Mu gukomeza gushyira mu bikorwa igishushanyo mbonera cy’Akarere ka Gasabo, ahari hasanzwe isoko rya Kimironko hagiye kubakwa isoko rya kijyambere rizaba rifatanye n’ikigo abagenzi bategeramo imodoka, bizuzura bitwaye akayabo gasaga miliyari 20 z’amafaranga y’u Rwanda.

Kubaka isoko rya kijyambere, ikigo abagenzi bategeramo imodoka, amazu y’ubucuruzi n’ayo guturamo ndetse n’imihanda igezweho hatibagiwe n’inzira z’abanyamaguru zinyura mu kirere, ni byo Akarere ka Gasabo gafatanyije n’abashoramari biteguye gushyira mu bikorwa igishushanyo mbonera, gisigaje gusa kwemerwa n’Inama Njyanama y’akarere. Ibi byagaragajwe mu nama yahuje ubuyobozi bw’Akarere ka Gasabo n’abafatanyabikorwa bako mu gushyira mu bikorwa ibikubiye mu gishushanyo mbonera cyako.

Umuyobozi w’Akerere ka Gasabo, Ndizeye Willy, mu kiganiro na IGIHE, yadutangarije ko igishushanyo mbonera cy’akarere ka Gasabo kije gusubiza ibibazo bijyanye n’ubwubatsi, kuko abenshi bubaka mu kajagari bigahenda Leta iyo igiye kwagura ibikorwa.

Akomeza atangaza ko kubataka binyuranye n’igishushanyo mbonera bitera ibibazo cyane cyane ko hari abubaka ahagomba kuyoborwa amazi imvura yagwa ikabasenyera, cyangwa se bagasenyerwa n’ibindi bikorwa Leta iba yarahatenganyirije. Avuga ko abaturage batagomba guterwa impungenge na cyo. Agira ati “Igishushanyo mbonera abaturage ntibakwiye kugifata nk’aho hazubakwa amazu manini gusa. Giha umwanya abaturage bose kuko hari n’ahateganyirizwa ubuhinzi n’ubworozi ndetse n’indi mirimo ifitiye abaturage bose akamaro.»

Ndizeye atangaza ko hateganyijwe ahazubakwa imihanda y’imodoka n’uwa Gari ya Moshi, inzira z’abanyamaguru zinyura mu kirere n’ibindi bikorwa remezo, kandi igishushanyo mbonera cy’akarere kizafasha abaturage kumenya ibitenyirijwe aho batuye.

Eng. Karamagye John , Umuhuzabikorwa wa «One Stop Centre» mu karere ka Gasabo, mu kiganiro na IGIHE yatubwiye ko uyu munsi bahuye n’abafatanyabikorwa bashaka gushora imari mu karere, basuzumira hamwe igishushanyo mbonera cy’akarere n’ishyirwa mu bikorwa ryacyo, kandi banagaragarizwa ahari amahirwe hashorwa imari.

Shema Fabrice uhagarariye «Gasabo Investment Company» igiye kubaka isoko rya kijyambere na Gare ya Kimironko bizatwara akayabo k’amafaranga y’u Rwanda asaga miliyari 20, yadutangarije ko kugira ngo ibyo bishobore kugerwaho, Abanyarwanda bakangurirwa gushoramo imari baguramo imigabane, kuko bategany kugera ku mari shingiro ya miliyari eshatu. Avuga kandi ko bakorana n’abashoramari b’abanyamahanga ku buryo bazubaka amazu agera ku 2000, ku buryo mu myaka itandatu azaba yuzuye, ariko isoko na Gare bizuzura nibura mu mpera za 2016.

Uretse Gasabo Investment Company abandi bashoramari bazafatanya n’akarere ka Gasabo harimo Valley Site Apartments izubaka amazu 1720 yo guturamo i Rusororo, ku ikubitiro muri uyu mwaka ikazubaka 300. Hari kandi ADARWA yo ku Gisozi izubaka inzu y’ubucuruzi ifite agaciro ka Miliyari imwe na miliyoni 800, SOPROCOGI nay o yo ku Gisozi izubaka inzu y’ubucuruzi ifite agaciro ka miliyari eshatu; COPCOM yo ku Gisozi izubaka nay o inzu eshatu z’ubucuruzi zifite agaciro ka miliyari eshatu n’igice; Urukumbuzi Company Ltd izubaka i Kinyinya inzu 100 zo guturamo, imwe ifite agaciro ka miliyoni 38 na CO-CPPAR izubaka inzu y’ubucuruzi ku Mulindi ifite agaciro ka miliyari ebyiri na miliyoni 800.

Umuyobozi w'Akarere ka Gasabo, Ndizeye Willy

Shema Fabrice uhagarariye «Gasabo Investment Company» igiye kubaka isoko rya kijyambere na Gare ya Kimironko

Valley Site Apartments izubaka amazu 1720 yo guturamo i Rusororo, ku ikubitiro muri uyu mwaka ikazubaka 300

Abashoramari bashyira umukono ku masezerano y'ubufatanye n'ubuyobozi bw'Akarere ka Gasabo

Bamwe mu bitabiriye inama

[email protected]