Ibigo byigisha ubumenyi ngiro bivuga ko buri mwaka bishyira ku isoko ry’umurimo abanyeshuri batari bake, mu gihe abikorera ku giti cyabo bavuga ko batabona abakozi bashoboye bakora imirimo isaba ubumenyi ngiro.

Icyo kibazo giterwa no kuba nta mikorere ihamye iri hagati y’impande zombi nk’uko byemezwa n’ubuyobozi bw’biigo byigisha imyuga n’ubumenyingiro.

Imikoranire inoze hagati y’abikorera ku giti cyabo ndetse n’ibigo bitanga ubumenyi butandukanye harimo n’ubumenyi ngiro ni igisubizo ku iterambere rirambye.

Umuyobozi w’ikigo cyigisha ubumenyi ngiro mu Ntara y’Amajyepfo (IPRC South) giherereye mu Karere ka Huye, atangaza ko usibye kuba imikoranire na ba rwiyemezamirimo iha urubuga abiga ubumenyi ngiro mu kubyaza umusaruro ibyo bize, ari n’igisubizo kuri ba rwiyemezamirimo mu kubona abakozi bakeneye.

Yagize ati «Iyo ba rwiyemezamirimo begereye ibigo byigisha ubumenyi ngiro, batubwira abakozi bakeneye natwe tukabaha abanyeshuri barangije kwiga kandi bashoboye.»

Amashyiga atangiza ibidukikije

Nzeyimana Isidore, rwiyemezamirimo akaba uwavumbuye uburyo bwo gukora amashyiga ya kijyambere atekwaho ntibyangize ibidukikije akaba n’umuyobozi wa Tekutangije Ltd, avuga ko icyamuteye kwegera ibigo byigisha ubumenyi ngiro ari uko azi neza ko abahiga baba bafite ubumenyi buhagije.

Agira ati «Nari nkeneye abantu bashoboye kandi nizeye ngo mbahe akazi, ni yo mpamvu negereye ubuyobozi bwa IPRC ngo babimfashemo. Ntibantengushye bampaye abantu bashoboye, tubategurira amahugurwa bari bamazemo ibyumweru bitatu, none ubu bari ku rwego nifuza mu mirimo.»

Ku banyeshuri bakurikiranye amahugurwa bahawaga ku bufatanye bwa Tekutangije Ltd na IPRC South, bo bavuga ko ba rwiyemezamirimo bagiye begera ibigo by’amashuri bajya bahavana abakozi bizewe kandi bashoboye.

Imikoranire hagati y’ibigo bitanga amasomo y’ubumenyingiro na ba rwiyemezamirimo yagombye kubera urugero ibindi bigo by’abikorera, kugira ngo hareberwe hamwe igikenewe ku isoko ry’umurimo, abe ari cyo gitangwa.

[email protected]