Miss Muheto yabaye Nyampinga w’u Rwanda afite umushinga wo guteza imbere umuco wo kuzigama mu rubyiruko binyuze muri 'Igiceri Youth Program'.

Kuri iki Cyumweru tariki 20 Ugushyingo 2022, Miss Muheto yitabiriye ubukangurambaga bwateguwe na Caritas Byumba, bwo gushishikariza urubyiruko kugira umuco wo kuzigama no kwihangira imirimo, kugira ngo bizarufashe kwiteza imbere rwirinde ingeso mbi n’ibyaha byarujyana muri gereza.

Ni igikorwa cyabereye muri Groupe Scolaire Notre Dame du Bon Conseil Byumba cyitabirwa n’abayobozi batandukanye n’ibindi bigo by'amashuri byegereye ahabereye igikorwa bose babarirwa muri 900.

Miss Nshuti Muheto Divine yasabye urubyiruko kwizigamira nubwo bahera ku giceri cy'Ijana.

Ati "Iyo ushaka kubaho udasaba amafaranga bigusaba kwizigama ukamenya ko ushobora gukenera gukoresha amafaranga n'ejo hazaza, n’iyo wakwizigama n'igiceri cy'ijana byagufasha".

Umuyobozi wa Caritas ya Byumba, Padiri Nzabonimpa Augustin, ashimangira ko gutanga amahugurwa ku rubyiruko babishyize mu nshingano, yaba abiga mu mashuri yisumbuye ndetse n'abafungiwe muri za gereza.

Padiri Nzabonimpa ashimangira ko nka Kiliziya Gatolika bafite urubyiruko mu bakirisitu bayoboye, bityo ko gutekereza ku iterambere ry’urubyiruko basanga ari imwe mu nzira zabajyana aheza, kuruta uko bakwishora mu biyobyawenge cyangwa mu mico ituma bafungwa.

Umuyobozi w'Akarere ka Gicumbi wungirije ushinzwe ubukungu, Uwera Parfaite, yasabye urubyiruko rwiga muri Notre Dame du Bon Conseil Byumba, gutekereza uburyo bakoresha neza ubushobozi bucye bafite nubwo nta kazi kabinjiriza bakora.

Ati “N’iyo wakwizigama igihumbi cyangwa igiceri cy'ijana mu yo wahawe n'ababyeyi, agufasha mu minsi ikurikiyeho, kwizigama ntibisaba kuba ufite amafaranga menshi, ahubwo bisaba kwigomwa ntusesagure".

Bamwe mu banyeshuri bitabiriye ubukangurambaga bwo kwizigamira mu rubyiruko, bashimye impanuro za Miss Muheto, bamusaba kubakorera ubuvugizi ngo hashyirweho ikigega cy'urubyiruko kibafasha kubona aho bizigamira byabafasha.

Uwitwa Manizayabayo yagize ati “Kwizigamira turabyumva ariko na none tubonye ikigega kidusunika byadufasha kubona uko twizigama neza".