Ubuyobozi bw’umuryango uharanira iterambere ry’abatuye i Nyabimata (Association pour le Development de Nyabimata/ADENYA) mu Karere ka Nyaruguru, buvuga ko buhangayikishijwe n’urugomero rw’amashanyarazi rwawo rwafunzwe.

Urwo rugomero ngo rumaze igihe kiyingayinga umwaka rudakora, none banki ya Kigali (BK) igiye kuruteza cyamunara kuko muri miliyari imwe na miliyoni 500 yarwubatse harimo inguzanyo yayo ingana na miliyoni 500 itarishyurwa.

Urwo rugomero ngo rwari rwubatswe mu mushinga wa ENNY (Energy Nyaruguru LTD), ADENYA ihuriyeho na sosiyete yo mu Budage yitwa CARERA.

Umuyobozi wa ADENYA, Nkuriyimana Gabriel yatangarije IGIHE ko uru rugomero rwafunzwe mu Ukwakira 2014, rukaba rwarafunzwe n’umudage witwa Ingo Kochendörfe ashyize imibare itazwi (code) mu mashini yarukoreshaga.

Guhera icyo gihe rwahise ruhagarara gutanga amashanyzrazi. Uwo mudage ibyo ngo yabikoze kubera ko sosiyeti yitwa CARERA yubatse uru rugomero yari ifite ideni ry’ibikoresho muri Ingo Kochendörfe, ringana n’ibihumbi 240 by’amayero, ni ukuvuga asaga miliyoni 200 z’amafaranga y’u Rwanda.

Ubuyobozi bwa ADENYA bukomeza buvuga ko buri kwezi bahomba amafaranga angana na miliyoni 30 z’amafaranga y’u Rwanda kandi ngo umwenda bafitiye BK ukomeza kwiyongera none ukaba ugeze kuri miliyoni 600.

Iryo shyirahamwe rinafite ubwoba ko BK izateza cyamunara urwo ruganda kuri make, dore ko yababwiye ngo nibona uwayiha miliyoni 500 izarumuha, kandi rwarubatswe na miliyari imwe na miliyoni 500.

Urugomero rwahise rufunga bidateye kabiri

Kuri ibi rero, umuyobozi wa ADENYA, Nkuriyimana Gabriel yabwiye IGIHE ko baba bahombye cyane, ikindi kandi bafite ubwoba ko imwe mu mitungo y’iryoshyirahamwe na yo ishobora kubigenderamo, BK niramuka itabonye amafaranga yishyurwa umwenda wose wa miliyoni 600.

Umuyobozi wungirije w’inama y’ubuyobutegetsi mu kigo cy’igihugu gishinzwe ingufu (Rwanda Energy Group/REG), Madamu Rwema Alice, yabwiye Itangazamakuru ko bagiye kubafasha mu kubahuza bakumvikana n’uwafunze urwo rugomero hanyuma rugasubukura imirimo yarwo bitarenze ukwezi gutaha kwa Nzeli.

Yongeraho kandi ko gufungwa kw’uru ruganda byagize ingaruka kuko amashanyarazi adahagije muri ako gace rwubatsemo.

Muri Gicurasi uyu mwaka, Umuyobozi muri Minisiteri y’Ibikorwa Remezo ushinzwe Ingufu, Nyamvumba Robert, yatangarije Kigali To Day ko iyo Minisiteri na yo yamenye iby’icyo kibazo ariko igasanga itabyivangamo kuko ari amasezerano yakozwe hagati y’abantu bose bigenga, gusa ngo yari irimo kugerageza guhuza impande zose zirebwa n’icyo kibazo hanyuma ngo ikagerageza kuzumvikanisha.

Uru rugomero rw’amashanyarazi rwitwa ‘Mazi Meru’, rwubatse mu Murenge wa Nyabimata mu Karere ka Nyaruguru.

