Imijyi itandatu yatoranyijwe, yatangiye gushyirwamo ibikorwa bikurura abashaka kuyubakiramo imibereho. Intego ni uguhanga imirimo mishya idashamikiye ku buhinzi no kugabanya abashakira ubuzima i Kigali. Biteganyijwe ko mu 2024, Abanyarwanda 30% bazaba bayitujwemo.

Muri iyi mijyi hatangiye kubakwa imihanda ireshya n’ibilometero 81 iri mu byiciro bibiri; Banki y’Isi yatanze miliyoni $95.

Mu cyiciro cya mbere, muri Muhanga, Huye, Rusizi, Rubavu, Musanze na Nyagatare hubatswe imihanda y’ibilometero 29 na ruhurura zireshya n’ibilometero 44; yatwaye miliyoni $28.

Nyuma y’igihe yubatswe, imwe ikanacanirwa, ab’inkwakuzi batangiye kuyibyaza inyungu binyuze mu mirimo yahanzwe n’iyatanzwe.

Impinduka ku buzima bw’abatuye imijyi yunganira Kigali

Abaturage bo mu mijyi yunganira Kigali begerejwe imihanda yabahinduriye ubuzima, banoroherezwa kugera ahari ibikorwa rusange nk’ibitaro, amashuri, amahoteli n’ibindi.

Muri buri mujyi hubatswe imihanda mu bice bitandukanye mu guhuza abantu no kubafasha kunoza ubuhahirane.

Muhizi Azarie utuye mu Kibiligi muri Muhanga yagaragaje ko borohewe no gushyikirana n’abandi.

Yagize ati “Uwapfuye yarihuse, nta birori yabonye. Twari mu mwijima ariko ubu ni amajyambere. Dufite ubutabazi kuko urwaje umuntu, wabona imodoka ikagutabara. Mbere hari mu manegeka.”

Ab’i Huye bishimira ko agaciro k’ubutaka n’inzu kazamutse. Abatuye ku Karubanda n’ubuyobozi bw’Akarere ka Huye batangarije IGIHE ko ibibanza biri hafi y’umuhanda mushya bya metero 20 kuri 30 byikubye biva kuri miliyoni ebyiri bigera kuri enye z’amafaranga y’u Rwanda.

Iterambere ntiryasize abo mu yindi mijyi kuko kuva ku bacuruzi baciriritse kugeza ku bafite amaduka yagutse babonye agacu k’impinduka mu buzima bwabo. Hari abatangije imishinga iciriritse n’abafite gahunda.

Umucuruzi wa Me2U, Nzabonimpa Jean Pierre, ukorera ku Gateme muri Tumba yavuze ko abakiliya bamugana biyongereye.

Yagize ati “Hari abantu benshi bava hirya no hino batugana. Niba narabonaga nk’ibihumbi 30, nzabona 35 by’amafaranga y’u Rwanda.”

Abashoramari batangiye kurambagiza aho gukorera

Imijyi yose yatangiye kwakira abashaka kuyishoramo imari mu by’amahoteli, inganda n’ibindi.

Umuyobozi w’Akarere ka Muhanga, Uwamariya Béatrice, yavuze ko hari abashoramari bazahatangiza inganda zirimo urw’amasafuriya, urw’imiti, n’urutunganya ibikomoka ku magweja.

Yavuze ko “Uruhare rwacu ni ugukangurira abashoramari gukorera muri aka karere ariko natwe tukabafasha kubona ibikorwa remezo ngo baze biboroheye.”

Uruganda rw’amakaro mu Karere ka Nyagatare (East African Granite Industries), rwatangaje ko rworoherejwe gusakaza ibicuruzwa mu gihugu no hanze.

Nyagatare iri mu mijyi ikibyiruka, abayituye bishimira ko ibikorwa remezo bizabafasha kwagura ubucuruzi burimo n’ubw’ibikomoka ku bworozi.

Ku nkengero za Kivu, Rubavu na Rusizi haganwa n’abanyamahanga biganjemo abo muri Repubulika Iharanira Demokarasi ya Congo bahafite ibikorwa by’ubucuruzi.

