Ni uruganda rwubatswe mu Cyanya cy’Inganda cya Bugesera. Rufite ubushobozi bwo gukora ibikoresho bingana na toni zigera kuri eshanu ku munsi. Ukoze imibare ubona ko ari toni zirenga 1800 ku mwaka.

Rukora ibikoresho birimo ibishyirwa ku nkuta bizwi nka ‘wall panel’, amatiyo y’amazi atandukanye n’ibindi byifashishwa mu gucyesha inzu.

HQ-Aqua Plastic Ltd ni uruganda rwashinzwe na Mungwarareba Jean Bosco, umushoramari usanzwe utumiza ibikoresho by’ubwubatsi. Iri ku buso bwa hegitari imwe. Inzu z’uru ruganda ziri ku buso bwa metero kare 6000 ariko bagakoresha 50%.

Ubwo yari mu muhango ubanziriza uwo gutaha ku mugaragaro uru ruganda, berekana umwihariko warwo, Mungwarareba yavuze ko nk’umuntu wakunze kugenda mu mahanga cyane, yabonye ikoranabuhanga ibyo bihugu bigezeho na we yiyemeza kurigeza mu Rwanda nk’uburyo bwo guteza imbere gahunda ya ‘Made In Rwanda’.

Mungwarareba amaze imyaka 25 atumiza ibikoresho by’ubwubatsi ku buryo ku mwaka atumiza nka kontineri 80.

Yavuze ko ashaka kongera ubushobozi uru ruganda ku buryo mu myaka mike iri imbere ruzaba rutunganya nibura ibigera kuri 30% by’ibyo yatumizaga.

Ati “Dufite ubushobozi bwo gukora ibikoresho by’ubwubatsi bingana na toni ziri hagati y’enye n’eshanu. Dushaka ko ahubwo natwe tuzajya twohereza mu mahanga ibikoresho bigezweho ku buryo ayo madevise yinjira mu gihugu. Twizera ko mu gihe gito cyane tuzabigeraho byuzuye.”

Mungwarareba yavuze ko abantu bashishikarira kugura ibyakorewe mu Rwanda kuko byinshi bifite ibyemezo by’ubuziranenge ku buryo bishobora kugurishwa ku rwego mpuzamahanga.

Umukozi mu Rugaga rw’Abikorera, Callixte Kanamugire, yavuze ko u Rwanda rwakoze uko rushoboye ngo rufashe abashoramari kurushoramo imari binyuze mu gushyiraho ibikorwaremezo.

Yashimangiye ko gahunda yo guteza imbere ibikorerwa mu Rwanda, igira uruhare mu gutanga akazi kuri benshi no kuzamura ubukungu bw’igihugu.

Ati “Ni ibikoresho biri ku rwego rwo hejuru. Ibikorerwa iwacu bigomba kuba byujuje ubuziranenge bishobora guhangana n’ibiboneka ku masoko mpuzamahanga. Ni ibintu u Rwanda rwitayeho cyane. Rwashyizeho laboratwari nyinshi kugira ngo ibikorerwa mu Rwanda bigere ku masoko mpuzamahanga bishimwa.”

Icyanya cyahariwe Inganda cya Bugesera gifite ubuso bwa hegitari 335,67 ndetse nicyuzura kizaba kirimo inganda zirenga 75.

Iki cyanya cyatangiye gutunganywa mu 2022 kiri mu byiciro bitatu. Icya mbere kigizwe na hegitari 91,63 ndetse ubu hashyizwemo inganda 18, muri zo 12 ni zo zikora mu gihe izindi esheshatu zikiri kubakwa.

Icyiciro cya kabiri kiri ku buso bwa hegitari 99,45 ndetse biteganywa ko uyu mwaka uzarangira cyamaze gutunganywa.

Igice cya gatatu kiri ku buso bwa hegitari 144, 58, bigateganywa ko mu 2027 kizaba cyaramaze gutunganywa.

Biteganyijwe ko iki cyanya kizongera agera kuri miliyari 1,2$ ku gaciro k’urwego rw’inganda mu Rwanda.

Nicyuzura cyose kizatanga imirimo irenga ibihumbi 45, mu gihe abanyamahanga bazashoramo arenga miliyoni 400$.

Abayobozi batandukanye beretswe ibizaba biri mu ruganda rwa HQ-Aqua Plastic Ltd

Umuyobozi wa HQ-Aqua Plastic Ltd, Mungwarareba Jean Bosco, yavuze ko uru ruganda ruzakemura ikibazo cy'ibikoresho by'ubwubatsi batumizaga mu mahanga

Abayobozi batandukanye beretswe ibikoresho HQ-Aqua Plastic Ltd ikora

Umunyemari Denis Karera (uri hagati) na we ari mu bitabiriye igikorwa cyo kwerekana ibizajya bikorerwa muri HQ-Aqua Plastic Ltd

Uruganda rwa HQ-Aqua Plastic Ltd rukora ibikoresho byifashishwa mu gucyesha inzu

Izi 'wall panel' zifashioshwa mu gucyesha imbere mu nzu

HQ-Aqua Plastic Ltd ifite imashini zigezweho zishobora gukora toni zirenga eshanu z'ibikoresho by'ubwubatsi ku munsi

HQ-Aqua Plastic Ltd ifite imashini zikora ibikoresho by'ubwubatsi byifashisha ikoranabuhanga ryakomowe mu Budage

HQ-Aqua Plastic Ltd ni uruganda rufite ikoranabuhanga rigezweho ku buryo imashini nyinshi zikoresha

HQ-Aqua Plastic Ltd ikora ibikoresho bikesha mu nzu ubusanzwe byatumizwaga mu mahanga

Abakozi ba HQ-Aqua Plastic Ltd bari gutunganya zimwe muri 'wall panel' zishyirwa ku nkuta imbere mu nzu

Uwashinze HQ-Aqua Plastic Ltd atumiza kontineri hafi 80 z'ibikoresho by'ubwubatsi. Ashaka ko uru ruganda byibuze rwajya rukorerwamo hafi 30% by'ibyo atumiza

Muri HQ-Aqua Plastic Ltd hakorerwa amatiyo y'amoko atandukanye

Bimwe mu bikoresho byifashishwa gukora ibikoresho by'ubwubatsi

Amafoto: Kwizera Herve