Uruganda rw’imyumbati rwa Kinazi rusanga amabwiriza mashya ya RSB aje gukemura byinshi

Yanditswe na Akayezu Jean de Dieu
Kuya 9 Gashyantare 2019 saa 01:56
Yasuwe :
0 0

Umuyobozi w’Uruganda rutunganya ifu ikomoka ku myumbati rwa Kinazi (Kinazi Cassava Plant), Nsanzabaganwa Emile, yavuze ko amabwiriza mashya yamuritswe na RSB aziye igihe kuko azatuma abahinzi bazajya babona imbuto zujuje ubuziranenge.

Yabitangaje nyuma y’aho kuri uyu wa Kane, Ikigo cy’igihugu gitsura ubuziranenge, RSB, cyamuritseamabwiriza 2455 agamije kurengera ibikorerwa mu Rwanda birimo n’imbuto y’imyumbati.

Mu Rwanda, imyumbati ni igihingwa gifata umwanya wa kabiri nyuma y’urutoki kuko ku mwaka ihingwa kuri hegitari ziri hagati y’ibihumbi 200 na 300, ni ukuvuga hafi 20% y’ubutaka buhingwa.

Aya mabwiriza yashyizweho azibanda ku kureba ko imbuto zituburwa zujuje ubuziranenge, hashingiwe ku bipimo bizwi.

Umuyobozi w’Uruganda rwa Kinazi Cassava Plant, Nsanzabaganwa, yavuze ko aya mabwiriza aziye igihe kandi azabafasha abahinzi n’abaguzi b’ifu muri rusange.

Avuga ko aya mabwiriza azafasha ibigo bya leta n’abikorera gutanga amasoko bafite ibyo bagenderaho bijyanye n’ubuziranenge bw’ibikenewe, bityo batandukane n’ibihombo baterwa no kugura ibitujuje ubuziranenge.

Ati “Ubusanzwe hari ubwo nk’ibigo by’amashuri byaba ibya leta cyangwa ibyigenga n’abandi bafite amahoteli n’ahandi hahurira abantu benshi, hari igihe usanga mu mahahiro atandukanye bahahiramo, hari ubwo ibipimo by’ubuziranenge biba bititaweho, muri rusange biba bifite ingaruka mbi ku buzima bw’abantu, ariko ku bigo bya leta ho iryo tegeko riba ryirengangijwe”.

Kuva mu ntangiriro za Gashyantare uyu mwaka, uruganda rwa Kinazi Cassava Plant rwagabanyije igiciro cy’ifu rukora icuruzwa ku isoko ry’u Rwanda, iba amafaranga 400 Frw ku kilo ivuye kuri 1600 Frw igihe imyumbati yari yarabuze, ngo bigaterwa n’uko imyumbati itakibura.

Uruganda rwa Kinazi rushimira RSB kuko aya mabwiriza y’ubuziranenge, afasha kwizera ko umusaruro uzakomeza kuboneka bitewe no kubungabunga imbuto.

Ibi byiyongera ku mbaraga nyinshi Minisiteri y’ubuhinzi n’ubworozi yashyizemo ngo umusaruro w’imyumbati wongere ubeho no gushyiraho uburyo abakoresha ibikorerwa mu Rwanda babyizera, bikanabarinda ibyabagiraho ingaruka mu buzima bwabo.

Ifu y'imyumbati ikorwa n'uruganda rwa Kinazi Cassava Plant
Umuyobozi Mukuru w'Uruganda rwa Kinazi Cassava Plant, Nsanzabaganwa Emile yashimye amabwiriza mashya yashyizweho na RSB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza