Kuri uyu wa 19 Werurwe, RwandAir yatangaje ko yatumije indege ebyiri zo mu bwoko CRJ900 NextGen ku ruganda Bombardier Aerospace.

Muri uku gutumiza, hashobora kwiyongeraho izindi ebyiri nk’izi. RwandAir ikazaba ikompanyi ya mbere mu karere k’uburasirazuba bw’Afurika ikoresha indege za CRJ900.

Hagendewe ku biciro by’indege za CRJ900 NextGen, kontaro ya RwandAir ikaba ifite agaciro k’amadolari y’Amerika miliyoni 89; gashobora kwiyongera kakagera kuri miliyoni 185 z’amadolari y’Amerika kugira ngo izi ebyiri zindi ziyongereho.

“Indege zacu CRJ200 z’imyanya 50 zadukoreye neza kandi zateje imbere ubucuruzi bwacu, burakura kugera aho dukenera indege ifite ubushobozi burenze,” ni ibyatangajwe na John Mirenge, Umuyobozi Mukuru wa RwandAir.

Mirenge yakomeje avuga ko izi ndege CRJ900 NextGen zifite imyanya 75 irimo imyanya irindwi yo mu rwego rwo hejuru n’indi 68 yo mu rwego ruciriritse, zikaba zifitanye isano cyane n’indege zose mu bwoko bwa CRJ.

Yongeyeho ati: “Ikindi cy’ingenzi twagendeyeho kugira ngo dufate umwanzuro wo guhitamo indege CRJ900 NextGen, ni uko Bombardier yita ku bakiliya bayo ikagira n’ubufatanye mu guteza imbere ubumenyi mu bya tekiniki muri RwandAir”

Uretse izi ndege zitegerejwe kugera i Kigali mu Kwakira uyu mwaka, RwandAir isanganywe indege ebyiri zo mu bwoko Boeing 737-800NG, ebyiri zo mu bwoko bwa Boeing737-500 n’indi imwe yo mu bwoko Dash8-200 zikora mu ngendo za buri munsi mu mirwa mikuru y’ibihugu byo mu karere k’Afurika y’uburasirazuba zikanajya i Johannesburg, Brazzaville, Libreville n’i Dubai.