Abagize Ishyirahamwe Dushyigikirane rikorera mu murenge wa Masoro, mu karere ka Rulindo rikora ubukorikori butandukanye bavuga ko bateye imbere ku buryo bushimishije.

Iri shyirahamwe rigizwe ahanini n’abagore b’abapfakazi, n’abana b’imfubyi. Intego yayo akaba ari ugushyigikira, no gufasha aba bantu bavuzwe haruguru kwiteza imbere, bakora imirimo itandukanye ibabyarira inyungu irimo kuboha, gufuma, kudoda hamwe no guhinga kijyambere no korora.

Umuyobozi wa Dushyigikirane, Bangire Constance yatangarije IGIHE ko hagiye gushira imyaka 20 bafite intego yo kuvana abanyamuryango mu bwigunge, guhindura imyumvire, kugira ngo barusheho kwiteza imbere.

Yagize ati “Bimwe mu bikorwa dukora byo kwiteza imbere birimo guhinga ibihingwa nk’umuceri, ibisheke, ibikorwa by’ubworozi, tworora amafi, intama n’andi matungo atandukanye kandi buri munyamuryango afite itungo mu rugo rwe.”

Bangire akomeza avuga ko abanyamuryango ba Dushyigikirane batojwe no gukorana n’ibigo by’imari iciriritse birimo SACCO na RIM ((Réseau Interdiocésain de Microfinance) bityo bakabasha kubona inguzanyo bakiteza imbere.

Umwe mu banyamuryango Mukamusoni Immaculé ni ba Dushyigikirane, yatangarije IGIHE ko amaze kugera kuri byinshi.

Yagize ati “Mfite umushahara wa buri kwezi utuma mbasha kwiteza imbere nkanateza imbere umuryango wanjye. Mbasha kwiyishyurira ubwisungane mu kwivuza nkanagurira umuryango wanjye. Ikindi kandi twungurana inama n’ibitekerezo ku buryo ntawe ugira ikibazo ngo akihererane wenyine, ahubwo dufatanya kugishakira igisubizo.”

Ishyirahamwe Dushyigikirane ryashinzwe mu 1995, rigizwe n’abanyamuryango basaga 500 n’abakozi bahoraho basaga 100 barimo abize amashuri yisumbuye na kaminuza hamwe n’abize amashuri y’ubumenyingiro bafite umushahara uri hagati y’ibihumbi mirongo itatu n’ibihumbi magana abiri.

[email protected]