Mu gihe icyiciro cya mbere cya gahunda ya Hanga Umurimo kigaragaza ko hari imishinga itarishingiwe n’amabanki kubera amafaranga menshi yasabaga, iyi gahunda mu cyiciro cyayo cya kabiri izibanda ku guteza imbere imishinga isaba amafaranga make no kwigisha urubyiruko mu buryo bwihuse imyuga yarufasha kwihangira imirimo.

Ibi Umunyamabanga Uhoraho muri Minisiteri y’Ubucuruzi n’Inganda Hategeka Emmanuel yabigarutseho ubwo yasozaga icyiciro kibanza cya Hanga Umurimo mu Ntara y’Amajyepfo, akanatangiza icyiciro gishya kuri uyu wa gatandatu Ukuboza 2012.

Yavuze ko icyiciro kirangiye cyerekanye ko Abanyarwanda bafite umuhate wo kwivana mu bukene, gusa anenga amwe mu mabanki atarabashije guha inguzanyo abakoze imishinga myiza n’ubwo imwe muri yo yabaga isaba amafaranga menshi cyane.

Hategeka yavuze ko ubu gahunda nshya y’imikorere muri Hanga Umurimo ari ugukora imishinga iciriritse idasaba amafaranga menshi, kugira ngo n’ayo mabanki ntaterwe impungenge no gutanga inguzanyo.

Ikindi ni uko muri iki cyiciro nta bisa n’amarushanwa bizabamo, ko ahubwo buri gihe umuntu azajya yumva aba yumva afite umushinga azajya awushyikiriza umukozi ushinzwe Hanga Umurimo mu karere akamufasha kuwunonosora, ariko yongera gusaba abazakora imishinga kuzakora isaba amafaranga make, agira ati “Gahunda ni ugutangirira kuri bike umuntu akagera kuri byinshi.”

Mu cyiciro cya mbere cya Hanga Umurimo Hategeka avuga ko hashyizweho uburyo bwo kwigisha imyuga urubyiruko mu gihe cy’amezi atandatu n’abajyanama mu by’ishoramari biswe PROBAs (Proximity Business Advisors), bamara kwiga bagahabwa amafaranga make yabafasha gutangira gukora ibyo bize.

Hanga Umurimo yatangiye mu mpera z’umwaka wa 2011 bateganya ko nibura buri karere kagira abantu 100 bayijyamo, ariko icyiciro cy’ibanze kirangiye imishinga 400 yaremewe mu Rwanda hose.