Aganira na IGIHE yatangaje ko iterambere agejejweho n’ubuhinzi bw’urutoki akora rigiye gutuma ashinga uruganda ruto ruzajya rufasha mu gutuma ibitoki bibikika bikajya bishobora kuribwa bimaze igihe.

Yagize ati “Mfite icyerekezo na gahunda yo ukwipakirira nkajya kwigurishiriza i Kigali, icya kabiri ni uko uko ubushobozi buzagenda buzamuka. Nzashaka imashini nkore uruganda ruto ruhindura (transformation) bya bitoki byanjye nkabishyira muri ambaraje bikajya biribwa bimaze igihe.”

Akomeza avuga ko azashimishwa no kubona ari we ubyitunganyiriza bitiriwe bica mu nkono cyangwa ngo bipakirwe imodoka bijyanwe ahandi hantu.

Ati “Urwo rwego nindamuka ndugezeho, nzaba maze kugera kuri cya cyerekezo cyanjye nari mfite, cy’uko nshobora kuba natunganya umusaruro wanjye ugahinduka, ku buryo ushobora kuba wagurwa n’uwo ari we wese agahita awufungura (awurya) kandi bikorohera umuntu kubigura hafi ye, atiriwe akora urugendo.”

Kapiteni Athar Eliezar yabwiye IGIHE ko yihaye gahunda yo guhesha agaciro gahunda za leta nko kwihesha agaciro, gusagurira amasoko n’izindi gahunda agamije kuzishyira mu bikorwa.

Akomeza avuga igikorwa nyirizina cy’ubuhinzi bw’urutoki yagitangiye mu mwaka wa 2003.

Kapiteni Athar ahamya ko mu mwaka wa 2002 yaryaga igitoki agihashye ku isoko, ariko aza kwiyemeza guhinga urutoki agamije kwihaza mu biribwa no kwihesha agaciro, byatumye abasha kujya asagurira n’amasoko.

Avuga ko muri icyo gihe yatangiye ahinga urutoki kuri metero 40 kuri metero 50, ariko kugeza uyu munsi ubutaka bwariyongereye kuko yabashije kugura n’andi masambu, akaba afite urutoki ruteye kuri hegitari hafi ebyiri.

Yongeraho ko umusaruro w’urutoki rwe ubarirwa hagati ya toni ebyiri na toni imwe n’igice mu kwezi.

Mu buhinzi bw’urutoki Kapiteni akora, avuga ko abaturanyi be babufitemo amahirwe kuko ubuze umusanzu w’ubwisungane mu kwivuza amuhamo akazi.

Athar Kapiteni ashimangira ko ahuye na Perezida wa Repubulika Paul Kagame yamushimira ubuyobozi bwiza, kuko ngo iterambere afite arikomora ku mbwirwaruhame umukuru w’igihugu ageza ku banyarwanda.

Nyamara ariko na none asanga Itegeko Nshinga ryahinduka mu ngingo yayo ya 101 kugira ngo azakomezanye na perezida Kagame, mu cyerekezo 2020 mu gukomeza kuyobora abanyarwanda.