U Rwanda rwatangije gahunda zitandukanye zigamije gufasha mu gukemura ibibazo bitandukanye hatisunzwe inkiko birimo inzira z’ubuhuza ndetse n’uburyo bwo kumvikana bishingiye ku kwemera icyaha (Plea Bargaining).

Ni ingamba zikomeje gutanga umusaruro kuko Urwego rw’Ubucamanza rutangaza ko rumaze kurangiriza mu buhuza imanza 4.573, ibiri gufasha abaturarwanda kugera ku butabera buboneye.

Raporo y’imanza igaragaza ko mu buhuza guhera ku wa 1 Nyakanga 2022 kugeza ku wa 13 Ukwakira 2023, hari hamaze gukemurwa imanza 1426 hifashishijwe ubuhuza.

Urwego rw’Ubucamanza rugaragaza ko mu cyumweru cyahariwe ubukangurambaga bwo gushishikariza abaturarwanda kuyoboka inzira z’ubuhuza ndetse n’iy’ubwumvikane bushingiye ku kwemera icyaha, haciwe imanza zirenga 184.

Muri izo izaciwe hisunzwe ubuhuza ni 27 mu gihe izindi 157 zaciwe hifashishijwe inzira y’ubwumvikane bushingiye ku kwemera icyaha.

Muri izi manza zaciwe hifashishijwe ubuhuza harimo n’urwo bareganaga aho ikiburanwa cyari gifite agaciro k’arenga miliyoni 932 Frw rwarangijwe ku wa 13 Ukwakira 2023.

Iby’ingenzi wamenya ku buhuza

‘Ubuhuza’ ni igikorwa cyo guhuza abantu bafitanye ikibazo bagahuzwa n’undi muntu bahisemo udafite aho ahuriye n’ikibazo, kugira ngo abafashe kuganira no kumvikana ku mwanzuro warangiza ikibazo bafitanye.

Ubu buryo bwatangijwe mu nkiko zo mu Rwanda mu 2012 ariko butangira kumenyekana cyane guhera mu 2018 ubwo mu miburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi hashyizwemo ingingo iha ububasha umucamanza kuba yahuza cyangwa kunga abafitanye ikibazo.

Urubanza aho rwaba rugeze hose, ababuranyi bashobora ubwabo gusaba urukiko kubakorera ubuhuza cyangwa se umucamanza wahawe kuburanisha urubanza ashobora gushishikariza ababuranyi iyo nzira abereka inyungu ziri mu gukoresha iyo nzira.

Ubwo buhuza bushobora gukorwa n’umwanditsi, umucamanza cyangwa abandi bahuza bigenga babihuguriwe bemewe n’amategeko. Igitandukanya urubanza n’ubuhuza, ntawe utsindwa kuko umwanzuro wose ufatwa, ufatwa ku bwumvikane bw’ababuranyi.

Kugeza ubu bigaragazwa ko mu madosiye 361 yaciwe hisunzwe ubuhuza yari afite agaciro kiburanwa kangana na miliyari 10 na miliyoni 984.3 Frw na 126.603,71$.

Umusaruro w’ubuhuza mu nkiko guhera ku wa 1 Mutarama 2019, kugera ku wa 13 Ukwakira 2023 ni imanza 4574. Nko mu 2019 haciwe imanza 959, mu 2020 ziba 1000, mu 2021 ziragabanuka kuko haciwe 821.

Mu mwaka wakurikiyeho ubuhuza bwaciye imanza 743 mu gihe uyu mwaka mu mezi 10 ya 2023, hamaze gucibwa imanza 1050 bifuze ko ari wo uzacibwamo imanza nyinshi hifashishijwe iyo nzira.

Perezida w'Urukiko rw'Ikirenga, Dr Ntezilyayo Faustin, yagaragaje ko ubuhuza butanga umusaruro mu gutanga ubutabera

Ubuhuza bukomeje gufasha mu gukemura ibibazo hatisunzwe inkiko

Abagororwa bane bagize ubwumvikane bushingiye ku kwemera icyaha (plea bargaining) bakagabanyirizwa ibihano