Banki Nyarwanda y’iterambere (BRD), yasinyanye amasezerano n’Ikigega Nyafurika cy’ubufatanye, (FSA: Fond de Solidarité Africaine) aho biteganyijwe ko FSA izajya ifasha imishinga yagiraga ibibazo byo kubura ingwate, igatinda gushyirwa mu bikorwa.
Amasezerano yashyizweho umukono ku mugoroba wo ku wa kane tariki ya 2 Kanama 2013, hagati y’abayobozi b’ibi bigo byombi, hakubiyemo ko FSA izajya ifatanya na BRD mu gushakisha no kugena imishinga ikwiye gufashwa, ihabwa ibikenewe byose ngo ishyirwe mu bikorwa mu Rwanda.
Alexis Kanyankore Umuyobozi mukuru wa BRD yatangaje ko aya masezerano bagiranye na FSA, azafasha iyi banki n’abayigana baburaga ingwate, cyane cyane abari mu mishinga icirirtse n’iringaniye, maze imikorere ya bombi ikarushaho kugenda neza. Yagize ati “FSA ije kongera ububasha bwo kubona ingwate. Uburyo bwo kubona ingwate buragutse.”
Kanyankore yagaragaje ko gusinya amasezerano na FSA atari ukuvuga ko igiye guhita ishyira amafaranga muri BRD, ahubwo ari ubufatanye bagiye kugirana ku buryo abaganaga BRD bakagira ingorane z’ingwate basubijwe. Ati “Iki kigega kizajya gishyigikira imishinga yabo ikagenda neza nk’uko yateguwe.”
Umuyobozi wa FSA, Pierre Yaovi Sedjro, yatangaje ko icyatumye baza gukorana na BRD ari uko ariyo banki babisabye ikabasha kubyemera bitaruhanyije ko bagirana ubufatanye, kandi ko intego yabo ari ugufasha buri mushinga wose w’iterambere waba wagize ingorane zatuma udashyirwa mu bikorwa.
U Rwanda ruri mu bihugu 13 bigize inama y’iki kigega cyashyizweho mu 1976, ku cyifuzo cy’igihugu cy’u Bufaransa ubwo habagaho inama y’ihuriro France-Afrique, maze u Bufaransa bugasaba ko ibihugu byashyira hamwe bikishyiriraho ikigega cy’ubufatanye, cyazajya gifasha mu mishinga y’iterambere.
FSA yafashije mu gutera inkunga imishinga y’ibikorwa by’iterambere, kuva ishyizweho mu myaka 38 ishize. Kugeza ubu mu Rwanda uretse imishinga yahawe inkunga ikaba yaranashojwe kera, FSA irimo gutera inkunga uruganda MINIMEX rutunganya umusaruro w’ibigori, Ishuri rya Green Hills Academy, ndetse n’umushinga ENI wo kubaka urugomero rw’amashanyarazi muri Nyaruguru nk’uko Yaovi yabitangaje.
Ubu kuba FSA igiranye ubufatanye na BRD bigiye gutuma hari imishinga myinshi irushaho guterwa inkunga yari isanzwe yaratangiye, ndetse hakizerwa ko hari n’imishya izazanwa, kuko ba nyirayo bazaba batinyutse ikibazo cy’ingwate cyababuzaga kuyigaragaza ngo ishyirwe mu bikorwa.
FSA igizwe n’ibihugu 13 byo muri Afurika byose bihuriye ku kuba bivuga igifaransa, ari byo u Rwanda na Burundi muri Afurika y’Iburasirazuba; Repubulika ya Centre Afrique, Gabon na Tchad; ibirwa bya Maurice mu nyanja y’Abahinde na ho mu Burengerazuba bwa Afurika hakaba Benin, Burkina Faso, Cote d’Ivoire, Mali, Senegal, Togo na Niger ari na yo ifite icyicaro cy’iki kigega i Niamey.
Obald Hakizimana umukozi muri minisiteri y’imari n’igenamigambi (MINECOFIN), akaba ari na we uhagarariye Guverinoma y’u Rwanda muri FSA, avuga ko iki kigega ari ingenzi cyane kuko abakizi bakigana kikabafasha kandi icyiza cyacyo ni uko kigoboka abafite ibikorwa byari bigiye kubagora, kikabongereramo amafaranga n’igihe cy’ibikorwa umushinga ntube ugipfuye.
Hakizimana yongeraho ko abazi neza iby’iki kigega, gishobora kwiyambazwa na buri wese ubishaka kandi ushoboye, bitabaye ngombwa ko habaho umuhuza hagati yacyo n’ugikeneye.
FSA ifite imari shingiro ya miliyoni 60 z’amadolari ya Amerika, agenewe gufasha mu mishinga y’iterambere nyafurika.
TANGA IGITEKEREZO