Nyaruguru: Abahinzi b’icyayi 600 bamaze kugurizwa Miliyoni 450 Frw bazishyura nta nyungu

Yanditswe na Prudence Kwizera
Kuya 23 Ukwakira 2019 saa 06:34
Yasuwe :
0 0

Umushoramari wo mu gihugu cy’u Bwongereza witwa Sir Ian Wood, amaze kuguriza abahinzi b’icyayi barenga 600 Miliyoni 450 Frw bazamwishyura nta nyungu icyayi nikimara kwera batangiye gusarura.

Uwo mushoramari bazaniwe na Perezida Paul Kagame; aguriza abo bahinzi amafanga yo guhinga icyayi binyuze mu mushinga we witwa SCON (Services Company Outgrowers Nyaruguru Ltd).

Uwo mushinga wo kubafasha guhinga icyayi bahabwa inguzanyo bazishyura nta nyungu watangiye gushyirwa mu bikorwa mu mwaka wa 2017.

Umuyobozi wa SCON mu Karere ka Nyaruguru, Hategekimana Vincent, yabwiye IGIHE ko mu myaka ibiri bamaze kuguriza abahinzi barenga 600.

Ati “Kugeza ubu hamaze guhingwa ubuso bwa Hegitari 500 z’icyayi; amafaranga amaze gutangwa ni miliyoni 450; tumaze kugira abahinzi barenga 600 dukorana.”

Hategekimana avuga ko bakomeje ibikorwa byo kwegera abaturage no kubaganiriza kugira ngo bagurizwe ayo mafaranga bahinge icyayi kuko bizabagirira akamaro.

Bamwe mu bahinzi b’icyayi bamaze gufata iyo nguzanyo bavuga ko icyo bahinze cyatangiye kwera mu myaka ibiri kandi batangiye kubona amafaranga agikomokaho.

Uwizeyimana Anne Marie wo mu Murenge wa Kibeho avuga ko yahawe inguzanyo y’ibihumbi 450 Frw mu mwaka wa 2017 kandi icyayi cyatangiye kwera.

Ati “Mu myaka ibiri icyayi cyanjye cyatangiye kwera; ubu nsarura kabiri mu kwezi nkakuramo ibihumbi birenga 50 Frw. Ubwa mbere bari bampaye inguzanyo y’ibihumbi 600 Frw; ndebye uko icyayi cyanjye kimeze neza ndumva mu gihe kiri imbere nzaba natangiye kurya ku mafaranga yacyo.”

Ayabagabo Jean Damascene wo mu Murenge wa Mata yavuze ko umushinga wa SCON ukimara kuza atawitabiriye kuko atabyumvaga neza ariko amaze kubona inyungu bagenzi be bari gukuramo yahise ava ku izima.

Ati “Maze kubona inyungu bagenzi banjye batangiye kubona n’uburyo icyayi cyabo kimeze neza nahise njya kuri SCON gusaba ko nanjye banguriza. Ubu bampaye Miliyoni 380 Frw.”

Ubuyobozi bwa SCON buvuga ko n’ubwo abaturage batangiye kubona umusaruro mu gihe gito, amasezerano avuga ko bazatangira kwishyura nyuma y’imyaka ine kandi bizakorwa bityo.

Icyayi nikimara kwera ku bwinshi abo bahinzi bazajya bagurisha umusaruro wabo ku ruganda rwa Unilever rugiye kubakwa n’ikigo gikomeye cyo mu Bwongereza.

Usibye kubaguriza amafaranga, abahinzi bigishwa n’uburyo bwo guhinga icyayi no kucyitaho mu cyitwa ‘Ishuri ry’abahinzi b’icyayi mu murima’.

Umuyobozi wungirije ushinzwe iterambere ry’ubukungu mu Karere ka Nyaruguru, Gashema Janvier, yavuze ko uwo mushinga wo guhinga icyayi watangiye guhindura imibereho y’abaturage.

Ati “Mbere na mbere ndashimira Perezida wa Repubulika watekereje kuzana imishinga nk’iyi ifatika ihindura imibereho myiza y’abaturage b’Akarere ka Nyaruguru. Icyayi ni amafaranga; niba umuntu ahinga hegitari imwe akajya asarura amafaranga ari hejuru y’ibihumbi 150 ku kwezi, ni amafaranga menshi.”

Mu Karere ka Nyaruguru hagaragara imisozi myinshi yamezeho ishinge kandi ba nyirayo bavuga ko nta cyo ibamariye kuko ni yo bayahiriye amatungo itabasha kubora ngo ivemo ifumbire.

Bitegangijwe ko mu myaka 10 hazaba hamaze kugurizwa abaturage 7 000 bahinga ku buso bwa hegitari 3 400.

Abaturage bo mu Karere ka Nyaruguru bavuga ko batangiye kubyaza umusaruro inguzanyo bari guhabwa
Umuyobozi wa SCON mu Karere ka Nyaruguru, Hategekimana Vincent, avuga ko bamaze kuguriza abaturage barenga 600 miliyoni 450 Frw
Uwizeyimana Anne Marie avuga ko icyayi yahinze muri 2017 cyatangiye kwera kandi asigaye akuramo amafaranga ibihumbi 50 Frw ku kwezi
Imisozi yo mu Karere ka Nyaruguru yari yaramezeho ishinge bageze kure bayiteraho icyayi
Abahinzi bo mu Karere ka Nyaruguru bafata icyayi nk'inka idateka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza