Abahinzi b’ibisheke bo mu murenge wa Shyorongi mu kagali ka Nzove batangaza ko babangamiwe n’abagoronome babananiza mu kubaha uburenganzira bwo kubitema mu gihe byeze .

Abahinzi baganiriye na IGIHE batangaje ko ikibazo kibabangamiye ari icy’uko mu gihe babonye umusaruro imyuzure yabahaye agahenge babangamirwa n’abagoronome batabaha uburenganzira bwo gutema ibisheke ngo babijyane ku ruganda.

Umutegarugori w’umuhinzi w’ibisheke yagize ati "iyo nabaga nejeje bakanyemerera gutema, imodoka 5 cyangwa 6 nazipakiraga ku munsi, ariko kuri ubu pakira 2 kubera abagoronome bashyiramo agahimano bakadupanga mu buryo butubangamiye cyangwa bakatubuza gutema."

Anavuga ko baba bashaka amafaranga bemerere umuntu gutema ibisheke bye kandi byeze.

Yakomeje agira ati "Abagoronome baba bashaka amafaranga kugira ngo ukunde ubiteme, kuko bemerera ababahaye amafaranga, uyabuze ibisheke bye bikumira mu murima. Ibisheke wagira ngo ni ibya abakapita ntabwo ari ibyacu!Ni bo bikijije."

Uyu mutegarugori akomeza agira ati "ikindi kandi ubu maze kohereza ibisheke inshuro 3 ntabona urupapuro napakirijeho, ba Kapita barambwira ngo ziri ku ruganda.”

Aba bahinzi bifuza ko no ku ruganda ibyahagejejwe bakwiye kubyongerera igiciro, kuko ngo babaha amafaranga ibihumbi 12 kuri toni, bakifuza ko yagera ku nibura kubihumbi 15.

Banavuga ko byaba byiza ku ruganda bagiye babaguriza amafaranga mu gihe bagize ikibazo nk’abantu babagemurira ibisheke, bityo uwaba afite umwana birukanye akaba yabona amafaranga make y’inguzanyo azakurwaho ajyanye ibisheke.

Mu bindi bibazo bagaragaza bahura na byo ku ruganda harimo gutinda kubishyura amafaranga y’ikirarane cy’imyaka 2.

Umuhinzi w’ibisheke w’umugabo utashatse ko amazina ye atangazwa yagize ati" Ahandi ibihingwa birakurikiranwa n’abahinzi bagakurikiranwa ugasanga ibihingwa byarabagiriye akamaro, ariko twe abahinzi b’ibisheke dufite ibibazo, bazadusabire inama iduhuza n’abagoronome n’abayobozi b’Uruganda.”
Mugenzi we w’umutegarugori yavuze ko yarumbije inshuro 3, kuri ubu ahasaga hegitari 4 hakaba haramuhombeye. Avuga ko ku ruganda iyo habaye ibiza babivuga ariko ku bahinzi ngo ntacyo bibamarira. Yavuze ko basabwe kuzajya babihinga imusozi abona ko naho harimo ibibazo kuko habura amazi yo kubyuhira bikuma.

Habimana Anselme, ushinzwe ubutegetsi n’imari ku ruganda rwa Kabuye aho abo bahinzi bagemura ibisheke twagerageje kumuvugisha kuri telefone ntitwamubona kugira ngo adusobanurire icyo bateganya mu gufasha aba bahinzi gukemurirwa ibibazo. Tumwoherereza ubutumwa bugufi bumusobanurira ibyo dushaka kumenya adusubiza agira ati "birasaba ko waza i Kabuye ukavugana n’ubuyobozi bubishyinzwe.Thkx"

Twagerageje kuvugisha Agoronome mukuru w’Akarere ka Rulindo ntitwabasha kumubona.

Aba bahinzi bifuza ko bakemurirwa ibibazo, kuko bafata igihe kingana n’amezi 18 bita ku bisheke bityo bakaba bifuza kubona inyungu mu buhinzi bakora.