ContourGlobal n’abo bafatanije mu mushinga wa KivuWatt ugamije gucukura Gaz Méthane mu Kivu begukanye igihembo cy’akayabo ka miliyoni 142 z’amadolari y’Amerika, mu irushanwa ryitwa Euromoney Project Finance Awards.

Iki gihembo cyiswe Africa Power Deal of the Year gihabwa itsinda cyangwa ishyirahamwe baba bamuritse umushinga ukeneye ubufasha cyangwa inkunga, hakajonjorwamo umwe uhabwa igihembo kiba kigomba kuwufasha gutera imbere, kigatangwa n’ikinyamakuru Euromoney Project Finance.

Amakuru dukesha urubuga rwa starafrica.com aravuga ko Tariki 9 Gashyantare 2012, i London mu gihugu cy’u Bwongereza uhagarariye ContourGlobal n’itsinda rishinzwe gushakira inguzanyo umushinga wa KivuWatt yashyikirijwe iki gihembo cy’umwaka wa 2011.

Bwari ubwa mbere iri tsinda rishinzwe gushakira inguzanyo umushinga wa KivuWatt rigizwe n’ibigo bya EAIF, FMO, BIO na NV/SA, ryegukanye igihembo cyo muri uru rwego mu gihe ContourGlobal bafatanije yo ari ubwa gatatu yegukana iki gihembo.

Joseph C. Brandt, umuyobozi mukuru wa ContourGlobal yatangaje ko bashimishijwe no kubona uyu mushinga uhabwa igihembo kandi avuga ko kigiye kubafasha gutangiza neza icyiciro cya mbere cy’uyu mushinga muri uyu mwaka.

Tim Turner, umuyobozi w’ishami rishinzwe ibikorwa by’abikorera ku giti cyabo muri Banki Nyafrika itsura Amajyambere (BAD), yagize ati :’’Banki Nyafrika itsura Amajyambere itewe ishema no kuba yarateye inkunga uyu mushinga, méthane izacukurwa izabyazwa amashanyarazi, bizagirira akamaro kanini Abanyarwanda’’.

Uyu mushinga biteganijwe ko uzatanga umusanzu ukomeye mu rwego rwo gukemura ikibazo cy’umuriro w’amashanyarazi mu Rwanda uzajya utanga Mégawatt 25, gusa ngo haracyari impungenge ku ngaruka zishobora kuzagira ku baturage baturiye iki kiyaga.