00:00:00 IGIHE NETWORK KN KINYARWANDA EN ENGLISH FR FRANCAIS

Kabuga Félicien agiye kuburanishwa mu mizi

Yanditswe na Iradukunda Serge
Kuya 18 Kanama 2022 saa 01:30
Yasuwe :

Abacamanza b’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) batangaje ko Kabuga Félicien ushinjwa ibyaha bya Jenoside yakorewe Abatutsi mu 1994 azatangira kuburanishwa kuwa 29 Nzeri 2022.

Uyu mugabo w’umunyemari yafashwe kuwa 16 Gicurasi 2020, mu nyubako y’ahitwa Asnières-sur-Seine hafi y’Umujyi wa Paris. Hari nyuma y’imyaka 26 ashakishwa ngo aryozwe ibyaha ashinjwa bifitanye isano na Jenoside yakorewe Abatutsi mu 1994.

Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha rwatangaje ko muri Nzeri azatangira kuburanishwa mu mizi nyuma y’igihe cyari gishize urubanza rwe ruri mu gihe ntegurarubanza. Urubanza rwe ruzabera i Hague mu Buholandi.

Ubwo yatangazaga uyu mwanzuro, umucamanza muri IRMCT, Iain Bonomy yavuze ko uru rubanza ruzatangira humvwa impande zombi bikazakurikirwa no kumva ibijyanye n’ibimenyetso.

Ati “Urukiko rutegetse ko iburanirasha rizatangira i Hague haherewe ku kumva impande zombie kuwa 29 Nzeri 2022, kumva ibijyanye n’ibimenyetso bizaba kuwa 5Ukwakira.”

Uyu mugabo akurikiranywe n’amategeko kubera uruhare yagize muri Jenoside yakorewe Abatutsi.

Afatwa nk’uwagize uruhare runini mu gutera inkunga umugambi wa Jenoside, anatanga umusanzu mu gushinga radio RTLM yabibaga urwango.

Ubwo yashingwaga, Kabuga yatanzemo 500 000 Frw ndetse ni we wabazwaga imikorere yayo ya buri munsi nka perezida wayo, Ferdinand Nahimana akayibera umuyobozi (Directeur), Jean Bosco Barayagwiza aba umuyobozi wungirije . Abo nabo bahamijwe ibyaha bya Jenoside.

Mu nyandiko y’ibirego havugwa ko Kabuga wari umwe mu baherwe agakorana bya hafi n’ubutegetsi bwa Juvénal Habyarimana wari umukwe we, yategetse, yafashije akanoshya Interahamwe zagize uruhare mu kwica no kugirira nabi abantu bafatwaga nk’Abatutsi muri za Perefegitura ya Kigali, Kibuye na Gisenyi.

Byongeye kandi bivugwa ko afatanyije n’abandi bantu, Kabuga yashyizeho ikigega cyo kurengera igihugu hagamijwe gukusanya amafaranga yo gushyigikira, mu rwego rw’imari n’ibikoresho, ibikorwa by’Interahamwe byo kwica no kugirira nabi Abatutsi.

Bivugwa kandi ko Kabuga, afatanyije n’abandi bantu, yiyemeje gutegura, gushyiraho no gutera inkunga y’imari, umutwe w’abantu bitwaraga gisirikare bitwaga Interahamwe za Kabuga muri Segiteri ya Kimironko, i Kigali, wari ufite intego yo gushimangira urwango rushingiye ku moko hagati y’Abahutu n’Abatutsi kugira ngo bagere ku ntego yo gukora jenoside.

Kabuga ashinjwa gutuma abantu bakora ibyaha, abahamagarira gukora jenoside cyangwa avuga amagambo arangwa n’itoteza mu nama zinyuranye n’ahantu hatandukanye mu Rwanda hagati ya Gashyantare cyangwa Werurwe 1994 na Gicurasi 1994.

Kabuga Félicien agiye kuburanishwa mu mizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .