00:00:00 IGIHE NETWORK KN KINYARWANDA EN ENGLISH FR FRANCAIS

Inzego z’ubutabera zagaragaje impungenge z’amadosiye yiyongera bitajyanye n’umubare w’abakozi

Yanditswe na Kanamugire Emmanuel
Kuya 14 Ukwakira 2022 saa 12:41
Yasuwe :

Inzego z’ubutabera mu Rwanda zatangaje ko uko imyaka ishira indi igataha, amadosiye yakirwa arushaho kwiyongera mu gihe umubare w’abakozi bashinzwe kuyakurikirana wo utiyongera bikaba bigira ingaruka kuri serivisi z’ubutabera zihabwa abaturage.

Ni ikibazo cyagaragajwe n’Umushinjacyaha Mukuru, Havugiyaremye Aimable, mu muhango wo gutangiza ku mugaragaro umwaka w’ubucamanza wa 2022/2023 kuri uyu wa Gatanu.

Havugiyaremye yavuze ko mu myaka itanu ishize, amadosiye yakirwaga mu Bushinjacyaha yavuye ku bihumbi 25 none umwaka ushize wa 2021/2022 ukaba warasojwe ageze ku bihumbi birenga 83.

Yagize ati “Uko kwiyongera kugira ingaruka kuri serivisi zihabwa abaturage kuko abakozi bo ntibigeze biyongera. Twasabye ko abakozi bakwiyongera ndetse icyo cyifuzo kikaba cyaragejejwe ku nama Nkuru y’Ubushinjacyaha.”

Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel, yavuze ko ibipimo byagaragaje ko uko abaturage biyumva mu nzego zitandukanye bihagaze neza ariko ko bidakwiye ko hagira ushukwa na byo.

Ati “Nubwo imibare igaragaza ko hari byinshi bihagaze neza, tugomba guhora tuzirikana inama Nyakubahwa Perezida wa Repubulika adahwema kutugira atwibutsa ko tutagomba gushukwa n’ibi bipimo ngo tudamarare kuko inzira ikiri ndende kandi hakiri n’imbogamizi zikeneye gushakirwa ibisubizo birambye.”

Yatanze urugero rw’aho raporo y’Urwego rw’Igihugu Rushinzwe Imiyoborere igaragaza ko uko abaturage babona urwego rw’ubucamanza byagabanutse biva ku gipimo cya 81% mu 2020 bigera kuri 78% mu 2021.

Yavuze ko isesengura rigaragaza ko biterwa n’uko umubare w’imanza zinjira mu nkiko ugenda wiyongera bikanazamura umubare w’ibirarane mu nkiko.

Umwaka ushize kandi warangiye igipimo cy’imanza z’ibirarane mu nkiko kigeze kuri 59%.

Inama y’Abaminisitiri iherutse kwemeza Politiki yo gukemura amakimbirane bitanyuze mu nkiko. Dr Ugurashebuja yavuze ko yitezweho kuzagira umusaruro ukenewe haba mu gukumira ibyaha, kubigenza, kubiburanisha, guhana ababyishoyemo no kubagarura mu buzima busanzwe.

Perezida w’Urukiko rw’Ikirenga, Ntezilyayo Faustin yavuze ko urwego rw’ubucamanza rukomeje gutera intambwe nziza, imanza zicibwa n’inkiko zikaba ziyongera ugereranyije n’uko byari bimeze mu myaka itati ishize.

Yashimye uko uburyo bwo gukemura impaka binyuze mu buhuza bugenda butezwa imbere bijyanye no kongera ubudakemwa bw’imanza zicibwa. Byatumye imanza zigaragaramo akarengane zigeze kuri 3% by’imanza zisabirwa gusubirwamo.

