Abacuruzi, abashoramari n’abanyenganda b’ingeri zinyuranye bagiye kongera guhurira i Rubavu mu Ntara y’Uburengerazuba, bamurika ibikorwa byabo. Ni muri Mini-Expo iteganyijwe mu byumweru bibiri bisoza uyu mwaka.

Bigizwemo uruhare n’Urugaga Nyarwanda rw’Abikorera (PSF), si ubwa mbere iri murikagurisha rito (Mini Expo) rigiye kubera i Rubavu, kuko ryahatangijwe mu mwaka w’2010, rikaba rigiye kuhabera ku nshuro ya Gatanu.

Mu kiganiro IGIHE yagiranye na Joseph Akumuntu ukurikira hafi itegurwa ryu’iri murikagusrisha, avuga ko iyi Mini Expo ijya ibera mu Ntara y’u Burengerazuba yegereza Abanyarwanda ibyiza Nyaburanga byo ku Kiyaga cya Kivu, bakegera abaturanyi b’i Goma muri Repubulika Iharanira Demokarasi ya Congo baza kuhahahira, kandi bigafasha n’abo mu Ntara kwegerezwa ibicuruzwa byo hirya no hino mu gihugu bibasanze iwabo.

Iri Murikagurisha ryo mu Ntara y’Uburengerazuba, rizabera kuri Kivu Beach Rubavu kuva kuwa 19-29 Ukuboza 2014.

Akumuntu Joseph akomeza avuga ko iry’umwaka ushize ryitabiriwe n’Ibigo bikomeye by’itumanaho (Airlet, Tigo, MTN), amabanki akomeye mu gihugu, inganda, abacuruzi banyuranye, abakora ibinyobwa (BRALIRWA, SKOL), Nyirangarama n’abandi.

Uko imurikagurisha ry’i Rubavu ryakozwe muri 2011 na 2013

Mu mwaka w’2011, Imurikagurisha ry’i Rubavu ryitabiriwe n’abamurikabikorwa 194 baturutse mu bihugu binyuranye: Rwanda, DRC, Uganda, Tanzania, Misiri na Pakistan.Iri murikagurisha ryamaze iminsi 10.

Mu mwaka w’2013, nabwo ryitabiriwe n’abamurikabikorwa bo mu Rwanda n’abo mu Karere ruherereyemo. Umwihariko wabaye IPRC yamuritse ibikorwa binyuranye by’iterambere bikorwa n’Abanyeshuri, haba mu ikoranabuhanga n’ibindi bikorwa binyuranye bigaragaza ubuhanga bafite mu Bumenyi-Ngiro, n’ibindi

Ubwo Imurikagurisha ry’Iburengerazuba (Mini Expo -Rubavu) ryasozwaga umwaka ushize, abaryitabiriye bagaragaje ko igihe gisa n’icyabaye kigufi ugereranyije n’ubwitabire bw’abarihahiragamjo bifuzaga ko ryakongererwa iminsi, none uyu mwaka ryahawe ibyumweru bibiri.

Inyungu zo kwitabira Mini-Expo i Rubavu

Nk’uko Akumuntu Joseph akomeza abivuga, zimwe mu nyungu zo kwitabira imurikagurisha nk’iri ni ukumenyekanisha ibikorwa byawe, kumenyana n’abandi bashoramari n’abanyenganda, kungurana ibitekerezo n’ubumenyi, ndetse hakabamo no guharanira kuba indashyikirwa (Competitiveness), buri wese yifuza guhga abandi bakora bimwe.

Mu imurikagurisha ry’uyu mwaka hateganyijwe abacuruzi bagera kuri 300, kandi rikazarangira ryakiriye abasaga ibihumbi ijana bazarisura.

[email protected]