Ikigo cy’Igihugu gishinzwe guteza imbere umwuga w’ibaruramari (ICPAR) kirashishikariza abashoramari kuyishora mu bikorwa bijyanye no kubaka ibigo by’amahugurwa mu rwego rwo kongerera Abanyarwanda ubumenyi no gukomeza kunoza umurimo.

Nyuma y’uko cyongeye gutanga ibizamini ku nshuro yacyo ya kane, ICPAR kiratangaza ko cyamaze gushyira hanze amanota y’abakoze ibizamini mu kwezi kwa Kamena uyu mwaka.

Ibi bizamini bya CPA (Certified Public Accountant) ndetse na CAT (Certified Accounting Technician) byakozwe n’abacungamari batandukanye barimo abaturutse muri Kaminuza y’u Rwanda (icyahoze ari SFB), muri KIM, abahabwa ubufasha na Minisiteri y’imari n’igenamigambi, n’abandi bake baje nk’abakandida bigenga.

Kuva mu kwezi k’Ukuboza 2012, ubwo ICPAR yatangiraga gutanga ibizamini, umubare w’abitabira ugenda wiyongera doreko mu Kuboza 2013, hitabiriye abantu 90 muri CPA na 41 muri CAT. Uyu mwaka hakoze 130 muri CPA na 75 muri CAT. Amanota yo gutsindiraho yari 40% mu gihe ubushize yari 55% kandi ngo abatsinze, batsinze ku rugero rushimishije.

Mu banyeshuri bakoze ibizamini harimo abarangije inzego zose z’amasomo zigenwa na ICPAR ndetse n’abatangizi bazakomeza ku nzego zisumbuyeho.

Umuyobozi wungirije muri ICPAR, Munga John yashimiye ibigo bitandukanye bidahwema kohereza Abanyarwanda kwihugura ndetse bikanabafasha mu bijyanye no kwishyura amafaranga y’ishuri. Mu bigo byashimiwe harimo CBE (yahoze ari SFB), KIM, CBS.

Icyigo ICPAR gisanzwe cyongerera ubumenyi abakozi b’ibigo byigenga n’ibya Leta, aho abafata amasomo y’imyaka itatu ari bo bahabwa impamyabumenyi yo ku rwego rwa CPA.

Ibiciro byashyizweho mu kwishyura ibizamini bya ICPAR byose, hamwe n’ibitabo ntibirenza amafaranga ibihumbi 800 y’u Rwanda; naho kwiyandikisha bikaba ibihumbi 45 kuri konti ya ICPAR iri muri Banki ya Kigali.