Aya masezerano yasinywe kuri uyu wa Kane hagati ya Guverinoma y’u Rwanda n’iya Pologne.

Iyo nguzanyo izifashishwa mu kugura imashini zikonjesha umukamo, zigurwe ku kigo cyo muri Pologne, Faspol. Hazatangwa imashini n’ibikoresha bijyana nazo 400, hagamijwe kugabanya amata yangirikaga ataragera ku nganda ziyatunganya.

Minisitiri w’Imari n’Igenamigambi, Dr Uzziel Ndagijimana yatangaje ko iyo nguzanyo yitezweho gufasha u Rwanda guteza imbere aborozi no gufasha inganda z’amata kubona ayujuje ubuziranenge.

Ati “Iyi nkunga izafasha mu kubaka amakusanyirizo y’amata ya kijyambere ahantu hatandukanye hakomoka umukamo kugira ngo ayo mata yakirwe, atunganywe, yoherezwe ku nganda zitunganya amata yujuje ubuziranenge.”

“Bizatuma twongera umukamo, kubika no gutunganya amata. Tugamije no kongerera agaciro amata mu buryo bwo kuyatwara no kuyatunganya, tuyaganisha ku ruganda rushya rw’amata rugiye kuzura i Nyagatare ruzajya ruyahinduramo amata y’ifu.”

Marek Tomczuk uri mu buyobozi bwa Banki y’Iterambere ya Pologne, yatangaje ko iyi nguzanyo ari umusaruro w’umubano uri hagati y’ibihugu byombi, bikaba bizafungurira amarembo abandi bashoramari bo muri Pologne kuza kuyishora mu Rwanda.

Ati “Kubera aya masezerano, ubucuruzi bw’u Rwanda na Pologne buzazamuka hafungurwe amahirwe mashya dore ko ari kimwe mu bihugu byoroshye gukoreramo ubucuruzi muri Afurika.”

Umunyamabanga wa Leta muri Minisiteri y’Ubuhinzi n’Ubworozi, Eric Rwigamba yatangaje ko aya mafaranga azungukira abaturage, bajyaga bagira ibihombo biturutse ku mata yangirika kubera amakusanyirizo adafite ubushobozi bwo kuyabika neza.

Ati “Bizafasha guteza imbere imibereho y’aborozi kuko bagiye kubona isoko ry’umukamo wabo. Hari benshi bagiye kubyungukiramo kandi amata yacu abe afashwe neza. Twiteguye gutuma iyi nguzanyo ibyazwa umusaruro.”

Iyi nguzanyo ni umusaruro w’umubano w’u Rwanda na Pologne warushijeho gutezwa imbere guhera mu 2021 ubwo u Rwanda rwafunguraga ambasade yarwo i Varsovie.

Amafoto: Kwizera Herve