Minisitiri w’Ubucuruzi n’inganda, Francois Kanimba, kuri uyu wa mbere tariki ya 27 Gicurasi, i Kigali, mu biganiro yagiranye n’abashoramari bakomoka mu gihugu cy’u Buhinde, bamwe muri bo bahise bamwemerera gushora imari yabo mu Rwanda.

Ibi biganiro byateguwe n’ikigo cy’igihugu gishinzwe iterambere (RDB: Rwanda Development Board) mu rwego rw’icyumweru cya gahunda ya ’’Indian Show 2013’’ cyahariwe gukangurira abashoramari b’Abahinde gushora imari mu Rwanda, babereka amahirwe ahari.

Minisitiri Kanimba yagaragaje ko Guverinoma y’u Rwanda izabafasha gukora ibikorwa byabo bibyara inyungu nibaramuka bashoye imari yabo mu Rwanda. Yagize ati ’’Abahinde bagize uruhare rugaragara mu bukungu bw’u Rwanda, yaba mbere ya Jenoside yakorewe Abatutsi na nyuma yaho. Hari abarokotse bakomeza ibikorwa byabo, hari n’abandi bandikishije sosiyete zabo mu Rwanda.’’

Abahinde 30 baje kureba uko batangiza ibikorwa byabo mu Rwanda, bari mu masosiyete atandukanye. Batatu muri bo bahise bemerera minisitiri w’Ubucuruzi n’inganda kuzasubira iwabo bamaze kwandikisha ibikorwa byabo.

Nka Haresh M. Mehta, yemeye kuzashora imari mu gucukura amabuye y’agaciro mu Rwanda. Abandi bakaba bazashora imari mu ikoranabuhanga, ibikorwa remezo, ubuzima, ubukerarugendo n’ibindi. Haresh M. Mehta yagize ati ’’Twumvise ko u Rwanda rugifite ibintu bike rwohereza hanze, ni yo mpamvu twiyemeje kuza gushinga inganda n’ibikorwa remezo kugira ngo tubyongere.’’

Tony Nsanganira ukuriye ibikorwa mu kigo cy’igihugu gishinzwe iterambere, avuga ko batirengagije abandi banyamahanga, ahubwo ko bahisemo Abahinde banahereye ku ruhare rwabo basanzwe bagira mu ikoranabuhanga n’ibindi bikorwa by’ubukungu mu Rwanda.

Abahinde banavuze impamvu biyemeje gushora imari yabo mu Rwanda. Dinesh C. Joshi uzashora imari mu maresitora, agira ati ’’Twakunze u Rwanda kuko rutandukanye n’ibindi bihugu byo ku mugabane w’Afurika; haratuje no kuba nta ruswa ihari, ariko cyane cyane umutekano.’’

Aba Bahinde baracyafite icyumweru cyo kuzenguruka mu gihugu bareba aho bashora imari yabo. Mu biganiro byakozwe harimo kandi n’abashoramari b’Abanyarwanda.