Sosiyete Bombardier yo muri gihugu cya Canada, kuri uyu wa Mbere tariki 14 Gicurasi yamurikiye Rwandair indege yo mu bwoko bwa Bombadier Q400, mu rwego rwo kuyirambagiza.

Ibi byakozwe muri gahunda ya Rwandair yo kugura indege nshya izabafasha kongera ingendo za bugufi muri aka karere.

Nk’uko byasobanuwe na Sameer Adam ushinzwe amasoko muri Sosiyete ya Bombardier, iyi ndege ya Bombardier Q400 ifite ikoranabuhanga n’ibishya byinshi ugereranije n’izindi ndege nto.

Bimwe muri ibyo byiza ni ukuba ifite imyanya ihagije, igera kuri 78, ifite umuvuduko ufatika ndetse inogeye abagenzi bitewe n’ikoranabuhanga rigabanya urusaku, intebe zimeze neza n’amadirishya abonerana afasha abagenzi kureba hanze.

Umuyobozi Mukuru wa Rwandair, John Mirenge yasobanuye ko Bombardier Q400 ari imwe mu ndege ubu bari kurambagiza. Yagize ati: ’’Kugura indege ni gahunda ndende,..turi kureba hirya no hino dushaka indege inogeye abagenzi kandi yajya ifasha mu ngendo zo muri aka karere.’’

Yakomeje avuga ko nyuma yo gusuzuma indege basanze ifite ikoranabuhanga rivuguruye ugerarije n’izindi zo muri ubu bwoko bari bafite, ariko ko bagikomeza kureba n’ahandi bakazafata icyemezo nyuma.

Rwandair isanzwe ifite indege zirindwi muri rusange, eshatu muri zo zaguzwe muri iyi sosiyete ya Bombardier ari zo CRJ200 ebyiri na Dash8-100 imwe.

Iyi ndege ya Bombardier Q400 kugeza ubu imaze kugurishwa mu ma sosiyete y’ubwikorezi bwo mu kirere agera kuri 40 ku Isi hose aho, icyenda muri yo ari muri Afurika.