Mu rwego rwo gushyigikira ishoramari binyuze mu bakozi bakorera ibigo by’ubwiteganyirize, i Kigali harabera amahugurwa y’iminsi itanu, ahabwa abakozi baturutse mu bigo bigize Ihuriro ry’ibigo by’Ubwiteganyirize muri Afurika y’Iburasirazuba n’iyo hagati (ECASSA: East and Central Africa Social Security Association). Intego nyamukuru y’ayo mahugurwa ni isuzuma ry’umusaruro ukomoka ku mahugurwa n’isesengura ry’ibikenewe.

Aya mahugurwa yitabiriwe n’abaturutse mu bihugu bigize Ihuriro ry’Ibigo by’Ubwiteganyirize muri Afurika y’Iburasirazuba n’iyo hagati (ECASSA) ari byo Kenya, Uganda, Burundi, Tanzaniya, Zambiya n’u Rwanda.

Nk’uko byatangajwe na Ruhumuriza Ellis, Umukozi mu kigo cy’igihugu cy’ubwiteganyirize (RSSB) wari uhagarariye Umuyobozi Mukuru w’icyo kigo, Madame Angelique Kantengwa, akaba ari na we muyobozi wa ECASSA, aya mahugurwa azongerera abakozi ubushobozi mu gutegura no kuyobora amahugurwa mu bigo by’ubwishingizi.

Abayitabiriye kandi bazasangira ubunararibonye ku by’ibanze n’ibikenewe mu gukora isuzuma ku mahugurwa, gusesengurira hamwe ibijyanye na gahunda z’amahugurwa muri ECASSA mu cyiciro cya mbere cy’umwaka wa 2013, no gutanga ibyagenderwaho ubutaha. Hazategurwa kandi igishushanyo ngenderwaho cy’amahugurwa n’ibikenewe mu mwaka wa 2014, mu bigo baturukamo.

Muri iyi minsi itanu, abitabiriye amahugurwa barigira hamwe uburyo amahugurwa ategurwa, gutoranya ibikenewe mu mahugurwa, gushaka umuti w’ibibazo no guharanira iterambere, ibirebana no kwigisha abakuze no gutegura ibyagenderwaho muri gahunda ya 2014.

Bigendeye ku nshingano ya cumi y’ikigo cy’igihugu cy’ubwiteganyirize (RSSB) ari yo gushyikirana no gukorana n’ibindi bigo, haba ku rwego rw’akarere u Rwanda ruherereyemo ndetse no ku rwego mpuzamahanga; RSSB yitabira buri gihe ibikorwa by’inama z’Ihuriro ry’ibigo by’Ubwiteganyirize muri Afurika y’Iburasirazuba n’iyo Hagati.

ECASSA yashinzwe mu 2007 mu nama y’abayobozi b’ibigo by’ubwishingizi bahuriye i Kigali, ku wa 31 Werurwe.