakuziyaremye Soraya, asobanurirwa ibikoresho bitandukanye

Ku nshuro ya mbere, Sinema zakozwe n'Abanyarwanda zamuritswe muri Made in Rwanda Expo

Imodoka ziswe e-Golf z’Uruganda Volkswagen zikoresha amashanyarazi zagejejwe ku isoko ry'u Rwanda ziri mu zamuritswe muri Made in Rwanda Expo

Made in Rwanda Expo iri kuba ku nshuro ya gatanu

Sosiyete ya Airtel-Tigo iri gutanga serivisi zayo zitandukanye zijyanye n'itumanaho

Imurikagurisha ry’Ibikorerwa mu Rwanda ryitabiriwe n’abamurika serivisi n’ibicuruzwa bagera kuri 400

Ingazi ziteye amabengeza zikoze mu mbaho nazo wazibona

Ikigega gitanga ingwate ku mishinga mito n'iciriritse, BDF, kiri gusobanura amahirwe cyageneye urubyiruko

Nta nzara iharangwa kuko ibyo kurya bihari ku bwinshi

Sosiyete y'Itumanaho ya MTN Rwanda nayo ntiyacikanwe n'imurika ry'ibikorerwa mu Rwanda

Amafoto: Niyonzima Moses