Ati“Intego dufite yo gutanga ubutabera bunoze Abanyarwanda bifuza ntiyagerwaho hatitawe ku guhamya imyitwarire myiza y’abacamanza n’abandi bakozi b’inkiko. Hari ingamba zitandukanye zigamije kunoza ubunyamwuga, ubudakemwa, ihame ryo gufata ibyemezo mu mucyo, nta kubogama. Imwe muri yo ni ukuvugurura komite zo kurwanya ruswa mu nkiko.”

Yakomeje agira ati “Nubwo urwego rw’ubucamanza hari byinshi rwagezeho mu mwaka ushize, haracyari imbogamizi zirukoma mu nkokora navuga nk’imanza zinjira ku muvuduko munini kandi umubare w’abakozi utiyongera ku muvuduko umwe na zo. Tuzaguma gukorana na Minisiteri y’Ubutabera kugira ngo iki kibazo gikemuke mu nkiko no mu bushinjacyaha. Ndumva tuzakibonera umuti.”

Agaruka ku byagezweho umwaka ushize, Havugiyaremye yavuze ko mu kuzamura ikigero cy’imanza Ubushinjacyaha butsindiraho imanza, ku madosiye bwaregeye inkiko 37 280 bwatsinze imanza 33.799 bihwanye na 90,7%.

Ubushinjacyaha Bukuru bwakiriye kandi buha ubufasha abakozi mu by’ubutabera baturutse mu bihugu nk’u Bufaransa, u Buholandi, u Bwongereza, u Bubiligi, Norvege na Canada baje mu Rwanda mu rwego rw’ubufatanye mu butabera bishingiye ku nyandiko zitanga ibirego n’izo gufata Ubushinjacyaha bwoherejeyo.

Ubwo bufatanye ngo bwatumye abantu batatu baregwa ibyaha bya Jenoside bagarurwa kuburanira mu Rwanda ndetse bukomeza kuburana imanza z’abagaruwe mu mwaka wari wabanje. Mu Bufaransa Abanyarwanda babiri baregwaga uruhare muri Jenoside baraburanishijwe.

Ati “Tuzakomeza gushyira ingufu muri ibi bikorwa.”

Ku byaha bimunga ubukungu bw’igihugu, Ubushinjacyaha bwakiriye amadosiye 2321 muri yo 2181 akaba yarafatiwe umwanzuro. Mu manza 672 zasomwe, Ubushinjacyaha bwatsinze 534, zihwanye na 79,5%.

Ibyaha bihungabanya umutekano w’igihugu, iterabwoba, guhakana no gupfobya Jenoside byahawe umwihariko ndetse hashyirwaho uburyo buhoraho bwo kubikurikirana ku bufatanye bw’Ubushinjacyaha n’izindi nzego.

Havugiyaremye yavuze ko uru rwego rukomeje guhangana n’ibyaha byo gusambanya abana bikomeje kwiyongera kandi ko mu mwaka utaha hazashyirwa imbaraga mu ikoreshwa ry’ikoranabuhanga, kuvugurura systeme zirimo izifashamu kubika amakuru n’ibindi.

Hari gahunda yo kugabanya dosiye ziregerwa inkiko hakoreshejwe ubundi buryo buteganywa n’amategeko no kunoza ingamba zo guhangana n’izamuka ry’ibyaha bimwe na bimwe bikomeje gukabya kuba byinshi.

Perezida w'Urukiko rw'Ikirenga, Faustin Ntezilyayo, ubwo yatangizaga umwaka w'ubucamanza wa 2022/2023
Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel, yavuze ko ibipimo byagaragaje ko uko abaturage biyumva mu nzego zitandukanye bihagaze neza ariko ko bidakwiye ko hagira ushukwa na byo
Umushinjacyaha Mukuru, Havugiyaremye Aimable atanga ubutumwa mu muhango wo gutangiza ku mugaragaro umwaka w’ubucamanza wa 2022/2023 kuri uyu wa Gatanu
Abayobozi bitabiriye umuhango wo gutangiza umwaka w'ubucamanza wa 2022/2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .