Ni imibare ikubiye muri raporo ya RRA y’umwaka 2024/25, ku bijyanye n’imisoro mu Rwanda.

Iyi raporo igaragaza ko kugeza mu 2024/25 mu Rwanda hari ibigo 420.172 bisora. Ibigera kuri 355 biri mu cyiciro cy’ibinini, ibito ni 419.172, mu gihe ibiciriritse ari 766.

Mu Rwanda bivugwa ko ikigo cy’ubucuruzi ari kinini iyo gifite abakozi barenga 100, kikinjiza arenga miliyoni 500 Frw ku mwaka.

Bivugwa ko giciriritse iyo gifite abakozi bari hagati ya 31–100, kikinjiza ari hagati ya miliyoni 50-500 Frw. Ni mu gihe igito kiba gifite abakozi hari hagati ya 4-30, kikinjiza atarenga miliyoni 10 Frw.

Intara zihariye 68% by’umubare w’abasora bose, mu gihe Umujyi wa Kigali ufite 32%.

Iyi raporo ya RRA igaragaza ko mu 2024 mu Rwanda hari ibigo by’ubucuruzi 2.290 byinjiza ari hejuru ya miliyari 1 Frw ku mwaka. Ni umubare wikubye inshuro zirenze ebyiri mu myaka itanu, kuko mu 2020 byari 1.027.

Mu 2024 ibi bigo byose byinjije miliyari 18.442,3 Frw.

Ushingiye kuri iyi raporo, ubona ko umubare w’abafite ibigo by’ubucuruzi biri mu iki cyiciro ari abantu 86.

Ibyinjiza hagati ya miliyoni 400Frw na miliyari 1 Frw ni 2.264, mu gihe mu 2020 byari 924. Mu 2024 ibigo biri muri iki cyiciro byinjije Miliyari 1.398,2 Frw.

Abantu bafite ibigo biri muri iki cyiciro ni 270.

Ibigera kuri 10.420 byinjiza ari hagati ya miliyoni 50 Frw na miliyoni 400Frw. Mu 2020, umubare w’ibigo by’ubucuruzi byari muri iki cyiciro wari 5.018. Umwaka ushize ibi bigo byose byinjije miliyari 1.593,1 Frw.

Abafite ibigo biri muri iki cyiciro ni abantu 2.776.

Ibigo byinjiza hagati ya miliyoni 20 Frw na miliyoni 50 Frw mu 2024 byari 5.604, bivuye kuri 2.543 mu 2020. Igiteranyo cy’amafaranga ibigo biri muri iki cyiciro byinjije mu 2024 ni miliyari 182,3 Frw.

Umubare w’abafite ibigo byinjiza aya mafaranga ni 2.454.

Ibyinjiza hagati ya miliyoni 12 Frw na miliyoni 20 Frw byavuye kuri 1.709 mu 2020 bigera kuri 3.429 mu 2024. Byose hamwe byinjije miliyari 54,9 Frw. Ni mu gihe abafite ibi bigo ari abantu 2.197.

Ibyinjiza hagati ya miliyoni 2 Frw na Miliyoni 12 mu 2024 byari 9.678. Byose hamwe byinjije miliyari 55,4 Frw. Ibigo biri muri iki cyiciro bifitwe n’abantu 12.031.

Ni mu gihe ibyinjiza munsi ya miliyoni 2 Frw ari na byo byinshi ari 38.448. Igiteranyo cy’ayo byinjije mu 2024 miliyari 5,4 Frw, umubare w’ababifite ukaba 123.109.

Raporo y’Urwego rw’Igihugu rw’Iterambere (RDB) yerekana ko mu 2024 handitswe ishoramari rishya ringana na miliyari 3,2 $, ni ukuvuga arenga miliyari 4528 Frw avuye kuri miliyari 2,4 $ mu 2023.

Muri iri shoramari irijyanye n’inganda, imari n’ubwishingizi ndetse n’ibijyanye n’imitungo itimukanwa ryihariye 77,9%.

Ibyo byatumye Umujyi wa Kigali wiharira 75,4% by’ishoramari rishya ryanditswe mu mwaka ushize, ni ukuvuga ko arenga miliyari 2,47$ (arenga miliyari 3493 Frw) yashowe mu mishinga izakorera mu Mujyi wa Kigali.

Nyuma y’Umujyi wa Kigali hakurikiraho Intara y’Iburengerazuba yashowemo miliyoni 496,2$ yashyizwe mu mishinga itandukanye.

Mu Burasirazuba hagiyeyo ishoramari rishya ringana na miliyoni 155,4$.

Ku ruhande rw’Intara y’Amajyaruguru na ho hari ishoramari rifite agaciro ka miliyoni 109,8$, mu gihe Intara y’Amajyepfo yashowemo miliyoni 37,8$ ikaba ari nayo yabonye ishoramari rito mu mwaka ushize.

Ugereranyije n’umwaka ushize ibikorwa by’ishoramari byanditswe byiyongereyeho 23,8%.

Sosiyete zo mu Rwanda zirenga 2000 zinjiza ari hejuru ya miliyari 1 Frw ku mwaka