Uruganda rwa Mara Phone rufite icyicaro mu cyanya cy’inganda cya Kigali mu Karere ka Gasabo, rwafunguwe na Perezida wa Repubulika Paul Kagame ku wa 7 Ukwakira 2019.

Rukora ubwoko bubiri bwa Mara Phone aribwo Mara Z na Mara X, zombi zijyamo SIM Card ebyiri. Mara Z igura 175 750 Frw naho Mara X ni 120 250 Frw.

Ni uruganda rumaze kwamamara kuri telefoni rukorera mu Rwanda aho zimaze kugezwa mu bihugu birenga 41 kandi bikomeje kwiyongera.

Umunya-Ethiopia, Eng. Mengistu Berhanu, uyobora Monaco Automotive Engineering abinyujije kuri Twitter yatangaje ko izo telefoni zanagejejwe no ku isoko ryo muri Ethiopia.

Yagize ati “Telefoni ya Mara Phone ikorerwa mu Rwanda ubu wayibona muri Ethiopia. Irahendutse, ikorwa n’Abanyafurika, igakorerwa muri Afurika, iraboneka. Iyo uguze telefoni ya Mara Phone uba wubatse Afurika.”

Ubu butumwa yabuhererekesheje amashusho agira ati “Yakozwe n’abenjeniyeri b’Abanyafurika, ikorewe Abanyafurika. Mara Phone iraboneka ku Banya-Ethiopia muri Ethiopia.”

Abari muri Ethiopia bashyiriweho uburyo bwo gutumiza telefoni kuri internet banyuze kuri http://maraphone.com cyangwa bagahamagara 0911932709.

Iyaguka rya Mara Phone kugera ku isoko rya bimwe mu bihugu bya Afurika ryishimiwe n’abakoresha urubuga nkoranyambaga rwa Twitter, bagaragaje ko ari iby'agaciro gukoresha telefoni zakorewe muri Afurika n'Abanyafurika.

Ni umwe mu mishinga itangiye kubyara inyungu binyuze mu masezerano ashyiraho Isoko rusange rya Afurika rizahuriza hamwe abaturage bagera kuri miliyari 1.2 batuye Afurika n’ibihugu 55 bifite umusaruro mbumbe tiliyari 2.5 z’amadolari ya Amerika.

Aya masezerano yasinyiwe i Kigali muri Werurwe 2018, azazamura ubucuruzi bukorwa hagati y’ibihugu bya Afurika busanzwe kuri 16%, igipimo kiri hasi cyane ugereranyije na 60% ibyo bihugu bikorana n’u Burayi na 50% bikorana Aziya.

Seth Bisimwa yagize ati “Iyi ni yo Afurika dukeneye, abantu bafashanya, mureke dukoreshe Mara phone.’’

Umuyobozi Mukuru w’Uruganda rwa Mara Phone mu Rwanda, Eddy Sebera, yunzemo ati ‘‘Murakoze ku bufasha bwanyu. Iyi ni yo Afurika twifuza.’’

Telefoni za mbere za Mara Phone zakorewe mu Rwanda zamuritswe bwa mbere muri Kamena 2019.

Mara Phone nirwo ruganda rwa mbere muri Afurika rukora telefoni zigezweho za smartphones, rwitezweho kujya rukora nibura smartphones 1,200 ku munsi zo kugurisha mu Rwanda no hanze.

Mara Phone ifite ubushobozi bwo gukora telefoni 1000 ku munsi. Yatangiranye amaduka atatu acururizwamo telefoni zayo, KBC, KIC (ahitwaga UTC) n’iririmo gufungurwa mu isoko rya Nyarugenge. Biteganywa ko mu mezi abiri ari imbere amaduka azaba amaze kuba umunani, ari naho hashobora gukorerwa telefoni zagize ikibazo.

Telefoni za Mara Phone zikorerwa mu Rwanda zagejejwe ku isoko ryo muri Ethiopia
Telefoni za Mara Phone zikorerwa mu Rwanda zagejejwe ku isoko ryo muri Ethiopia
Umunya-Ethiopia, Eng. Mengistu Berhanu, uyobora uruganda rukora ibyuma by’imodoka Monaco Automotive Engineering, yasabye bagenzi be kugura izi telefoni
Umunya-Ethiopia, Eng. Mengistu Berhanu, uyobora uruganda rukora ibyuma by’imodoka Monaco Automotive Engineering, yasabye bagenzi be kugura izi telefoni
Ubwo Perezida wa Repubulika Paul Kagame yarebaga ibikorwa by'uruganda rwa Mara Phone yafunguye ku mugaragaro mu Ukwakira 2019
Ubwo Perezida wa Repubulika Paul Kagame yarebaga ibikorwa by'uruganda rwa Mara Phone yafunguye ku mugaragaro mu Ukwakira 2019