Guverinoma y’u Rwanda n’u Budage bashyize umukono ku masezerano y’inkunga y’amayero miliyoni 7 (amafaranga y’u Rwanda miliyari 5,5), azibanda ku bikorwa byo gushyigikira imiyoborere myiza no kwegereza ubuyobozi abaturage mu nzego z’ibanze.

Aya masezerano yasinywe hagati ya Minisitiri w’Imari n’Igenamigambi Amb. Gatete Claver ku ruhande rw’u Rwanda na Ambasaderi w’u Budage mu Rwanda Peter Fahrenholtz, agaragaza ko hazibandwa ku mishinga y’ibikorwa remezo byihutisha iterambere nk’amashuri, imihanda y’imigenderano, ibigo nderabuzima, amasoko, gushyigikira imishinga y’Abikorera n’ibindi.

Bivugwa ko aya mafaranga azanyuzwa muri Minisiteri y’Ubutegetsi bw’Igihugu n’Imibereho Myiza y’Abaturage, azashyigikira kandi gahunda za leta zisanzwe mu kwegereza ubuyobozi abaturage, uturere tukazahabwa uburenganzira bwo guhitamo imishinga yihutirwa mu guteza imbere abaturage.

Amb Gatete Claver yagaragaje ko aya mafaranga azagirira akamaro Abanyarwanda kuko imishinga azifashishwamo izahangira akazi abatari bake, bakigobotora ubushomeri.

Yagize ati “Aya mafaranga ntituzayakoresha mu kuzamura ibice by’icyaro gusa, ahubwo azanifashishwa mu guhangira imirimo abaturage, tuzanayifashisha mu guhangana n’ingaruka z’imihindagurikire y’ikirere, byose mu murongo wo guteza imbere icyaro nk’uko biri mu ntego z’ibanze za EDPRSII (Gahunda y’Imbaturabukungu).”

Ambasaderi w’u Budage mu Rwanda Peter Fahrenholtz yashimiye cyane u Rwanda ku buryo rubyaza umusaruro ubushobozi rufite mu kuzamura imibereho y’Abaturage muri rusange, asaba ko n’aya mafaranga yahasha mu kurushaho gucira inzira y’iterambere umuturage wo hasi.

Fahrenholtz yavuze ko ubu bufatanye bushimangira umubano w’igihe kirekire hagati y’ibihugu byombi na cyane ko bifitanye amateka (bimaranye igihe).

Yagize ati “Aya masezerano ni ikimenyetso cy’umubano n’ubuhahirane bishingiye ku bucuti n’ubwizerane byakomeje kuranga ibihugu byombi.Ubudage bufite umuhate wo gushyigikira iterambere ry’inzego zibanze mu Rwanda.

Ubudage gusanzwe bushyigikira gahunda z’iterambere mu Rwanda binyuze mu kugo KFW, mu guteza imbere ibikorwa byo kwegereza ubuyobozi abaturage binyuze mu bikorwa remezo.

Ubudage kandi bushyigikira imishinga y’abanyarwanda ku giti cyabo yo kubaka amashuri, ibigo nderabuzima, kwegereza abaturage amashanyarazi, kubaka imihanda n’ibiraro, amasoko n’amaterasi y’indinganire byose hamwe byatwaye miliyoni 34 z’amayero kuva 2006.

[email protected]