Ni impinduka zabaye mu biciro by’imodoka mu Rwanda guhera mu ntangiriro za Nzeri uyu mwaka. Twifashishije ingero, nk’imodoka ya Kia Sorento yo mu 2012 ifite ubushobozi bwa moteri bwa 3,3, umuntu wayigezaga mu Rwanda muri Mutarama, byabarwaga ko ari nshya ifite agaciro ka 26.399$.

Uyu munsi iyo modoka, igeze muri Magerwa, iri kubarirwa agaciro ka 28.838$.

Kia Sportage y’uwo mwaka ifite moteri ya 3,5, mbere yaguraga byabarwga ko agaciro kayo ari nshya ari 25.139 $, uyu munsi ni 29.260$ byumvikane ko hiyongereyeho asaga 3000$.

Izi mpinduka mu biciro bivuze ko zihita zituma n’imisoro yiyongera, kuko imodoka isora hagendewe ku giciro cyayo ari nshya n’igihe imaze isohowe n’uruganda (amortisation), igahabwa agaciro kajyanye n’uko yaba yarataye agaciro ku isoko.

Ufashe nka ya Kia Sportage yo mu 2012, iyo ugeze muri Magerwa, ibarirwa ko imaze imyaka 12 isohotse. Nubwo ari nshya yahawe agaciro ka 25.139 $, abasoresha bayibarira ko urebye igihe imaze, ifite agaciro ka 5.027$. Uyu munsi iyi modoka, iyo igeze muri Magerwa, iba ibarirwa ko mu mafaranga y’u Rwanda ifite agaciro ka 8.415.408 Frw.

Ayo mafaranga ni yo aherwaho ibarirwa umusoro ku buryo kugira ngo isohoke, umusoro wayo aba ari miliyoni 6,2 Frw ku buryo agaciro kayo aba ari miliyoni 14 Frw.

Tugendeye noneho ku biciro biriho uyu munsi, iyi modoka izabarirwa agaciro ka 29.260$, hanyuma umusoro wayo uzaba miliyoni 7,6 Frw bivuze ko wiyongereho hafi miliyoni 1,4 Frw.

Imodoka hafi ya zose ibiciro byazo byariyongereye, ugereranyije n’ibyakoreshwaga nko muri Mutarama n’ibishya biri gukoreshwa guhera ku wa 3 Nzeri.

Nka Mercedes Benz, imwe mu modoka zikunzwe mu Rwanda, dufashe urugero nko kuri C200 yo mu 2014, mbere mu Rwanda yabarirwaga agaciro ka 24.629$ mu gihe ifite moteri ya 2,0; uyu munsi iyo modoka iri kugura 37.000$ byumvikane ko yiyongereyeho asaga ibihumbi 12$.

Izindi ngero

Hafi imodoka zose zikunzwe mu Rwanda, agaciro kazo karazamuitse. Benz C200 (ifite moteri ya 1,8L, 4WD) nshya yakozwe mu 2011, agaciro kayo kari 22.464$, ubu ni 32.166$.

Toyota Rav4 yo mu 2003 (ifite moteri ya 2,0L) yabarirwaga agaciro ka 18.229$ ari nshya, ariko ubu ni 19.113$.

KIA Cadenza/ K7 (ifite 2,0L yakozwe 2013) yavuye kuri 25.074$ igera kuri 26.714$. KIA K5 (ifite moteri ya 2,0L yakozwe mu 2013) yavuye kuri 18.991$, igera kuri 24.317$.

Hyundai Tucson (ifite moteri ya 2,0L yakozwe mu 2013) yavuye kuri 18.802$, igera kuri 22.814$. Toyota Camry (ifite moteri ya 2,5L yakozwe mu 2013) yavuye ku 20.535$, igera ku 24.317$.

Abacuruzi barabogoza

Abari mu bucuruzi bw’imodoka bakomeje kugaragaza ko bari kugirwaho ingaruka n’izamuka ritunguranye ry’ibiciro by’imodoka zitandukanye ku isoko ry’u Rwanda, ku buryo hari na zimwe bari batumije ariko kuri ubu zaheze muri gasutamo kubera izi mpinduka batari biteze.

Impinduka mu biciro ntizahereye ku modoka zikigera muri gasutamo, ahubwo n’izari zirimo mbere zahise zigerwaho

Umwe mu bo twaganiriye yagize ati “ Kugeza ubu Ikigo cy’Imisoro n’Amahoro kivuga ko hakwiriye kubahirizwa ibiciro bishya, gusa byaje bitunguranye tutiteguye ku buryo niba wari waratumije imodoka ufite ingengo y’imari runaka, urasanga nk’imisoro yahindutse.”

Undi ati “Ubu hari nk’imodoka twatumije tuzi ko tuzayisorera miliyoni 13 Frw ariko ubu umusoro wayo wageze muri miliyoni 20 Frw. Uribaza iyo nyongera utari witeze?”

Ikigo cy’Imisoro n’Amahoro gisobanura ko izi mpinduka zidakwiriye gutungura abantu, kuko zisanzwe zikorwa kandi ko byemewe mu mategeko mu kujyanisha ibiciro n’agaciro k’ivunjisha.

Komiseri Wungirije Ushinzwe Serivisi z’Abasora n’itumanaho muri RRA, Uwitonze Jean Paulin, yabwiye IGIHE ati “Guhinduka kw’ibiciro by’imodoka bigenderwaho mu kubara umusoro ni ibintu bisanzwe, ahanini biterwa n’impinduka ziba zabaye ku isoko ry’ivunjisha, n’izamuka ry’ibiciro cyane cyane iby’ubwikorezi bwo mu nyanja, kuko birebwaho mu kubara imisoro muri Gasutamo."

Abashinzwe imisoro bahora bagenzura ko ibiciro by’imodoka bafite bihuye n’ibitangwa n’inganda, iyo bidahuye bakabijyanisha.

Imodoka nyinshi zikunze ku isoko ry'u Rwanda, ibiciro byazo byiyongereye

Umunsi ku wundi, abatunze imodoka mu Rwanda bariyongera