Umuyobozi w’Akarere ka Rubavu, Habyarimana Gilbert, yatangarije IGIHE ko bifuza guhinduka irembo ry’ubucuruzi.

Ati “Nyuma yo kubona ibikorwa remezo, hatangiye kuzamurwa inzu z’ubucuruzi zijyanye n’igishushanyo mbonera cy’akarere. Inganda ziri gushaka kuzana amashami muri Rubavu, hari no gutegurwa icyanya cyazo.”

Abaturiye Ibirunga bubakiwe ruhurura zabashyiraga mu kaga

I Musanze hubatswe imihanda yatangiye gukangura imishinga migari y’ishoramari nk’isoko rya Goico no kwizihirwa n’abahasura.

Hanubatswe ruhurura ebyiri zireshya na metero 922 zatwaye miliyoni 949.9 Frw, mu kugabanya umuvumba w’amazi ava mu Birunga.

Depite Bajeni Mpumuro Emmanuel uturiye ruhurura ya Rwebeya (ifite metero 720 imanukana amazi kuva mu Kinigi ikayasuka mu mugezi wa Mukungwa) yagaragaje ko hari abaturanyi be bimutse bakiza amagara.

Yagize ati “Amazi yasenyaga inzu n’ingo z’abaturage, ibikorwaremezo, akangiza imyaka, yatwaraga amatungo. Umuntu yashaka kuyambuka akamujyana kuko arihuta cyane.”

Umunyamabanga wa Leta muri Minisiteri y’Ibikorwa Remezo ushinzwe Gutwara Abantu n’Ibintu, Eng. Uwihanganye Jean de Dieu, yavuze ko guteza imbere imijyi habanza ibikorwa remezo, ishoramari rigakurikira.

Yagize ati “Imijyi yahisemo imihanda yo kunoza ubwikorezi bw’abantu n’ibintu nk’iby’ibanze mu kuzamura ubukungu. Harimo inyungu nyinshi, abantu bagiye hamwe ibikorwa remezo byoroha kubageraho n’umusaruro ukiyongera.”

Yavuze ko iyi gahunda atari iy’ubwikorezi gusa ahubwo igamije guteza imbere umujyi mu ngeri zose.

Ati “Igikurura abantu mu mujyi ni akazi n’imibereho ihari. Aho umuhanda ugeze ubuzima burahinduka, amazi meza akahagera, amashanyarazi n’ibindi.”

Imihanda imaze umwaka yubakwa, izuzura muri uku kwezi. Abaturage 298 babonye akazi muri Huye, 210 muri Rusizi, 800 muri Musanze, 240 muri Rubavu n’abandi babyungukiyemo.

Uyu mushinga watangiye muri Kamena 2016, uzasozwa muri Nyakanga 2021. Hari gukorwa inyigo y’icyiciro cya kabiri, ahazubakwa imihanda y’ibilometero 40 hibandwa ku igana mu byanya byahariwe inganda.

I Muhanga hubatswe imihanda ireshya n'ibilometero 4 na metero 886

Imihanda ni intangiriro z'iterambere

Imihanda yamaze gucanirwa

Agakiriro ka Gihuma muri Muhanga kakoreragamo abantu bake kubera imihanda mibi, ubu bariyongereye

I Muhanga, abanyeshuri borohewe no kugera ku ishuri kubera imihanda bubakiwe

Iyubakwa ry'iyi mihanda ryatewe inkunga na Banki y'Isi ibinyujije muri LODA

Mininfra yishimira ko iyubakwa ry'imihanda ryatangiye kubyarira abaturage umusaruro

Mu bikorwa byahise bitangira gukorerwa hafi n'ahubatswe umuhanda muri Muhanga birimo agakiriro ka Gihuma gakoreramo abagera kuri 250

Muhanga yagejejwemo imihanda yoroshya imigenderanire

Umujyi wa Muhanga ugizwe n’imirenge ine iri ku buso bwa hegitari 4822, zingana na 7.5% by’ubw’akarere

Umujyi wa Muhanga ugizwe n’imirenge ine iri ku buso bwa hegitari 4822

Umuyobozi w’Akarere ka Muhanga, Uwamariya Béatrice, yagaragaje ko Akarere ka Muhanga kanakungahaye ku mabuye y'agaciro akenewe gutunganywa byihariye