Imirimo yo kurwubaka yatwaye miliyari imwe na miliyoni 500 nk’uko ubuyobozi bw’umuryango ADENYA bubitangaza, rwaratangiye gukora muri Gicurasi 2012 rukaza gufungwa muri Ukwakira 2014, rukaba rufite ubushobozi bwo gutanga amashanyarazi angana na kilowati 500.

Amateka y’iryo deni rigiye gutuma urwo rugomero rutezwa cyamunara

Muri Gicurasi uyu mwaka Nkuriyimana, Umuyobozi wa ADENYA yatangarije Kigali to Day ko nyuma yo gushingwa kwa sosiete ENNY LTD, umunyamigabane CARERA, yahawe inshingano zo gushaka ibikoresho nkenerwa mu Budage kuko ari ho afite icyicaro.

ENNY ngo yanemeye ko hanafungurwa konti izajya inyuzwaho amafaranga azagura ibyo bikoresho, kimwe n’andi mafaranga CARERA yari kuba ikeneye nk’uko yari yabyijeje abandi banyamigabane.

Mugushaka ahazagurwa ibikoresho, CARERA ngo yamenyesheje abagize ENNY ko nyuma y’inyigo ya nyuma y’umushinga, basanze hazagurwa imashini za “Turbines” ebyiri (2 ) aho kuba imwe nk’uko byari biteganijwe mu nyigo ya mbere.

Kubera ko amafaranga ENNY yari yizeye yari ayo kuzagura ‘turbine’ imwe gusa, CARERA yayibwiye ko uwo bahaye isoko ryo gukora iyo mashini ya mbere, yemeye kuzakora n’iya 2, akazayibakopa, ikazishyura yatangiye kuyibyaza umusaruro (amashanyarazi).

Ibyo rero ngo byatumye ENNY yemera ko yagura izo mashini zombi, kuko zatumaga yongera n’umusaruro w’amashanyarazi zizatanga.

Gusa ngo uko imyaka yagiye ihita, ibintu byagiye bihinduka, CARERA ikerekana ko hakenewe amafaranga yo kugura ibyo bikoresho, arenze kure ayateganywaga mbere, bigera aho ndetse ifata icyemezo cyo kuguza ama euros 300.000, ngo ikunde irangize neza imirimo y’ubwubatsi, inavuga ko imashini (turbines) zombi zamaze kwishyurwa.

Uko urugomero rwaje gufungwa

Ubuyobozi bwa ADENYA buvuga ko mu mpera z’umwaka wa 2011 ari bwo ibyo bikoresho byaje, bikajyanwa aho bigenewe, ndetse bikanatangira kugeragezwa, nyuma bitangira kubyara umusaruro w’amashanyarazi muri Gicurasi 2012.

Ngo muri Nyakanga 2014 babonye integuza (Warning) yiyerekana kuri ‘tableaux’ z’izo mashini, ivuga ko badafite uburenganzira bwo kuzikoresha izo mashini, bugira buti “no licence...”

ADENYA ibajije uwabagurishije izo mashini ari we INGO Kochendörfer, yasubije ko ari yo yabikoze yibutsa ko hari umwenda aberewemo wa turbune ya 2 zitishyuwe, zifite agaciro k’ama Euros 240.000, ndetse ahita anabaha ibyumweru 2 ngo abe yamaze kwishyurwa bitaba ibyo ahite afunga imashini burundu.

Mu gusaba ibisobanuro, ni bwo ADENYA yabwiwe ko CARERA yari ibahagarariye ari yo izi neza iby’uwo mwenda, bandikira iyo sosiyete bayisaba ibisobanuro byawo, ariko yo ntiyasubiza.

ADENYA ivuga ko nyuma yo guhura n’izo ngorane ngo bitabaje ubuyobozi bw’inzego z’ibanze, ndetse na Minisiteri y’Ibikorwa Remezo, ubu ngo bakaba bategereje ubufasha buzaturuka muri izi nzego, ariko urwo rugomero rukaba rugiye gutezwa cyamunara ubwo bufasha butarabageraho.

Mihigo Jean Baptiste