00:00:00 IGIHE NETWORK KN KINYARWANDA EN ENGLISH FR FRANCAIS

Mu myaka itanu hakurikiranywe abantu 29: Inzitizi ziracyari zose mu kugenza ruswa y’igitsina

Yanditswe na Iradukunda Serge
Kuya 7 Ukwakira 2022 saa 07:00
Yasuwe :

Urwego rw’Igihugu rw’Ubugenzacyaha, RIB rwagaragaje ko iyo uwahohotewe atareze, ruhura n’imbogamizi mu kugenza icyaha cya ruswa ishingiye ku gitsina bikaba byakomeza gutiza umurindi abakiyisaba.

Ubushakashatsi buherutse gushyirwa hanze n’Ishami ry’u Rwanda ry’umuryango mpuzamahanga uharanira gukorera mu mucyo binyuze mu kurwanya ruswa n’akarengane [Transparency International Rwanda, TI Rwanda] bugaragaza amashuri makuru na za kaminuza ndetse n’Inzego z’Ibanze nk’ahantu hugarijwe na ruswa ishingiye ku gitsina by’umwikahariko isabwa abakobwa n’abagore.

Ubu bushakashatsi bwashyize abikorera ku mwanya wa mbere w’ahantu harangwa ruswa ishingiye ku gitsina aho iri ku kigero cya 57,20% mu gihe mu mashuri makuru na za kaminuza iri kuri 42,60%.

Mu nzego z’ibanze ruswa ishingiye ku gitsina iri kuri 37,20%, amashuri yisumbuye 36,10%; mu rwego rw’ubutabera ni 23,10%, ibigo bishamikiye kuri za minisiteri iri kuri 21,70% naho muri za minisiteri iri kuri 19,70%.

Ubu bushakashatsi bwagaragaje ko nibura 39,3% by’abasabwa ruswa bahitamo guceceka ntibavuge iby’ayo mahano bakorewe, ibintu bituma RIB ikomeza kugorwa no kugenza iki cyaha.

Umunyamabanga Mukuru Wungirije w’Urwego rw’Igihugu rw’Ubugenzacyaha, RIB, Isabelle Kalihangabo yabwiye RBA ko imiterere y’icyaha cya ruswa iri mu bituma abantu bagira isoni zo kuyiregera.

Ati “Ibijyanye n’imibare y’abakurikiranwa iracyari micye kubera ikibazo cy’uko abantu badakunze kuvuga iyi ruswa. Imiterere y’iyi ruswa y’ishimishamubiri ubwayo iteye isoni no kugira ngo umuntu abe yanabivuga.”

“Iyo hari uyigusabye bikaba ngombwa ko ugwa muri uwo mutego, ni bacye batinyuka kuvuga ngo nabonye aka kazi kubera ko natanze ruswa y’ishimishamubiri.”

Imibare ya RIB igaragaza ko mu myaka itanu abantu 29 ari bo bonyine bakurikiranyweho icyaha cya ruswa y’igitsina.

Kalihangabo avuga ko indi mpamvu ituma abaregera iki cyaha bakiri bacye ari uko batarizera ko bashobora kugirirwa ibanga igihe bagannye inzego z’ubutabera.

Yakomeje avuga ko nubwo RIB ifite ububasha bwo gukora iperereza kuri iki cyaha bitabaye ngombwa ko iregerwa, usanga ubu buryo burimo inzitizi nyinshi zirimo no kuba uwahohotewe yavuga ko yakoze iyo mibonano mpuzabitsina ku bushake.

Ati “Ibijyanye n’ububasha bwo kuba twakwibwiriza tugatangiza iperereza nta muntu uturegeye turabufite, turanabikora kenshi, gusa ariko kuri ibi byaha duhura n’inzitizi, niba utabonye cya kimenyetso gifatika kugira ngo uzarenge aho biragoye, cyereka bakubwiye bati bari aha ngaha ngenda uhabafatire.”

Yavuze ko nubwo wafatira abantu mu gikorwa cy’imibonano mpuzabitsina yakozwe nka ruswa bashobora kukwitakana bakavuga ko babikoze ku bushake.

Ati “Ariko ni abantu bakuru nugerayo barakubwira bati ‘ni ku bwumvikane kuko uwakabaye yahohotewe ntabwo yigeze ashaka kubivuga niyo mpamvu uyu munsi dufite ibi byaha bike ugereranyije n’ibindi bya ruswa y’amafaranga.”

“Biterwa n’uko ababishowemo bo ubwabo badatinyuka kuvuga. Iyo wibwirije ukajya gukurikirana iki cyaha hari aho ugera ukagonga urukuta, akakubwira ati rwose uyu muntu twumvikanye, turi bakuru twembi sinzi icyo ushaka aha.”

Abagabo bayakwa bitwa imbwa

Nubwo ubu bushakashatsi bwakozwe na TI Rwanda bugaragaza ko umubare munini w’abakwa ruswa ishingiye ku gitsina ari abakobwa n’abagore ngo hari n’abagabo bayakwa.

Umunyamabanga Nshingwabikorwa wa TI Rwanda, Mupiganyi Apolinaire yavuze ko nubwo umubare w’abagabo bakorerwa iri hohotera uri hasi usanga nabo batarega ahubwo bagakwenwa na bagenzi babo babita imbwa.

Ati “Abagabo rero biracyari hasi cyane, mu makuru twabonye hari bacye bahuye n’iryo hohotera ariko ikibabaje ni uko abo bagabo kwa kwifata no kwanga gutanga amakuru biri hejuru kurusha abagore.”

“Hari uwaduhaye ubuhamya atubwira ati mugenzi wanjye yatanze amakuru avuga ko hari umukoresha we w’umugore uri kumusaba ruswa y’igitsina noneho abibwira inshuti ze, abandi nk’aho bamufashije batangira kumuseka bamubwira bati ‘abandi bajya kugura igitsina none wowe barakwinginga ukanga. Usanga mu bagabo harimo iryo pfunwe.”

Umuyobozi w’Urwego rw’Igihugu rushinzwe kugenzura iyubahirizwa ry’ihame ry’Uburinganire [GMO], Rose Rwabuhihi asanga kugira ngo iyi ruswa y’igitsina icike, abayisabwa bakwiriye kubyanga.

Ati “Abayisaba bazakomeza bayisabe, igihe abayitanga nabo bemera kuyitanga, ikintu cya mbere tugomba gukora ni ukubanza guha ubumenyi n’ubushobozi uyitanga kugira ngo areke kuyitanga, abe yashobora guhagarara abyange. Icya kabiri ni uko inzego zikora ubugenzuzi turimo natwe tugomba gukaza ubugenzuzi kugira ngo ibirego bitugezeho ntibidindire ngo byabuze ibimenyetso, ahubwo dukurikirane turebe tuti ’muri icyo kigo ingamba zihari ni izihe zo kurwanya iyo ruswa.’”

Ubuyobozi bw’Umuryango Transparency International Rwanda bugaragaza ko ruswa y’igitsina irimo ingaruka zitandukanye zirimo no gutandukana kw’abashakanye. Busaba ubufatanye bw’inzego zitandukanye mu guhashya ruswa by’umwihariko ishingiye ku gitsina kuko idindiza iterambere ikanakoma mu nkokora gahunda zashyizweho na leta zo kubaka ubushobozi bw’umugore.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .