Ubukungu bw’u Rwanda buziyongeraho 7.6%, ruri mu bihugu ubukungu buziyongera cyane, mu gihe impuzandengo y’igipimo cy’ubwiyongere bw’ubukungu bw’ibihugu byo munsi y’Ubutayu bwa Sahara ari 5.6%.

Uko ubwiyongere bw’ubukungu buhagaze ku Isi bigaragazwa n’Ikigega mpuzamahanga cy’imari (IMF/FMI), cyakoze icyegeranyo kigaragaza impuzandengo y’uko ubukungu buzaba buhagaze ku Isi mu 2013 na 2014.

Iyo bavuze ukwiyongera k’ubukungu (Economic growth/Croissance economique) baba bashaka kuvuga uko ubukungu bwiyongeye muri uwo mwaka ugereranije n’ushize, bibarwa ku ijanisha kandi iyo mpinduka bayibarura ku musaruro w’igihugu GDP/PIB.

Dore uko bateganya ko bizaba bimeze mu myaka ibiri

Ku Isi muri rusange, mu mwaka wa 2013 ubukungu buziyongeraho 3,3% na ho mu 2014 bwiyongereho 4,0%.

Muri Afurika yo munsi y’ubutayu bwa Sahara mu 2013 ubukungu buzazamukaho ku mpuzandengo ya 5,6% na ho mu 2014 buzamukeho 6,1%.

Ahangaha ni ho u Rwanda rubarizwa ariko nk’uko tubikesha Ikigega mpuzamahanga cy’imari, ubukungu bw’u Rwanda buziyongeraho 7.6% mu mwaka wa 2013 ni ukuvuga ko u Rwanda ruri mu bihugu ukwiyogera k’ubukungu kuri hejuru.

Mu bihugu bikize cyane ubukungu buziyongeraho1,2% na ho mu 2014 wiyongereho2,2%.

Muri Leta zunze ubumwe za Amerika mu 2013 ubukungu buziyongeraho 1,9% mu 2014 : 3,0%.

Mu Buyapani 2013 buziyongeraho 1,6% mu 2014 bwiyongereho 1,4%.

Ku mugabane w’u Burayi mu bihugu bikoresha amayero ibyo bita Euro Zone/Zone Euro, Ubukungu buzagabanukaho -0,3% mu 2013 nyuma bwiyongereho 1,1% mu 2014.

Uko bimwe mu bihugu bikoresha iryo faranga biza byitwaye

U Budage mu 2013 ubukungu buziyongeraho 0,6% mu 2014 bwiyongereho 1,5%.

U Bufaransa mu 2013 buzagabanukaho -0,1% na ho mu 2014 bwiyongereho 0,9%.

U Butaliyani mu 2013 ubukungu buzagabanukaho -1,5% mu 2014 bwiyongereho 0,5%.

Espagne mu 2013 ubukungu buzagabanukaho -1,6% mu 2014 buzamukeho 1,5%.

Igihugu gikomeye i Buraya ariko kidakoresha amayero ni u Bwongereza; mu mwaka 2013 ubukungu buzazamukaho 0,7% na ho mu 2014 buzamukeho 1,5%.

Na ho mu bihugu birimo gutera imbere byihuse, ku byo bise BRICS (Brazil, Russia, India, China and South Africa).

U Bushinwa mu 2013 ubukungu buzazamukaho 8,0% na ho mu 2014 buzamukeho 8,2%.

U Burusiya mu 2013 ubukungu buzazamukaho 3,4% mu 2014 buzamukeho 3,8%.

U Buhinde mu 2013 ubukungu buzazamukaho 8,0% mu 2014 buzamukeho 6,2%.

Brésil mu 2013 ubukungu buzazamukaho 3,0% mu 2014 buzamukeho 4,0%.

Afurika y’Epfo mu 2013 ubukungu buzazamukaho 2,8% na ho mu 2014 buzamukeho 3,3%.

Na ho mu Burasirazuba bwo hagati no muri Afurika y’Amajyaruguru mu 2013 ubukungu buzazamukaho 3,1% na ho mu 2014 buzamukeho 3,7%.

Ubucuruzi mpuzamahanga buziyongeraho 3,6% mu 2013 na 5,3% mu 2014. Na ho mu bihugu bikize ukwiyongera kw’ibiciro kuzagera kuri 1,7% mu 2013 no kuri 2,0% mu 2014. Ahandi hasigaye ni 5,9% mu 2013 na 5,6% mu 2014.

Iyi mibare ikorwa n’abahanga mu by’ubukungu n’ibarurishamibare bo muri icyo kigega.