00:00:00 IGIHE NETWORK KN KINYARWANDA EN ENGLISH FR FRANCAIS

Dr Rutunga yasoje kwisobanura asaba urukiko kumugira umwere

Yanditswe na Prudence Kwizera
Kuya 18 Ukwakira 2022 saa 07:58
Yasuwe :

Dr Rutunga Venant uregwa ibyaha bya Jenoside yakorewe Abatutsi yongeye kwitaba Urukiko Rukuru rw’Urugereko Ruburanisha Ibyaha Mpuzamahanga n’Ibyambukiranya Imipaka ruri i Nyanza mu Majyepfo y’u Rwanda kugira ngo aburanishwe kuri ibyo byaha.

Kuri uyu wa Mbere tariki ya 17 Ukwakira 2022 nibwo Dr Rutunga yisobanuye ku byaha bibiri byari bisigaye ari byo icyaha cy’ubufatanyacyaha muri jenoside n’icyaha cyo kurimbura imbaga nk’icyaha cyibasiye inyokomuntu.

Yagejejwe mu rukiko yambaye impuzankano iranga imfungwa arinzwe n’abacungagereza.

Uyu musaza w’imyaka 73 aregwa ibyaha bitatu bifitanye isano na Jenoside yakorewe Abatutsi mu 1994, akekwaho gukorera muri ISAR birimo icyaha cya Jenoside, icy’ubufatanyacyaha muri Jenoside no kurimbura nk’icyaha cyibasiye inyokumuntu.

Afungiye muri Gereza ya Mpanga mu Karere ka Nyanza. Asanzwe yunganiwe mu mategeko na Me Ntazika Nehemie afatanyije na Me Sebasiga Sephonie.

By’umwuhariko Ubushinjacyaha burega Dr Rutunga ko mu 1994 yatanze amabwiriza ko ikigo ISAR Rubona yategekaga gitanga ibikoresho byo kwicisha Abatutsi birimo imihoro, amasuka, inyundo n’ibindi.

Bumurega no kuba yarazanye Abajandarume muri ISAR bakica Abatutsi bafatanyije n’Interahamwe ndetse ngo agahemba abicanyi ibihembo birimo kubabagira ikimasa mu rwego rwo kubatera umurava.

Ibi byaha byose Dr Rutunga aburana abihakana.

Me Ntazika Nehemie umwunganira mu mategeko yavuze ko ibyo ubushinjacyaha bumuregesha ku cyaha cya Jenoside ari nabyo bumuregesha ku bindi byaha bityo adashobora kuba gatozi icyarimwe n’umufatanyacyaha muri jenoside.

Ubushinjacyaha bwavuze ko Dr Rutunga yari afite ububasha bwo kugira icyo akora akarokora Abatutsi kuko yari umuyobozi ukomeye muri ISAR ariko uregwa arabihakana avuga ko na we yatewe inzu yabagamo igasenywa azira kudashyigikira jenoside.

Umwunganizi we mu mategeko yavuze ko nta tangazo iryo ari ryo ryose yatanze cyangwa ngo akoresheje indangururamajwi mu mugambi wo gushishikariza abahutu kwica abatutsi.

Ku cyaha cyo kurimbura nk’icyaha cyibasiye inyokomuntu, Me Ntazika yavuze ko ubushinjacyaha bwagombye no kugaragaza amazina n’umubare w’abajandarume bumuregesha kuko yabazanye atagambiriye ko bica Abatutsi ahubwo bari baje kurinda ikigo, bityo bitakwitwa icyaha.

Yakomeje avuga ko niba Dr Rutunga yarazanye Abajandarume mu kigo bagakora ibyaha atabatumye ari bo bakwiye kubibazwa kuko nta kigaragaza ko ari we wabategetse kwica Abatutsi dore ko atari we wabahaga amabwiriza y’ibyo bagomba gukora.

Yavuze ko ibyaha byose bishinjwa umukiliya we bishingiye ku bimenyetso bidafatika kuko birimo ugushidikanya bityo asaba urukiko kumugira umwere.

Dr Rutunga na we yasabye inteko iburanisha ko mu gihe izaba yiherereye yamugira umwere mu bushishozi bwayo kuko ibyaha byose aregwa atabikoze.

Urukiko rwavuze ko ubwo Dr Rutunga asoje kwiregura ku byaha byose aregwa, hagiye gukurikiraho icyiciro cyo kumva abatangabuhamya ku mpande zombi.

Urubanza rurakomeza kuri uyu wa Kabiri taliki 18 Ukwakira 2022.

Dr Rutunga yahakanye ibyaha byose aregwa asaba urukiko kumugira umwere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .