ITM igira uruhare rukomeye mu gushakira ibigo abakozi, gutanga amahugurwa no kongerera ubushobozi abakozi, gufasha urubyiruko rurangije Kaminuza kubona akazi n’ ibindi.

Kuri uyu wa Gatanu ubwo iki kigo cyizihizaga isabukuru y’ imyaka itanu kimaze gishinzwe mu Rwanda, hagarutswe ku mateka yacyo mbere y’uko gitangira n’ibyo kimaze kugeraho.

ITM Africa imaze gufasha abakozi barenga 2,000, imaze guhugura abakozi barenga 3,800 kandi yafashije urubyiruko rurenga 150 kubona akazi.

Iki kigo cyatanze amahugurwa mu ibigo birenga 200 yaba ibya Leta, ibyigenga n’Imiryango itegamiye kuri Leta haba mu bujyanama, kubashakira abakozi no guhugura abakozi.

Umukozi ukorera muri Canalbox, Mbonimpa Jean de la Paix waje uhagarariye abakozi 50 bafashijwe na ITM kubona akazi, yavuze ko ITM hari icyo yabafashije.

Ati “Turashimira ITM yadufashije kubona akazi tukirangiza kaminuza, tutarabona ubuzima none uyu munsi turashoboye ku buryo ubu ndi umuyobozi kandi naratangiye ndi umukozi. Nibakomereza aho gutanga abakozi bashoboye kuko hari ibigo bidafite abakozi bashoboye.”

Umuyobozi wa ITM Africa Ltd mu Rwanda, Dorcas Rutunda yavuze ko bishimira imyaka bamaze batanga abakozi bashoboye kandi bazakomeza kugira uruhare mu iterambere ry’ ibigo byo Rwanda.

Yagize ati “Iyi myaka itanu tumaze ITM yubatse izina ryiza mu ruhando rw’ibigo bitandukanye. Kuri ubu iri mu bigo biyoboye ibindi mu gutanga abakozi bafite ubumenyi buhagije kandi urugendo ruracyakomeje.”

Minisitiri w’ Abakozi ba Leta n’ Umurimo, Kayirangwa Rwanyindo Fanfan yashimiye ITM Africa uruhare igira mu gufasha Igihugu kugira abakozi bakenewe ku isoko ry’umurimo.

Ati “Turashimira gahunda ya ITM Africa uruhare igira mu gufasha urubyiruko no gutanga abakozi bashoboye.”

ITM Africa Ltd yatangiye muri 2017 ikaba ikomoka ku kigo mpuzamahanga ITM Group cyatangiye muri 2011, gishinzwe na Sylva Monga.

Kugeza ubu imaze gushinga amashami mu bihugu icumi harimo Angola, Benin, RDC, u Budage, Kenya, Nigeria, Rwanda, Afurika y’Epfo, Tanzania, Congo Brazzaville na Togo.

Byari akanyamuneza kuri Monga washinze ITM Group

Abafashijwe na ITM Africa basabye ko ibindi bigo byayigana bigahabwa abakozi bashoboye

Dorcas Rutunda, Umuyobozi w’ ikigo cya ITM Africa Ltd mu Rwanda avuga hari izindi gahunda bafite zo gufasha kuzamura iterambere ry'ibigo byo mu Rwanda

Ikigo ITM Group cyatangiye muri 2011 gishinzwe na Sylva Monga

Minisitiri w’ Abakozi ba Leta n’ Umurimo, Kayirangwa Rwanyindo Fanfan yashimiye ITM Africa uruhare igira mu gufasha Igihugu kugira abakozi bakenewe ku isoko ry’umurimo

Sylva Monga watangije ITM group yashimiye ITM Africa Rwanda uburyo bakomeje gutanga serivise nziza

Sylva Monga yashimiye abafatanyabikorwa ba ITM Africa

ITM Africa yashimiwe umusanzu mu kubaka abakozi bashoboye mu Rwanda