ECTL ifite ingomero eshatu zibyara amashanyarazi avuye mu mazi, inatanga serivisi zo gukurikirana imyubakire n’ubujyanama mu kubaka ibikorwaremezo bijyanye n’amashanyarazi.

Izi mpapuro mpeshamwenda zasohowe ku nshuro ya kabiri zikubiye muri gahunda ngari ya ECTL yo gushyira ku isoko impapuro zifite agaciro ka miliyari 6.5 Frw, nkuko inshuro ya mbere yashyizwe ku isoko ry’imari n’imigabane ry’u Rwanda mu kwezi kwa Kanama 2021.

Mu itangazo iki kigo cyasohoye ku wa 7 Ukwakira 2025, cyavuze ko Abashoramari batanze amafaranga angana na miliyari 2.9 Frw, ugereranyije n’impapuro mpeshamwenda zasohowe zifite agaciro ka miliyari 2 Frw, bikaba bigaragaza icyizere gikomeye abashoramari bafitiye urwego rw’ingufu z’amashanyarazi mu Rwanda ndetse n’imiyoborere myiza n’iterambere ryiza rya ECTL.

Izi mpapuro mpeshamwenda za ECTL zizamara imyaka irindwi kugeza ku wa 27 Nzeri 2032, inyungu yazo izaba iri kuri 13,75%. izi mpapuro zikaba zizajya zishyurwa inyungu n’umwenda nyirizina kabiri mu mwaka, bikaba bizasigasira igishoro cy’abashoramari.

Izi mpapuro mpeshamwenda zizashyirwa ku isoko ry’imari n’imigabane mu Rwanda (RSE) ku wa 10 Ukwakira 2025, zitanga uburyo bwo gucuruza ku bashoramari no gukomeza guteza imbere isoko ry’imari n’imigabane mu Rwanda. Abashoramari bitabiriye barimo abantu ku giti cyabo, ibigo by’ubucuruzi, n’ibigo by’imari, bigaragaza ubushake bwiyongera mu gushora imari mu bikorwa by’iterambere mu Rwanda.

Aya mafaranga azakoreshwa mu bikorwa bisanzwe bya Energicotel ndetse no mu kuzuza inshingazo zayo zisanzwe.

Umuyobozi Mukuru wa ECTL, Eng. Carine Mukashyaka, yavuze ko kuba barabonye abashoramari baruta cyane abo bari biteze ari ikimenyetso cy’icyizere bafitiwe mu kugera ku ntego z’iterambere rirambye.

Ati “Iyi ntsinzi nta bwo ifasha kongera igishoro cyacu fatizo gusa, ahubwo iranongerera imbaraga inshingano zacu zo gutanga inyungu zirambye ku bashoramari. Iyi ntsinzi idushyira mu mwanya mwiza wo kongera gutanga izindi mpapuro mpeshamwenda mu bihe biri imbere, ndetse no kugira uruhare mu gukomeza Isoko ry’Imari n’Imigabane ry’u Rwanda.”

“Duha agaciro gakomeye icyizere twagaragarijwe n’abashoramari, kandi dukomeje gushyira imbere gukorera mu mucyo, gushyira mu bikorwa ibyemezo mu buryo bufite gahunda, ndetse no gukomeza kubaka ubunyamwuga.”

Umuyobozi w’umusigire wa BK Capital yafashije mu gushyira izi mpapuro mpeshamwenda ku isoko, Ivy Hesse, yavuze ko bishimira uruhare bagize muri iki gikorwa cy’amateka cya Energicotel Plc.

Yagize ati “Kuba harabonetse ubu bwitabire bukomeye bw’abashoramari, bigaragaza icyizere ku Isoko ry’Imari n’Imigabane ry’u rwanda. Nka BK Capital, dukomeje gushyira imbere kuba ahantu ibigo binini n’abashoramari bisanga kugira ngo babashe kubona amafaranga ndetse n’amahirwe y’ishoramari bifasha mu kubaka ahazaza h’u Rwanda.”

Energicotel PLC (ECTL) ni sosiyete nyarwanda yashinzwe n’ikigo cya EPC Africa Group mu 2014, ifite ingomero eshatu zibyara amashanyarazi avuye mu mazi, ikaba inakora imirimo yo gukurikirana imyubakire niy’ubujyanama mu kubaka ibikorwa remezo bifite aho bihuriye n’amashayarazi.

ECTL ifite inganda eshatu z’amashanyarazi aturuka ku mazi zirimo urwa Keya, Nkora na Cyimbili, ikindi kandi yatanze serivisi z’ubujyanama ku mishinga ikomeye yo mu karere, irimo Rusumo Falls 80 MW Hydropower Project, Rubavu Port Substation, ndetse na Rusizi Port Substation iri kubakwa.

Mu rwego rwo gukomeza kwagura ibikorwa byayo, ECTL iritegura kwinjira mu bikorwa bishya bigamije iterambere rirambye bizatangira muri 2026.

Ibyo birimo ECTL Gas igamije gushyira mu macupa Gazi, ubucuruzi bwa gazi burimo kugurisha no gukwirakwiza LPG mu ngo n’inganda ndetse kubika gazi mu buryo butekanye.

Hari kandi ECTL Solar izatanga ibisubizo by’ingufu z’imirasire y’izuba, hagamijwe imishinga y’ingufu z’izuba ku rwego rw’igihugu no kurwego rw’akarere,

ECTL igaragaza ko hamwe n’ubuyobozi bufite icyerekezo n’abakozi b’inzobere, ECTL imaze kwerekana ubunyamwuga n’ubushobozi bwo kugera ku ntego zayo, kandi yiyemeje gufasha Afurika gutanga ingufu zamashanyarazi zirambye kandi zizewe.

Energicotel yagurishije impapuro mpeshamwenda za miliyari 2 Frw

Mu 2021 Energicotel yashyize ku isoko impapuro mpeshamwenda zihwanye na miliyari 6,5 Frw