Ibihugu bitanu byo mu Muryango wa Afurika y’Iburasirazuba (EAC) byemeranyije guha urubuga abanyamwuga bo mu karere barimo abubatsi, abacungamurungo, n’abandi uburenganzira bwo gukora ku buryo bungana muri buri gihugu cy’akarere.

Nk’uko tubikesha NTV Uganda, korohereza abanyamwuga mu bihugu bigize akarere byitezweho gukomeza ubumwe, ndetse ikaba ari intambwe ishimangira ikoreshwa ry’ifaranga rimwe muri aka karere.

Bivugwa ko aya masezerano yasinywe n’ibigo by’abanyamwuga muri EAC bakaba bemeranyijwe ko aba banyamwuga bose bazaba bemerew gushakisha akazi no gukorera mu bihugu by’akarere uko ari bitanu.

Umunyamabanga Mukuru wa EAC, Richard Sezibera, yashimangiye ko kureka abamyamwuga bagashaka akazi mu karere kose bizakomanga ku bihugu bitarashyira mu bikorwa ikoreshwa ry’ifaranga rimwe.

Yakomeje avuga ko intambwe y’ikoreshwa ry’ifaranga rimwe yatangiriye ku baturage ba Kenya, u Rwanda, Uganda na Tanzania aho baba bashobora kwishyura ibicuruzwa na serivisi mu karere bakishyura amafaranga y’ibihugu byabo.

Umuyobozi w’Inama y’Ubucuruzi bwa EAC, Andrew Luzze Kagwa, yagize ati “Urugero, niba ndi Umunyarwanda nshobora kwishyura ibicuruzwa bya Mukwano (uruganda) mu mafaranga y’u Rwanda. Nyuma yo kwishyura, Banki Nkuru z’Ibihugu zikiringaniriza ibiciro byishyuwe nta byo kubangamira ubucuruzi muri EAC.”

Bivugwa ko u Burundi ari cyo gihugu kitaratera intambwe yo gukoresha ubu buryo bw’ifaranga rimwe. Dr. Sezibera yashimangiye ko muri uyu mwaka ibihugu byose bizaba byarashyize hamwe muri uru rugendo, hakurwaho ubuhenzi ubwo ari bwo bwose n’ibiciro byo guhamagara hanze y’imipaka mu karere.

Intambwe yo kwemerera abanyamwuga ikurikiye ikurwaho ry’imisoro yakwa abakozi b’abanyamahanga bavuka mu bihugu by’akarere hagati y’u Burundi na Tanzania. Uganda bivugwa ko yiteye iyi ntmbwe yo gukuraho imisoro ku bakozi b’abanyamahanga yayikuyeho ku bihugu byemeye kuyikuraho.

Ibi bisobanuye ko Abanyatazaniya n’Abarundi bacyakwa iyi misoro muri Uganda igihe bataremerera Abagade gukora ntacyo batanga.

Iyi ni intambwe ya gatatu (Monetary protocol) mu ishyirwa mu bikorwa rya gahunda zikubiye mu masezerano agenga EAC, nyuma y’Isoko rusange (Common market) no guhuza za Gasutamo (Customs Union) byatangiye gushyirwa mu bikorwa, ariko kuri iyi ngingo ya nyuma bikaba, biteganyijwe gushyirwaho umukono n’abakuru b’ibihugu mu mwaka utaha.

Nyuma y’izi ngingo uko ari eshatu hasigaye ijyanye gahunda yo gushyiraho Leta imwe (Political Federation).