Aba baganga bakoze ibizami byari bigamije kureba niba hari uburwayi bwo mu mutwe Basabose afite n'ingaruka bushobora kumugiraho.

Kuri uyu wa Mbere, tariki ya 13 Ugushyingo 2023, nibwo abaganga bageze mu Rukiko gusobanura ibyagaragajwe na raporo bakoze.

Bavuze ko basanze Pierre Basabose afite ikibazo cy’ubuzima bwo mu mutwe kirimo kwivanga kw’ibitekerezo mu bwonko bwe, bifite n’ingaruka zo gutuma adashobora gutanga ibitekerezo bifite umurongo cyangwa kumva neza.

Bagaragaje kandi ko afite uburwayi butuma agorwa no kumva neza cyangwa akumva ibintu bimugoye.

Bagaragaje kandi ko basanze afite ibibazo byo mu mutwe byagize ingaruka ku bwonko ku buryo bituma adashobora kwibuka ndetse no gutakaza ubushobozi bwo kugenzura ibikorwa n’ibitekerezo bye.

Abo baganga uko ari batatu bakoze ibizamini buri wese ukwe kandi mu bihe bitandukanye bagaragaje kandi ko banamusanganye indwara ya diabète iri ku gipimo cyo hejuru.

Hagaragajwe kandi ko impamvu yari yatumye Basabose ashyirwa mu bitaro ntatangirane n’urubanza, yari yagize infection yatewe n’igisebe afite bifitanye isano n’uburwayi bwa diabète yamurenze.

Abagize inteko iburanisha mu Rukiko rwa Rubanda mu Bubiligi babajije niba afite ikibazo gikomeye cyatuma adakurikiranwa.

Aba baganga bavuze ko uko bigaragara ubuzima bwe bugenda bujya ahabi kurushaho, ku buryo n'indwara ze zituma ntacyo yakwikorera cyangwa yigezaho.

Umwe yagize ati “Buri kintu cyose agikorerwa n'umuhungu we."

Abajijwe ku birebana n’ibisubizo Basabose asubiza, umuganga yagaragaje ko haba harimo ubwenge buke cyane.

Umuganga yavuze kandi ko diabète Pierre Basabose afite yamaze kugira ingaruka ku bwonko kandi ngo ayimaranye igihe.

Abagize itsinda ryamusuzumye bavuga ko imyitwarire ye ya buri munsi ariyo yatuma hafatwa icyemezo cyo kuba yashyirwa ahantu hihariye kugira ngo yitabweho.

Bagaragaje ko uburwayi bwa diabète bukomeye afite bwagiye bugira uruhare mu kwangiza ubwonko bwe, bitewe n’uko butuma hari igihe amaraso adatembera neza mu mubiri, ibyo bigatuma amaraso agera ku bwonko aba ari make, ubwonko bukagenda bwangirika.

Aba baganga bagaragaje ko abagize umuryango wa Basabose, nabo babwiye iryo tsinda ko agenda atakaza ubushobozi bwo kwikorera iby’ibanze nko kwiyambika, kwiyoza, kwigaburira n’ibindi.

Me Flamme yavuze ko raporo z’abahanga zigenda zigaragazwa ku mukiliya we guhera mu 2021 zishimangira ko ubuzima bwe bwangiritse.

Ati "Ngira ngo mwabonye ko iyo muvuze, na njye mpindukira nkajya kumubaza kugira ngo numve niba yumva neza ariko mwabonye ko bigoye. Ni aho Urukiko rero kumenya niba rwakomeza kumuburanisha."

Me Flamme yavuze ko uko byageze kuri Kabuga, ari nako byakagombye kugenda ku mukiliya we,Urukiko rukareka kumuburanisha kuko bikozwe kandi arwaye ubwo butabera butaba bunyuze mu mucyo.

Umushinjacyaha yavuze ko Basabose afatwa yari igishoboye kumva no gusubiza, ashimangira ko kuba ubu ubushobozi bwo mu mutwe bwe bugenda bugabanuka, Urukiko rwagombye kubihuza byombi kuko ngo bidakwiye gutuma hadatangwa ubutabera.

Twahirwa afite ihungabana ryo mu bwana

Muri uru rubanza kandi humviswe ubuhamya bw’abaganga batatu bakoze isuzuma ku buzima bwa Twahirwa Séraphin bareganwa.

Bagaragaje ko bamukoreye isuzuma mu 2020 na 2012, ariko ko icyo gihe nta bibazo byo mu mutwe bikomeye bari bamusanganye uretse imyitwarire imuteza ihungabana.

Bagaragaje ko ngo ibikomere bijyanye no kutiga, gutsindwa mu ishuri, imibanire n'umugore we byari byaramuteye ihungabana (trauma).

Bavuze ko nta kibazo Twahirwa afite kijyanye no kwibuka no gutanga ibisobanuro, ariko ngo iyo winjiyemo imbere umusangana ibibazo bijyanye n'amarangamutima bimugora kugenzura.

Iryo tsinda ryagaragaje kandi ko Twahirwa afite ubushobozi bwo kumva no gusobanura neza ibyo abajijwe no gukuriza ibyo abwiwe.

Aba baganga bavuze ko n'ubu agishobora kuvuga ibintu neza, kandi mu bihe byabyo, gusa ngo yageraga aho akababwira ibintu bitari ku murongo.

Abaganga bagaragaje ko ubwo bakoraga isuzuma Twahirwa yerekanaga ko yari umuntu w'igihangange kandi w'umuyobozi, akavuga ko abikomora ku masano yari afitanye n’Umuryango wa Perezida Habyarimana Juvénal.

Inteko iburanisha yabajije niba hari impinduka ku myitwarireye bamubonanye, abaganga basubiza ko uretse akantu k’ihungabana ryo mu buto gashobora gutuma yitwara mu buryo butandukanye nta kindi kibazo afite.

Ku bijyanye n’abagore yafatanga ku ngufu, ngo yabikoraga nk’abantu akunda ariko batari abo kwizerwa.

Yagaragarije abo baganga ko ngo yabishingiraga ahanini ku kuba umukobwa wa mbere yakunze yaranze kubana nawe amuhoye ubumuga yari afite, Kuba se yarahisemo gushaka undi mugore nyuma y’uko amenye ko nyina yamucaga inyuma n’ibindi.

Abaganga bavuze ko uyu mugabo ari umuntu bigoye gusobanura uwo ari we kuko ngo yivuga ashingiye ku muryango wa Habyarimana, ku mpanuka yakoze nyamara akirinda kwivugaho.

Umuganga yagaragaje ko ubwo yamubazaga ku bijyanye na Jenoside, wabonaga isura ye ihise ihinduka, akavuga ko ababajwe n'umugore we batakibana ariko yamubabariye kuko hashize igihe.

Bavuze ko ibyamubayeho byose, bo batabona ko byamugizeho ingaruka zimuhungabanya cyane, ariko ko ahubwo bisobanura uko imyitwarire ye yagiye ihinduka.

Abaganga bavuze yagiraga imyitwarire idasanzwe iyo yabazwaga ku bibazo bijyanye n'ibyo aregwa.

Urukiko rwakomeje rwumva abatangabuhamya bagaragaza ibyo bazi ku byaha Twahirwa na Basabose bakurikiranyweho.