Kompanyi y’indege Qatar Airways ku nshuro ya kabiri yikurikiranya yegukanye umwanya wa mbere mu makompanyi y’indege atwara abantu n’ibintu ku rwego rw’isi mu muhango ngarukamwaka wo gutanga ibihembo uzwi ku izina “Skytrax Airline Awards” wabereye mu gihugu cy’u Bwongereza.

Qatar Airways yegukanye gihembo gikuru muri “World’s Best Airline” kiba cyifuzwa n’amakompanyi menshi ku rwego rw’isi, bikaba bibaye ku nshuro ya kabiri yikurikiranya.

Usibye igihembo gikuru, iyi kompanyi ifite icyicaro gikuru I Doha yegukanye kandi ibindi bihembo bibiri birimo icyo kuba ari yo kompanyi ya mbere y’indege muri Burasirazuba bwo hagati (Best Airline in the Middle East), iki ikaba icyegukanye ku nshuro ya karindwi, ndetse n’ikindi gihembo cy’uko ariyo kompanyi abakozi barangwa na customer care iri hejuru kurenza izindi mu burasirazuba bwo hagati.

Umuhango w’itangwa ry’ibi bihembo witabiriwe n’abayobozi benshi b’amakompanyi y’indege akomeye ku isi, iki gikorwa kikaba cyari kibangikanye n’imurikabikorwa rizwi ku izina Farnborough Air Show ribera mu gihugu cy’u Bwongereza, iri rikaba ari ryo rinini ku isi riba buri mwaka.

Abashinzwe gutegura Skytrax Airline Awards batoranyije amakompanyi na sosiyete zitandukanye zigera kuri miliyoni 18 zikora ubucuruzi bufite aho buhuriye n’ubwikorezi bwo kirere mu bihugu birenga ijana ku isi, b’umwihariko amakompanyi agera kuri 200 y’ubwikorezi bukorerwa mu nzira y’ikirere ni yo yatoranyijwemo akora neza kurusha, uhereye ku mato kugeza ku manini.

Qatar Airways imaze imyaka 15 ishinzwe, muri yo ikaba yaragize iterambere ridasanzwe. Kuri ubu ikora ingendo mu mijyi 117 yo ku migabane yose y’isi ikoresheje indege 109 ifite, Iyi kompanyi yatangiye ingendo zayo mu Rwanda muri Werurwe uyu mwaka.

Hejuru ku ifoto: Bamwe mu bakozi ba Qatar Airways ku Kibuga Mpuzamahanga cya Kigali