Abakorera mu isoko riremera mu Kagari ka Gasharu, Umurenge wa Kinyinya mu Karere ka Gasabo; baratangaza ko gukorera mu isoko ritubakiye bibabangamiye bagasaba inzego zibishinzwe kububakira isoko rijyanye n’igihe.

Muri bo hari abacururiza ku dutanda dukoze mu biti batwikiriza amahema igihe cy’imvura cyangwa izuba, abandi bakabishyiraho hasi.

Abaganiriye na IGIHE bavuga ko mu gihe cy’imvura gukora banyagirwa bidindiza akazi, ndetse n’ibicuruzwa bikahangirikira.

Bavuga ko bifuza ko inzego zibifitiye ububasha zabafasha gukorera ahantu hakwiriye, kuko ngo bakwa imisoro.

Mu gushaka kumenya neza imiterere y’icyo kibazo, twegereye Umunyamabanga Nshingwabikorwa w’Umurenge wa Kinyinya Mberabahizi Raymond Chretien, adutangariza ko iryo soko rigiye kubakwa. Ati “Umushinga uri gusuzumwa ku rwego rw’Akarere ka Gasabo turizera ko bitarenze Kanama 2013 imirimo y’ubwubatsi izaba yatangiye.”

Abaturage batuye hafi y’iri soko bavuga ko rimaze kwaguka ugereranyije n’uko ryatangiye.