Abatwara abagenzi kuri moto bishimiye ko boroherejwe mu ngendo

Huye hubatswe imihanda ingana na kilometero 5 na metero 582 mu Mirenge ya Ngoma na Tumba

Imihanda ireshya n'ibilometero 5 na metero 582 yashoweho asaga miliyari ebyiri na miliyoni 886 z'amafaranga y'u Rwanda

Imihanda yoroshya ubuhahirane n'ubwikorezi bw'abantu n'ibintu

Amazi ava mu Kiningi yaciriwe inzira azajya anyuramo

Hubatswe ikiraro gihuza abaturage bo mu Kagari ka Ruhengeri

Mbere y’umushinga watewe inkunga na Banki y’Isi muri Musanze hari imihanda ya kaburimbo ireshya n'ibilometero 72

Mu Karere ka Musanze habarizwamo imihanda ya kaburimbo ireshya n’ibilometero 77,7

Muri Musanze, hubatswe imihanda ireshya n’ibilometero 4 na metero 577 yatwaye asaga miliyari enye na miliyoni 202 Frw

Ruhurura ya Rwebeya izakemura ikibazo cy'abahitanwaga, bakanasenyerwa n'amazi ava mu Birunga

Rwebeya ireshya na metero 720 imanukana amazi kuva mu Kinigi ikayasuka mu Mugezi wa Mukungwa

Abatuye Nyagatare bagenda batikandagira ku bw'umuhanda bubakiwe

Hari abatangiye gusaba ibyangombwa byo kubaka nyuma yo kwegerezwa imihanda mishya

Mu Mujyi wa Nyagatare hubatswe imihanda ireshya n’ibilometero bine na ruhurura zireshya na metero 200

Imihanda yitezweho koroshya ubuhahirane hagati y'ab'i Nyagatare n'utundi duce tw'igihugu

Nyagatare iri mu mijyi mishya iri kuzamukana imbaduko

Nyagatare ni umujyi uhana imbibi n’imipaka ya Buziba na Kagitumba

Iterambere rigaragara i Nyagatare ugana mu mujyi rwagati

Umujyi wa Nyagatare uri mu yunganira uwa Kigali

Abanyamaguru na bo barazirikanwa mu iyubakwa ry'imihanda bagakorerwa inzira yo kunyuramo

Abaturage bagera kuri 240 bahawe akazi na NPD Cotraco ifite isoko ryo kubaka imihanda yatewe inkunga na Banki y'Isi

Hatunganyijwe ruhurura zireshya na kilometero imwe na metero 175

Hubatswe imihanda ireshya n’ibilometero bitatu na metero 894

Ingendo z'imodoka zitwara abagenzi zaroroshye kubera imihanda

Muri Rubavu hubatswe ruhurura ivana amazi mu misozi akisuka mu Kiyaga cya Kivu

Ruhurura zubatswe zaratwikiriwe mu kwirinda ko zateza umwanda

Umuhanda uva RCD ujya mu mujyi wa Gisenyi

Umujyi wa Rubavu ugenda waguka mu mfuruka zose

Gahunda yo gushyiraho imijyi yunganira uwa Kigali yashyizweho mu Mwiherero w’Abayobozi wo mu 2010

Mu Karere ka Rusizi hubatswe imihanda ireshya na kilometero 4 na metero 632, yatwaye asaga miliyari 4 na miliyoni 538 Frw

Ubutaka bwo hafi y'inkengero za Kivu, agaciro k’ubutaka karazamutse. Hari Abanye-Congo baguze ubufite agaciro k'ibihumbi 20 by'amadolari

Umuhanda mushya wubatswe uva mu Kadasomwa ugana ahari ibiro by'Akarere ka Rusizi. Uyu muhanda wagoraga abawukoresha kubera uko wari umeze

Umuhanda uva kuri Radio Rusizi ukanyura ku biro by’akarere ugana ku Rukiko rw’Ibanze rwa Kamembe ubu ni nyabagendwa

Amafoto: Muhizi Serge