Ikompanyi ikorera ingendo mu kirere Qatar Airways iratangaza ko igiye kongera ingendo zayo ikorera muri Afurika, aho mu kwezi kwa Werurwe 2012 iteganya gutangiza ingendo zayo mu Rwanda.

Ibiro Ntaramakuru Ecofin dukesha iyi nkuru bitangaza ko izi ngendo Qatar Airways igiye gutangiza mu Rwanda ari icyerekezo cya 17 (déstinations) izaba iganamo ku mugabane w’Afurika.

Izo ngendo zikazajya zikorwa buri wa kabiri, buri wa kane na buri wa gatandatu aho indege izajya ihagurukira i Doha saa saba z’ijoro ikagera Entebbe saa kumi n’ebyiri n’iminota 35 za mu gitondo. Urugendo rwo kugaruka indege ikazajya ihaguruka i Kigali sa yine n’iminota 40 ihagarare Entebbe saa sita n’iminota 35 (12h35) hanyuma igere i Doha saa kumi n’ebyiri n’ iminota 55 z’umugoroba (18h55).

Qatar Airways ikoresha indege 103 mu ngendo 110 iturutse i Doha. Iyi kompanyi kandi mu minsi ishize yakoze komande (commande) y’indege zirenga 250 zigendaho akayabo kangana na miliyari 50 z’amadolari. Izo ndege ziri mu bwoko bwa Boeing 787,777; Airbus A350, A380, A320, n’indege nini za Bombardier.

Qatar Airways ije gukorera mu Rwanda ari iya 5 nyuma ya Brusssels Airlines, Ethiopian Airlines, Kenya Airways na KLM. Indi yitegura gukorera mu Rwanda ni Turkish Airlines.