Ku wa Gatatu, tariki ya 1 Ugushyingo 2023, ni bwo Munyenyezi yongeye kugezwa imbere y’urukiko aho asanzwe aburanira.

Akurikiranyweho ibyaha birimo icyo kwica n’icya Jenoside, gucura umugambi wo gukora Jenoside, gutegura Jenoside no gushishikariza abantu ku buryo buziguye cyangwa butaziguye gukora Jenoside, ubufatanyacyaha muri Jenoside n'icyaha cyo kurimbura n’icyibasiye inyokomuntu.

Munyenyezi n’abamwunganira babwiye Urukiko ko ikimenyetso cy’inyandiko mvugo y’umutangabuhamya wamushinje uruhare rwe muri Jenoside yakorewe Abatutsi ari igihimbano kandi ko nibukomeza kugikoresha bazaregera inyandiko mpimbano.

Me Bikotwa Bruce yavuze ko hari ikimenyetso Ubushinjacyaha bwashyize muri sisiteme ihuza ababuranyi bavuga uruhare rw’umukiliya we yagize mu gihe cya Jenoside yakorewe Abatutsi mu 1994 mu yahoze ari Perefegitura ya Butare.

Yavuze ko iyo nyandiko mvugo y’uwitwa Musoni Callixte Ndagijimana yicuza, akanasaba imbabazi ariko akavuga na bo bafatanyije barimo Béatrice Munyenyezi, umugabo wa Munyenyezi, Arséne Shalom Ntahobari na nyirabukwe Pauline Nyiramasuhuko ko atari iy’ukuri.

Abishingira ku kuba muri iyo nyandiko ngo Ubushinjacyaha bwagiye bushyiramo ibidahari kuko umukiliya we afite kopi y’ukuri agaragaza ko yagombaga gukurwa muri dosiye bitaba ibyo bakayiregera urukiko nk’inyandiko mpimbano.

Me Gashema Félicien na we wunganira Munyenyezi yavuze ko iyo nyandiko yita mpimbano idakwiye gukoreshwa n’urwego nk’Ubushinjacyaha.

Béatrice Munyenyezi we avuga ko kuba iyi nyandiko idasinye na byo bigaragaza ko ari inyandiko mpimbano.

Uhagarariye Ubushinjacyaha yavuze ko ibyo uruhande ruregwa ruvuga nta shingiro bifite kuko babishingira ku byo amaso yabo abona gusa bakayita inyandiko mpimbano.

Ati "Hari ikigo kibifitiye ububasha bwo kureba inyandiko mpimbano sinzi niba bo basimbuye iki kigo.”

Ubushinjacyaha bwavuze ko umutangabuhamya Ndagijimana Musoni Callixte yireze anabisabira imbabazi, aho yanavuze abo bari bafatanyije barimo na Béatrice Munyenyezi.

Urukiko rwavuze ko rugiye gusuzuma iki cyemezo niba abaregwa bafite ishingiro ry’uko baregera inyandiko mpimbano rukazatangaza umwanzuro ku wa Kane, tariki ya 2 Ugushyingo 2023.