Kuri uyu wa 6 Nyakanga 2015, sosiyete MTN ikorera mu bihugu 22 ku mugabane wa Afurika yagiranye ubufatanye na Western Union mu buryo bwo koroshya ihererekanya ry’amafaranga hagati y’abatuye muri ibyo bihugu.

Uretse kuba bizongera umubare w’abohererezanyaga amafaranga hakoreshwe Western Union, bizafasha abanyarwanda kubasha kubikuza amafaranga yabo ku biro (Agencies) birenga 400 mu Rwanda za Western Union ndetse na 1,350 muri Cote d’Ivoire.

Abaturage, inshuti, abavandimwe bamwe baba mu Rwanda n’abo muri Cote d’Ivoire bazajya boherezanya amafaranga uko babyifuza n’igihe babishakiye.

Umuyobozi mukuru wa Western Union Khalid Fellahi yagize ati: “Western Union ikomeje kwaguka hirya no hino muri Afurika, yorohereza abakiriya kwakira no kohererezanya amafaranga byihuse.”

Yakomeje avuga ko Western Union igamije kuzamura ubukungu bwa Afurika, uyu mubagabane ukava mu bucuruzi bwa gakondo ahubwo igakora amasaha 24, iminsi irindwi kuri irindwi.

Muri Mata 2015, MTN yari ifite miliyoni 27,4 bakoresha serivisi za mobile money mu bikorwa 14 bitandukanye, ibyo bikorohereza abakiriya kohererezanya amafaranga ndetse no kwishyura serivisi bakeneye hirya no hino ku Isi.

Serigne Dioum ushinzwe serivisi za mobile money muri MTN Group yatangaje ko iyo sosiyete ari yo iyoboye izindi z’itumanaho muri Cote d’Ivoire, aho ifite abafatabuguzi miliyoni 8,3 kandi abagera kuri miliyoni 2,6 bari muri mobile money.

Serigne ati “MTN yiyemeje gutanga serivisi zishingiye ku dushya zituma ubuzima bw’abakiriya barushaho kuba bwiza.”

Guhuza mobile money na Western Union bizafasha abantu kohereza no kwakira ku buryo bwihuse amafarnga hirya no hino ku Isi.

[email protected]