Mbere y’uko isoko risozwa i Mombasa kuri uyu wa Kabiri, icyayi cya Kitabi cyaguzwe ku $6.06 mu gihe icyayo cya Gisovu cyaguzwe $5.97, igiciro kiri hejuru cyane ugereranyije n’uko bisanzwe.

Kugeza kuri uyu wa Mbere, icyayi cya Gisovu ni cyo cyari cyaguzwe menshi ($5.5), mu gihe icyayi cya hafi cyo muri Kenya cyari icy’uruganda rwa Githongo rwo mu gace ka Meru, cyaguzwe $4.28 ku kilo.

Congratulations to Kitabi and Gisovu #tea factories for fetching the highest prices on EATTA in Mombasa. The two factories sold their BPI teas at $6.06 and $5.97 respectively. These are the highest prices ever sold at EATTA auction since it's inception in 1956. pic.twitter.com/Hs1cY6idmK

— Rwanda Tea (@RwandaTea) August 13, 2019

Ibihugu byo muri aka karere bihurira kuri iri soko ry’i Mombasa, icyayi cyabyo kigahatana mbere yo kwerekezwa ku isoko mpuzamahanga. Ni igikorwa gitegurwa n’Ihuriro ry’abacuruzi b’icyayi muri Afurika y’Iburasirazuba ( East Africa Tea Trade Association, EATTA).

Mu Rwanda Icyayi cyatangiye guhingwa mu 1961. Mu mwaka wa 2018 cyakorwagamo n’abahinzi 42840, gihingwa kuri hegitari 26897 mu turere 12 tw’igihugu. Ingano yacyo yarazamutse iva kuri toni 14 500 mu 2000 igera kuri toni 27 824 mu 2017/2018.

Ikigo cy’Igihugu gishinzwe guteza imbere ibyoherezwa mu mahanga bikomoka ku Buhinzi n’Ubworozi (NAEB), kigaragaza ko mu 2016-2017 icyayi cyoherejwe mu mahanga cyari toni 25,128 zavuyemo miliyoni $74,5 mu gihe mu mwaka w’ingengo y’imari wa 2017-2018 habonetse toni 27 824 zasaruwemo miliyoni $88.

Mu 2018 mu Rwanda hari inganda 16 zitunganya icyayi. Mu bakoranaga na zo abagore bari 60% n’abagabo 40%.

Icyayi cy’u Rwanda kimaze kuba ubukombe, muri Gicurasi umwaka ushize cyahawe ibihembo 11 muri 12 byatangiwe mu Nama yahuje Abahinzi b’Icyayi muri Afurika, yabereye i Nairobi.

Icyayi cy'u Rwanda gikomeje kwihagararaho ku isoko mpuzamahanga