Mu mujyi wa Washington DC muri Leta Zunze Ubumwe za Amerika ku wa 8 Ukuboza 2012 Abanyarwanda baturutse mu karere ka Washington DC, Maryland na Virginia (DMV) bateraniye mu gutangiza ku mugaragaro ikigega Agaciro, bakusanya inkunga ingana n’ibihumbi 90 by’amadolari ya Amerika.

Mbere yo gutangira gahunda yari iteganyijwe uwo munsi abitabiriye uwo muhango bafashe umunota wo kwibuka Aloyiziya Inyumba wari Ministri w’Uburinganire n’Iterambere ry’Umuryango witabye Imana ku wa 6 Ukuboza 2012.

Bafashe umunota umwe wo kwibuka Inyumba Aloisea

Nk’uko twabitangarijwe n’uwungirije Perezida w’ishyirahamwe
Nyarwanda mu gace ka Washington DC, Maryland Virginie (RCA-DMV) muri Amerika, Umutoni Alice, abo banyarwanda bahuye mu rwego rwo gufungura ku mugaragaro ikigega Agaciro kandi hanavugirwa amagambo atandukanye yo kumenyesha abantu ibijyanye na gahunda y’icyo kigega ngo bikunde bibe nk’umurage uzasigirwa abana b’Abanyarwanda mu kumenya kwihesha agaciro.

Yakomeje agira ati «Nyuma twabashije gukusanya inkunga igera ku bihumbi mirongo icyenda by’amadorari ya Amerika ni ukuvuga amafaranga y’u Rwanda asaga Miliyoni 58. Uyu muhango wari witabiriwe n’Abantu barenga 300, baturuka mu karere ka DMV. .»

Igikorwa cyitabiriwe n'abagera kuri 300

Pasitoro Mishake witabiriye icyo gikorwa yagereranyije u Rwanda n’igiti cyera imbuto nziza, abashumba babura uko bazimanura bakagitera imijugujugu.

Ambasaderi James Kimonyo, wagize ati “U Rwanda rweze imbuto z’imiyoborere myiza, kurwanya ubukene, kurwanya ruswa, guteza imbere uburezi ndetse n’ibindi. Akaba ari byo abadakunda u Rwanda batangiye gutera imijugujugu.» Yanibukije abari aho ko Inyumba Aloyiziya watabarutse yakoreye umuryango FPR Inkotanyi kuva ari umukobwa.

Karamaga Camille, Umunyarwanda ukora mu Kigega mpuzahanga cy’imari i Washington, yasobanuye akamaro k’inkunga z’amahanga ndetse n’ingaruka z’ikatwa ryazo. Yavuze ko guhera mu 1994 kugeza ubu u Rwanda rwagabanyije kurambiriza ku nkunga z’amahanga.

Agaragaza ko guhera 1994-1998 u Rwanda rwakeneraga 100% by’ingengo y’imari, 1998-2002 rukenera inkunga ingana na 95% ariko guhera 2002-2012, rucyenera 52% gusa.

Karamaga yongeye yibutsa abantu ko u Bwongereza bwashyize u Rwanda ku mwanya wa mbere mu gukoresha neza inkunga batanga. Yavuze ko u Bwongereza cyangwa andi mahanga buramutse buhagaritse inkunga hari imirimo ya Leta cyangwa se ibikorwa rusange bitazagenda neza ariko ntabwo bizashegesha igihugu cyane. Iterambere ry’igihugu ntirizazamuka ku muvuduko ryari rigezeho mu 2013.

Rwivanga Cathy, umunyamabanga mukuru wa Komite nyarwanda yo muri DMV, nk’ umuntu wakuriye mu mahanga , ubu afite ishema n’agaciro byo kuba Umunyarwandakazi, kandi nk’umubyeyi azigisha abana be umumaro w’umurage w’agaciro mu banyarwanda.

Kayinamura Bob, atangaza ko ikigega cy’iterambere Agaciro cyakagombye kuba ikemenyetso cy’imbaraga z’Abanyarwanda. Ubushake bwo gutanga umusanzu ari ishema ryo kwishimira kuba Umunyarwanda. Kandi ko intego ari uko Abanyarwanda bagomba kwikemurira ibibazo bagateza iterambere rusange rigira inyungu abanyarwanda bose.

Uyu muhango waranzwe n’inyidagaduro irimo kuririmba, kubyina na Fashion show. Umuhanzi Frankie Joe ubusanzwe utuye muri Canada akaba atarahatanzwe mu ndirimbo ze nka Bubly Bubly, umusonga n’izindi.

Komite Nyobozi y'Abanyarwanda baba mu karere ka DMV