Mu iburanisha ryabaye kuri uyu wa Kane tariki ya 23 Gashyantare 2023 mu cyumba cy’Urukiko Rwisumbuye rwa Huye, Munyenyezi yihannye uwari uyoboye Inteko iburanisha urubanza rwe, amushinja kubogamira ku bushinjacyaha.

Urukiko rwatangiye rubanza gusuzuma no gukuraho inzitizi zari zatanzwe n’abunganira Munyenyezi.

Aba banyamategeko be basabye ko urukiko rwategeka ko abatangabuhamya bamushinja batanga ubuhamya bwabo imbona nkubone mu rukiko mu gihe ubushinjacyaha bwo bwagaragazaga ko batagaragara mu rwego rwo kubarindira umutekano.

Urukiko rwo rwavuze ko abo batangabuhamya bazumvwa batagaragara mu rukiko kuko itegeko ribemerera kurindirwa umutekano igihe cyose babyifuje kandi ko byamaze gufatwaho umwanzuro.

Abunganira Munyenyezi kandi bari basabye ko umutangabuhamya washyizwe ku rutonde rw’abashinja Munyenyezi batabimenyeshejwe ngo bifatirwe icyemezo, yavanwa kuri urwo rutonde.

Urukiko rwemeza ko uwo mutangabuhamya atagomba kumvwa hashingiwe ku guhesha agaciro ibyamaze kwemezwa n’urukiko.

Indi nzitizi yagombaga gusuzumwa ni iyari yatanzwe n’abunganira Munyenyezi yerekeye abatangabuhamya bamushinjura aho batatu muri bo bimuriwe muri gereza ya Mpanga bavanywe muri gereza ya Huye ku mpamvu z’imyitwarire mibi nkuko gereza yabisobanuye.

Abunganira Munyenyezi babwiye urukiko ko batewe impungenge n’iyimurwa ryabo kuko ngo basanga rishingiye ku kuba baremeye gushinjura Munyenyezi.

Bavuze ko ngo baterwa ubwoba aho bafungiye ndetse bikagorana ku bantu bo mu miryango yabo kubasura ngo kuko bimuriwe kure, bongeraho ko hari impungenge z’uko abo batangabuhamya bashobora kwivana mu rubanza basaba ko hakorwa iperereza kuri bo.

Umucamanza yavuze ko urukiko rugiye gukora iperereza rugacukumbura ukuri kwabyo nyuma rukazatanga umwanzuro.

Umucamanza akimara kuvuga, Munyenyezi nawe yahise yaka ijambo avuga ko yihannye umucamanza amushinja ku bogama.

Yavuze ko kwemera kuburanishirizwa mu muhezo byaba ari nko gutesha agaciro ukuri gushakwa muri uru rubanza.

Me Mukayiza Béatrice wari uyoboye inteko yavuze ko urubanza rugomba gusubukurwa ku itariki ya 13 Werurwe 2023 bikazamenyekana niba azakomezanya narwo.

Si ubwa mbere Munyenyezi Béatrice yihannye abacamanza kuko ku nshuro ya mbere yari yihannye inteko yose ariko igakomeza ku muburanisha.

Ubusanzwe Icyemezo ku kugarura inteko cyangwa umucamanza wihanwe n’umuburanyi gifatwa na Perezida w’urukiko nyuma yo gusuzuma ibivugwa n’uruhande rwamwihannye.

Kuri iyi nshuro ariko icyemezo kuri uyu mucamanza wari uyuboye inteko iburanisha icyemezo kizafatwa na Perezida w’Urukiko rukuru kuko uwo Munyenyezi yihannye ari we Perezida w’Urukiko Rwisumbuye rwa Huye.

Uretse kwihana abacamanza mu minsi ya mbere uyu mugore yanirukanye Me Gatera Gashabana na Me Buhuru Pierre Célestin bamwunganiraga mu rubanza.

Béatrice Munyenyezi yagejejwe mu Rwanda ku wa 16 Mata 2021 yohorejwe na Leta Zunze Ubumwe za Amerika.

Munyenyezi Béatrice ukurikiranyweho ibyaha bya Jenoside yakorewe Abatutsi mu 1994 yongeye kwihana umucamanza